ភ្នំពេញ៖ ក្រុមហ៊ុនរ៉ូយ៉ាល់ ឌឹហឺស្ស បានទិញយក ស៊ីជេ ជេលជីដាង ហ្វីដ ដើម្បីពង្រីកខ្លួន និងពង្រឹងជំហរនៅតំបន់អាស៊ី ដែលនឹងផ្តល់លទ្ធភាពជាយុទ្ធសាស្រ្តទៅកាន់ប្រទេសកូរ៉េខាងត្បូង, ហ្វីលីពីន និងពង្រឹងការប្តេជ្ញាចិត្តចំពោះកសិករឯករាជ្យនៅទូទាំងតំបន់។ ការទិញយកស៊ីជេ ជេលជីដាង ហ្វីដ នេះ រួមបញ្ចូលរោងចក្រចំណីចំនួន១៧ផងដែរ។

 រ៉ូយ៉ាល់ ឌឹហឺស្ស នៅថ្ងៃទី១ ខែតុលា ឆ្នាំ២០២៥ បានចុះហត្ថលេខាលើកិច្ចព្រមព្រៀងទិញភាគហ៊ុន១០០% នៃប្រតិបត្តិការអាជីវកម្មរបស់ ស៊ីជេ ជេលជីដាង ហ្វីដ នៅក្នុងប្រទេសវៀតណាម ឥណ្ឌូនេស៊ី កម្ពុជា កូរ៉េខាងត្បូង និងហ្វីលីពីន។ ប្រតិបត្តិការនេះ គឺជាជំហានដ៏សំខាន់មួយនៅក្នុងយុទ្ធសាស្រ្តកំណើនរយៈពេលវែងរបស់ឌឹហឺស្ស និងឆ្លុះបញ្ចាំងពីមហិច្ឆតាបន្តរបស់ ឌឹហឺស្ស ក្នុងការផ្តល់អាហារប្រកបដោយសុវត្ថិភាព ជីវជាតិ និងតម្លៃសមរម្យ តាមរយៈកិច្ចគាំទ្រកសិករចិញ្ចឹមសត្វ វារីវប្បករឯករាជ្យនៅក្នុងតំបន់ និងទីផ្សារសំខាន់ៗ។

• ជំរុញកំណើនលើទីផ្សារដែលមានស្រាប់ និងទីផ្សារថ្មីៗ

ចាប់តាំងពីការបោះជំហានចូលអាស៊ីដំបូងក្នុងឆ្នាំ២០០៩ ឌឹហឺស្ស បានកសាងកេរ្តិ៍ឈ្មោះដ៏រឹងមាំនៅទូទាំងទ្វីប រួមទាំងការរីកចម្រើនយ៉ាងរហ័សនៅកម្ពុជា។ ការទិញយកក្រុមហ៊ុន ស៊ីជេ ជេលជីដាង ហ្វីដ នឹងពង្រឹងជំហរទីផ្សារនៅក្នុងប្រទេសវៀតណាម ឥណ្ឌូនេស៊ី និងកម្ពុជា ស្របពេលដែលឈានជើងចូលទៅកាន់ទីផ្សារផ្ទាល់នៅកូរ៉េខាងត្បូង និងហ្វីលីពីន ដែលជាប្រទេសមានសារៈសំខាន់ជាយុទ្ធសាស្រ្តជាមួយកំណើនសក្តានុពលគួរឱ្យកត់សម្គាល់ក្នុងខ្សែរសង្វាក់ផលិតកម្មចំណីសត្វ។

• ពង្រឹងខ្សែសង្វាក់តម្លៃបសុសត្វ និងវារីវប្បកម្មក្នុងស្រុក

ឌឹហឺស្ស មានវត្តមាននៅក្នុងប្រទេសកម្ពុជាតាំងពីឆ្នាំ២០១១ ហើយក្នុងឆ្នាំ២០២០ តាមរយៈការបណ្តាក់ទុនរួមបានក្លាយខ្លួនជា ឌឹហឺស្ស ធីអិមអេច។ ការប្តេជ្ញាចិត្តរបស់ ឌឹហឺស្ស ធីអិមអេច នៅរក្សាដដែលក្នុងការក្លាយជាកម្លាំងជំរុញដល់ភាពជោគជ័យ និងការអភិវឌ្ឍរបស់កសិករឯករាជ្យនៅកម្ពុជា។ ការទិញយកនេះបង្កើនលទ្ធភាពទទួលបាននូវចំណីគុណភាពខ្ពស់ ពូជសត្វល្អៗ ដូចជា កូនជ្រូក និងការគាំទ្របច្ចេកទេសចិញ្ចឹមដល់កសិករ ស្របជាមួយការរួមចំណែកយ៉ាងសកម្មដល់វឌ្ឍនភាពវិស័យចិញ្ចឹមសត្វ និងវារីវប្បកម្មនៅកម្ពុជាប្រកបដោយភាពរឹងមាំ និងប្រកួតប្រជែង។

លោក Gabor Fluit នាយកប្រតិបត្តិ (CEO) ក្រុមហ៊ុន រ៉ូយ៉ាល់ ឌឹហឺស្ស មានប្រសាសន៍ថា៖

«យើងខ្ញុំពិតជារីករាយដែលបានចុះហត្ថលេខាលើកិច្ចព្រមព្រៀងទិញភាគហ៊ុននេះ។ ការទិញយកនេះជាជំហានដ៏សំខាន់មួយក្នុងការពង្រឹងកេរ្តិ៍ឈ្មោះរបស់យើងនៅទូទាំងទ្វីបអាស៊ី។ តាមរយៈការរួមបញ្ចូលគ្នានូវជំនាញរបស់យើងលើចំណីសត្វ ការគ្រប់គ្រងកសិដ្ឋាន និងសុខភាពសត្វ ជាមួយនឹងវត្តមានដ៏រឹងមាំរបស់ ស៊ីជេ ជេលជីដាង ហ្វីដ យើងអាចបង្កើតគុណតម្លៃកាន់តែខ្ពស់សម្រាប់អតិថិជន ដៃគូ និងវិស័យទាំងមូល។ យើងនឹងបន្តជ្រោមជ្រែងដល់កសិករឯករាជ្យ និងរួមចំណែកដល់ប្រព័ន្ធស្បៀងអាហារប្រកបដោយភាពធន់ និងចីរភាពសម្រាប់មនុស្សជំនាន់ក្រោយ»។    

លោក Harry Schimmel នាយកប្រតិបត្តិ ឌឹហឺស្ស ធីអិមអេច មានប្រសាសន៍បន្ថែមថា ៖

«យើងខ្ញុំពិតជាមានសេចក្តីសោមនស្សរីករាយប្រកាសអំពីកិច្ចព្រមព្រៀងទិញភាគហ៊ុននេះ។ ការទិញយកនេះផ្ដល់ឱ្យយើងខ្ញុំនូវឱកាសដើម្បីបន្តពង្រឹងកេរ្តិ៍ឈ្មោះរបស់យើងនៅក្នុងប្រទេសកម្ពុជា។ ចាប់តាំងពីការមានវត្តមានរបស់យើងនៅកម្ពុជាមក ក្រុមហ៊ុន ឌឹហឺស្ស ធីអិមអេច បានកសាងទំនាក់ទំនងដ៏រឹងមាំជាមួយកសិករចិញ្ចឹមសត្វ និងវារីវប្បករកម្ពុជាតាមរយៈការផ្គត់ផ្គង់ចំណីសត្វ ពូជសត្វ និងជំនួយបច្ចេកទេសដែលមានគុណភាពល្អបំផុត។ តាមរយៈការទិញយកក្រុមហ៊ុន ស៊ីជេ ជេលជីដាង ហ្វីដ (ខេមបូឌា) រួមជាមួយនឹងជំនាញ និងយុទ្ធសាស្ត្ររបស់យើងក្នុងការអភិវឌ្ឍន៍កសិករចិញ្ចឹមសត្វឯករាជ្យនៅកម្ពុជា យើងនឹងអាចបម្រើដល់តម្រូវការកសិករបានកាន់តែប្រសើរឡើង និងរួមចំណែកជាមួយពួកគាត់ទៅរកខ្សែសង្វាក់ផ្គត់ផ្គង់ក្នុងស្រុកដែលកាន់តែរឹងមាំ»។

ថ្លែងក្នុងឱកាសនេះ លោក ចាន់ គឹមរិទ្ធី ដែលជាភាគទុនិកក្រុមហ៊ុន ឌឹហឺស្ស ធីអិមអេច មានប្រសាសន៍ថា៖

«យុទ្ធសាស្ត្រទិញយកនេះ ជាភស្តុតាងនៃការប្តេជ្ញារយៈពេលវែងរបស់ក្រុមហ៊ុន ឌឹហឺស្ស ធីអិមអេច ក្នុងការគាំទ្រកសិករឯករាជ្យយើងនៅកម្ពុជា។ ចក្ខុវិស័យរបស់យើងស្របជាមួយរាជរដ្ឋាភិបាល យុទ្ធសាស្តបញ្ចកោណ ដំណាក់កាលទី១ គឺកសាងមូលដ្ឋានដើម្បីអភិវឌ្ឍឱ្យសម្រេចចក្ខុវិស័យកម្ពុជាឆ្នាំ២០២៥។ ក្នុងនាមជាសហគ្រិនម្នាក់ ខ្ញុំមានសុទិដ្ឋិនិយមខ្ពស់លើចក្ខុវិស័យជាតិនេះ និងជឿជាក់លើសក្ដានុពលនៃវិស័យកសិកម្មរបស់ប្រទេសយើង ដែលកំពុងមានការលូតលាស់គួរឱ្យកត់សំគាល់។ ខ្ញុំមានមោទនភាពយ៉ាងខ្លាំងដែលអាចចូលរួមចំណែកក្នុងបេសកកម្មដ៏មានអត្ថន័យនេះ ដោយធានានូវការផ្គត់ផ្គង់ផលិតផលអាហារចាំបាច់ជាមូលដ្ឋានជូនប្រជាពលរដ្ឋរួមជាតិ និងរួមសហការជាមួយរាជរដ្ឋាភិបាលក្នុងការស្ថាបនាប្រទេសជាតិឱ្យកាន់តែរឹងមាំ និងមានភាពធន់។ ឈរលើស្មារតី ‘ខ្មែរធ្វើបាន’ ខ្ញុំសូមឲ្យឃ្លានេះបន្តជាចក្ខុវិស័យ និងជាកម្លាំងចិត្តដ៏រឹងមាំនៃយើងក្នុងការកសាងអនាគតដ៏រុងរឿងសម្រាប់ប្រទេសកម្ពុជា។ រួមគ្នាខ្មែរអាចធ្វើបាន! »

សូមជម្រាបថា៖ ការរង់ចាំការអនុម័តបទប្បញ្ញត្តិ ប្រតិបត្តិការនេះត្រូវបានរំពឹងថា នឹងបញ្ចប់នៅក្នុងឆមាសដំបូងនៃឆ្នាំ២០២៦៕

អំពីក្រុមហ៊ុន DE HEUS ANIMAL NUTRITION (ឌឹហឺស្ស)

ក្រុមហ៊ុន De Heus Animal Nutrition ដែលត្រូវបានបង្កើតឡើងក្នុងឆ្នាំ១៩១១ ហើយនៅតែគ្រប់គ្រង និងដឹកនាំដោយគ្រួសារ De Heus ហើយបានក្លាយជាដៃគូដែលអាចទុកចិត្តបានក្នុងវិស័យអាហារូបត្ថម្ភសត្វអស់រយៈពេលបួនជំនាន់មកហើយ។ ក្នុងរយៈពេលជាច្រើនឆ្នាំ កន្លងមក ក្រុមហ៊ុនបានរីកចម្រើនក្លាយជាក្រុមហ៊ុនអាហារូបត្ថម្ភសត្វឈានមុខគេមួយក្នុងពិភពលោក ដែលមានប្រតិបត្តិការនៅក្នុងជាង ២០ ប្រទេស រោងចក្រផលិតជាង ៩០ កន្លែងនៅទូទាំងទ្វីបអឺរ៉ុប អាស៊ី អាហ្វ្រិក និងអាមេរិកខាងត្បូង និងនាំចេញទៅកាន់ជាង ៧០ ប្រទេស។ ជាមួយនឹងបុគ្គលិកជាង ១០,០០០ នាក់នៅទូទាំងពិភពលោក ក្រុមហ៊ុន ឌឹហឺស្ស គាំទ្រដល់កសិករចិញ្ចឹមសត្វ និងវារីវប្បកររាប់ពាន់នាក់ ដែលជាកសិករចិញ្ចឹមសត្វយកសាច់ ទឹកដោះ ស៊ុត និងត្រី ដោយការផ្គត់ចំណីប្រកបដោយគុណភាពខ្ពស់ ជំនាញអាហារូបត្ថម្ភ និងការគាំទ្រកសិដ្ឋានដែលស្របតាមតម្រូវការជាក់ស្តែង។ ទីស្នាក់ការកណ្តាលរបស់ក្រុមហ៊ុនមានទីតាំងនៅក្រុងEde ប្រទេសហូឡង់។

បេសកកម្មរបស់យើងគឺ “Nourishing Future Generations” (ជ្រោមជ្រែងមនុស្សជំនាន់ក្រោយ) ដែលជំរុញរាល់សកម្មភាពទាំងអស់ដែលយើងធ្វើ។ យើងប្ដេជ្ញាចិត្តក្នុងការរួមចំណែកដល់លទ្ធភាពទទួលបាននូវអាហារដែលមានសុវត្ថិភាព តម្លៃសមរម្យ ជីវជាតិគ្រប់គ្រាន់ និងចីរភាពសម្រាប់ចំនួនប្រជាជនពិភពលោកដែលកំពុងកើនឡើង។

យើងខិតខំជារៀងរាល់ថ្ងៃដើម្បីសម្រេចបាននូវការបំប្លែងចំណីទៅជាសាច់សត្វឱ្យបានអត្រាខ្ពស់បំផុត។ ទាំងអស់នេះគឺមានគោលបំណងតែមួយគត់ គឺដើម្បីបង្កើនប្រសិទ្ធភាពអាជីវកម្មសម្រាប់អតិថិជនរបស់យើង ដែលជាកសិករចិញ្ចឹមសត្វសាច់ ទឹកដោះ ស៊ុត និងត្រី។ យើងមិនត្រឹមតែផ្ដល់ផលិតផលដែលមានគុណភាពខ្ពស់ប៉ុណ្ណោះទេ ប៉ុន្តែក៏ផ្ដល់សេវាកម្ម និងចំណេះដឹងស៊ីជម្រៅអំពីចំណីសត្វ វិធីសាស្ត្រចិញ្ចឹមសត្វ និងវិទ្យាសាស្ត្រសត្វផងដែរ ដែលតាមរយៈនេះអាចផ្ដល់ប្រសិទ្ធភាព និងវឌ្ឍនភាពបច្ចេកវិទ្យាដល់កសិករ។ ក្នុងន័យនេះ ក្រុមហ៊ុន ឌឹហឺស្ស អាចបង្កើតភាពលេចធ្លោ និងរួមចំណែកយ៉ាងសកម្មដល់ការជម្រុញវិស័យចិញ្ចឹមសត្វ និងវារីវប្បកម្មក្នុងស្រុកមានលក្ខណៈវិជ្ជាជីវៈកាន់តែប្រសើរ។

1. ឌឹហឺស្ស ធីអិមអេច កម្ពុជា (DE HEUS TMH CAMBODIA)

ក្រុមហ៊ុន ឌឹហឺស្ស មានវត្តមាននៅក្នុងប្រទេសកម្ពុជាតាំងពីឆ្នាំ២០១១ ហើយចាប់តាំងពីឆ្នាំ២០២០ មកតាមរយៈក្រុមហ៊ុនបុត្រសម្ព័ន្ធបណ្ដាក់ទុនរួមគ្នា ក៏បានក្លាយខ្លួនទៅ ឌឹហឺស្ស ធីអិមអេច។ ក្រុមហ៊ុន ឌឹហឺស្ស ធីអិមអេច មានផ្គត់ផ្គង់ចំណីសម្រេច និងមេចំណី ដែលមានគុណភាពខ្ពស់ ដោយផ្ដល់ដំណោះស្រាយគ្រប់ជ្រុងជ្រោយលើអាហារូបត្ថម្ភសត្វ ការគាំទ្រផ្នែកបច្ចេកទេស និងកម្មវិធីគ្រប់គ្រងកសិដ្ឋាន។ តាមរយៈការធ្វើការយ៉ាងជិតស្និទ្ធជាមួយកសិករ ក្រុមហ៊ុន ឌឹហឺស្ស ធីអិមអេច ធានាបាននូវសុខភាពសត្វ និងផលិតភាពល្អបំផុតក្នុងការចិញ្ចឹមបក្សី ជ្រូក សត្វទំពារអៀង និងវារីវប្បកម្ម—និងចូលរួមចំណែកដល់ភាពជោគជ័យ និងការអភិវឌ្ឍន៍វិស័យចិញ្ចឹមសត្វ និងវារីវប្បកម្មឯករាជ្យនៅក្នុងប្រទេសកម្ពុជា។