ក្នុងការដាំដំណាំ កត្តាចម្បងមួយដែលជួយឱ្យទិន្នផលកសិកម្មទទួលបានទិន្នផលខ្ពស់គឺការជ្រើសរើសពូជ ហើយក្នុងនោះផងដែរ ប្រជាកសិករក៏គួរយល់ដឹងពីវិធីបំបែកពូជរុក្ខជាតិសំខាន់ៗមួយចំនួន ដើម្បីទទួលបានពូជដំណាំដែលរឹងមាំ ងាយស្រួលដាំ ឆាប់បានផល និងទទួលបានទិន្នផលកាន់តែច្រើន។

ដើម្បីបំបែកពូជរុក្ខជាតិ អ្នកជំនាញកសិកម្មបានណែនាំនូវវិធីមួយចំនួនដូចជា ការសាក ការភ្ជាប់ភ្នែក ការតមែក ការភ្ជាប់មែក និងការភ្ជាប់ដើមជាដើម។ ចំពោះការសាក ជាវិធីមួយដែលគេធ្វើឱ្យមែករុក្ខជាតិកើតឫសក្នុងខណៈដែលនៅជាប់នឹងដើមមេ លុះពេលមែកចេញឫសល្អហើយទើបគេកាត់ទៅផ្សាំមុនដាំ ឬយកទៅដាំបានតែម្ដង។ វិធីសាកមានច្រើនរបៀប តែវិធីដែលគេនិយមប្រើគឺ ការសាកអាកាស (Air Layering)។ 

ក្នុងការសាកអាកាស កសិករអង្កន់បរិវេណក្រោមថ្នាំងរកុ្ខជាតិ ហើយយកសំបកចេញព្រមទាំងយកសរសៃនាំចេញ។ បន្ទាប់មកដីមករុំកន្លែងដែលចៀរសំបកចេញ ដោយមានប្រើអរម៉ូនលាយជាមួយដីសម្រាប់ជំនួយដល់ការចេញឫសត្រង់កន្លែងនោះ ទើបយកស្រកីដូងដែលបានត្រាំទឹក ២-៣ថ្ងៃមកហ៊ុមពីលើដីហើយចងឱ្យណែន បន្ទាប់មកហ៊ុមប្លាស្ទិកពីលើមួយជាន់ទៀតដើម្បីរក្សាសំណើម។

ទីពីរគឺការភ្ជាប់ភ្នែក ជាវិធីបំបែកពូជរុក្ខជាតិដែលនាំយកផែនភ្នែកពីមែកពូជល្អ ទៅភ្ជាប់ជាមួយដើមទម្រ ដើម្បីឱ្យបានពូជតាមតម្រូវការ ហើយរីកធំធាត់ជារុក្ខជាតិដើមជាមួយគ្នាបាន។ ដើមទម្រត្រូវមានលក្ខណៈរឹងមាំ ធន់នឹងជំងឺ ធន់នឹងសត្វល្អិតក៏ដូចជាស្ថានភាពប្រែប្រួលរបស់បរិយាកាសផងដែរ។

ក្នុងការភ្ជាប់ភ្នែក អ្នកដាំត្រូវឆូតសំបកដើមទម្រជាអក្សរ T ឱ្យមានប្រវែងពីរធ្នាក់ដាំរួចឆូតកាត់ទទឹងជាអក្សរ T ហើយបង្ហើបសំបកចេញសម្រាប់នាំយកភ្នែកពីដើមពូជល្អមកប្រើ។ ចំណែកភ្នែករបស់ដើមពូជត្រូវចិតយកមកជាមួយនឹងភផ្ទាំងភ្នែកជាបន្ទះវែង យកមកឆ្កឹះយកសាច់ឈើត្រង់ភ្នែកចេញ ហើយកាត់ឱ្យស៊ីជាមួយនឹងកន្លែងដែលបានចៀរទុកនៅដើមទម្រ។ បន្ទាប់មកយកផ្ទាំងភ្នែកនោះមកស៊កត្រង់កន្លែងដែលយើងបង្ហើប ក្នុងរយៈពេលខ្លីបំផុតព្រោះវាអាចបង្កឱ្យស្ងួតពិបាកក្នុងការភ្ជាប់។ បន្ទាប់ពីស៊កហើយត្រូវរុំឱ្យណែនពីក្រោមឡើងលើដោយទុកចន្លោះភ្នែកលៀនចេញ ងាយស្រួលឱ្យមែកដុះពន្លក និងមែកនៅពេលអនាគត។

ម៉្យាងទៀត គឺការតមែក ជាការនាំយកត្រួយរបស់ដើមដែលមានពូជល្អ មកដាក់លើដើមទម្រដែលមានសុខភាពល្អ ហើយការតមែកក៏មានដំណើរការប្រហាក់ប្រហែលនឹងការភ្ជាប់ភ្នែកដែរ ដោយគេប្រើត្រួយរបស់ពូជល្អទៅភ្ជាប់ជាមួយដើមទម្រ។ 

ចំណែកការភ្ជាប់ដើម គឺការប្រើដើមពីការបណ្ដុះដែលមានឫសល្អ រឹងមាំ មកភ្ជាប់ជាមួយនឹងត្រួយពូជល្អ ពិសេសគេនិយមធ្វើជាមួយដើមឈើហូបផ្លែ ដូចជាស្វាយ ខ្នុរ ទុរេន ជាដើម។ ក្នុងការភ្ជាប់ដើម គេត្រូវត្រៀមដើមដែលល្អ ដែលមានអាយុប្រមាណ ៤៥ថ្ងៃឡើងទៅ បន្ទាប់មកកាត់ដើមនេះទុកប្រវែងប្រមាណ ៤ធ្នាប់ពីគល់ ដោយចិតបញ្ឆិតសម្រាប់ដាក់ជាមួយដើមពូជល្អ។

ក្នុងការភ្ជាប់ គេត្រូវដាក់ដើមដែលបានកាត់រួចនោះមលភ្ជាប់ជាមួយមែកឱ្យណែន ទើបប្រើកាំបិតមុតចៀរមុខវាឱ្យស្មើ និងមានទំហំប៉ុនគ្នាជាមួយមុខកាត់របស់ដើមមួយទៀត។ យកមុខកាត់ទាំងពីមកចងផ្អិបគ្នាឱ្យណែន ហើយរុំប្លាស្ទិកពីក្រោមឡើងលើ ធ្វើយ៉ាងណាឱ្យសាច់ទាំងពីរស៊ីគ្នា ហើយអាចយកទៅដាំបានដោយកាត់ដើមធំចេញជាការស្រេច។

តាមរយៈបច្ចេកទេសទាំងនេះ កសិករអាចអនុវត្តបានក្នុងការបំបែកពូជរុក្ខជាតិឱ្យកាន់តែមានប្រសិទ្ធភាព អាចចំណេញពេលដាំដំណាំដោយប្រើរយៈពេលកាន់តែខ្លី និងទទួលបានទិន្នផលកាន់តែខ្ពស់ថែមទៀតផង៕