ភ្នំពេញ ៖ នាឱកាសបុណ្យចូលឆ្នាំប្រពៃណីចិនខាងមុខនេះ ជាពេលវេលាមួយដែលបងប្អូនសាច់ញាតិ ដែលជាប់ខ្សែស្រឡាយចិន ជួបជុំគ្នា ហើយក៏ជាឱកាសមាសមួយសម្រាប់ទីផ្សារសាច់មាន់ស្រែ ដែលអ្នកបរិភោគតែងតែនិយមទទួលទានក្នុងគ្រួសារ។
ក្នុងនោះ មាន់ស្រស់ធម្មជាតិប៉ាម៉ាក់ ដែលជាយីហោសាច់មាន់មួយរបស់កសិដ្ឋាន ៣ភីអិលអ៊ីហ្វាម (3PLE Farm) នឹងរំពឹងទុកថា តម្រូវការមាន់ស្រែនឹងមានការកើនឡើងខ្ពស់ នាឱកាសបុណ្យចូលឆ្នាំប្រពៃណីចិន ពិសេសគឺថ្ងៃសែនផ្ទាល់តែម្ដង។
លោក ឡេង វណ្ណរ៉េត អ្នកគ្រប់គ្រងផ្នែកលក់ និងទីផ្សាររបស់កសិដ្ឋានខាងលើ បានមានប្រសាសន៍ថា ៖
“សម្រាប់ត្រៀមចូលឆ្នាំចិននេះ មាន់ស្រុកមានការលក់កើនឡើង ដែលគិតដល់ថ្ងៃសែនយើងរំពឹងទុកថាយើងអាចលក់បានក្នុងមួយថ្ងៃ ៦ ម៉ឺនក្បាល”
លោកបន្តថា មាន់ស្រែគឺមានតម្លៃ ១ ម៉ឺនរៀលក្នុង ១ គីឡូក្រាមចំពោះមាន់រស់ ចំណែកមាន់ដែលបានសម្អាតបោចរោមហើយអាចមានតម្លៃចន្លោះ ១៨០០០-២០០០០រៀល ហើយអតិថិជនភាគច្រើនគឺជាបងប្អូនតាមផ្ទះ ដែលនិយមទទួលទានមាន់ស្រែ អ្នកបោះដុំ និងតាមអាហារដ្ឋាននានា។
លោកបន្ថែមដែរថា ក្រៅពីមាន់ស្រែ កសិដ្ឋានរបស់លោកក៏មានជាប្រភេទមាន់សាច់ ឬមាន់ស ដែលគេនិយមយកទៅធ្វើជាមាន់បំពង តែមានការលក់ធ្លាក់ចុះបន្តិចនារដូវនេះ ដោយសាររដូវបុណ្យទាន ឬសម្រាប់សែនគេនិយមមាន់ស្រែជាង។ ក្រៅពីនេះ ៣ភីអិលអ៊ី ក៏មានលក់ជាសាច់មាន់ប្រឡាក់ស្រាប់លក់ក្នុងតម្លៃ ១.៧ ដុល្លារសម្រាប់សាច់មាន់ ៣៥០ក្រាម ដែលមានភាពងាយស្រួលគ្រាន់តែហែកកញ្ចប់អាចចៀនបានតែម្ដង។
ពាក់ព័ន្ធនឹងការចិញ្ចឹមវិញ លោក វណ្ណរ៉េត បានរៀបរាប់ទៀតថា ប្រភេទមាន់ស្រែកសិករចិញ្ចឹមរយៈពេល ៥៥-៦០ថ្ងៃ ឯមាន់សាច់វិញ គេប្រើរយៈចិញ្ចឹមពី៣៨-៤២ថ្ងៃ និងអាចមានទម្ងន់ពី ២.៤ ទៅ ៣ គីឡូក្រាម។ ចំណែកសាច់មាន់ប្រឡាក់ គេផលិតម្ដងប្រមាណ ១ ទៅ ២តោន រួចវិចខ្ចប់ដើម្បីលក់ក្នុងទីផ្សារ។
យ៉ាងណាក៏ដោយ អ្នកគ្រប់គ្រងផ្នែកលក់ខាងលើបានរំឭកដែរថា ត្បិតរដូវនេះទីផ្សារមាន់ស្រែមានការកើនឡើង តែអនាគតទៅទីផ្សារមាន់សាច់គឺមានតម្រូវការខ្ពស់ជាង ដោយសារមាន់សាច់មានសាច់ច្រើន មានកាពេញនិយមច្រើនពីហាងបរទេសនានា ដូចជាហាងមាន់បំពង មាន់បំពងតាមតូបតូចៗ និងតាមម៉ាត ឬផ្សារទំនើបនានាក៏ត្រូវការមាន់ប្រភេទនេះដែរ៕