ក្រូចឆ្មារលឿង ឬ Mayer Lemon ជាប្រភេទក្រូចម្យ៉ាងដែលមានរសជាតិជូរ ក្លិនឈ្ងុយ សម្បកពណ៌លឿងស្រស់ មានទំហំផ្លែធំជាងក្រូចឆ្មារធម្មតា ហើយក៏ជាប្រភេទក្រូចដែលមានទីផ្សារល្អ លក់បានតម្លៃថ្លៃ ដែលអាចជាជម្រើសមួយសម្រាប់កសិករពិចារណា និងសិក្សាពីការដាំដុះ។  

បើតាមអ្នកនាង ឆេង ស្រីពេញ ជាអ្នកគ្រប់គ្រងទូទៅនៅកសិដ្ឋាន Baby Bird Farm ស្ថិតនៅខេត្តកែប ដែលមានដាំដុះក្រូចឆ្មារលឿងជាង ៩០០ដើម និងកំពុងប្រមូលផលលក់ឱ្យឈ្មួញជាប្រចាំបានចែករំលែកឱ្យដឹងថា ប្រភេទក្រូចឆ្មារលឿងនេះត្រូវការយកចិត្តទុកដាក់ក្នុងការដាំដុះ និងថែទាំមិនខុសពីដំណាំដទៃទៀតនោះទេ ខណៈដែលក្រូចប្រភេទនេះឱ្យផលបានច្រើន ហើយថែទាំងមានទីផ្សារល្អទៀតផង។

អ្នកគ្រប់គ្រងរូបនេះបញ្ជាក់ថា៖

«សម្រាប់ប្រភេទក្រូចឆ្មារលឿងនេះ វាមានរសជាតិប្លែក ក្លិនឈ្ងុយ ចេញផ្លែធំៗជាងក្រូចឆ្មារធម្មតា ឱ្យតែយើងដាក់ទឹកបានគ្រប់គ្រាន់វាចេញផ្កា ចេញផ្លែខួបប្រាំងខួបវស្សា ចំណែកឯទីផ្សារវិញ​ យើងអាចលក់បានទាំងបោះដុំ និងលក់រាយ ដោយបោះទៅឱ្យម៉ាតនៅភ្នំពេញ តម្លៃ ១២០០០រៀល ហើយសម្រាប់ការលក់រាយក្នុងតម្លៃ ២ម៉ឺនរៀល ក្នុងមួយគីឡូក្រាម»។

អ្ន​កនាងបន្តថា ចំពោះទិន្នផលក្រូចឆ្មារលឿងនេះដែរ គឺអាចទទួលបានផលច្រើនដូចក្រូឆ្មារធម្មតាដែរ ជាពិសេស ដោយសារតែវាមានទំហំផ្លែធំៗ ជាមធ្យម ១ដើម អាចប្រមូលបាន ២០-៣០គីឡូក្រាមក្នុងមួយវគ្គ ប៉ុន្តែ ទាមទារឱ្យយើងតាក់តែងមែក ៣-៤ដង ក្នុងមួយឆ្នាំ។ ទន្ទឹមគ្នានេះដែរ ការដាំក្រូចឆ្មារលឿងក៏ត្រូវការមើលថែ និងដាក់ជីធម្មជាតិ ៣-៤ខែម្ដង ដើម្បីបំប៉នដើម ពិសេសការផ្គត់ផ្គង់ទឹកឱ្យបានគ្រប់គ្រាន់ទើបដំណាំអាចឱ្យផលល្អ។ ចំណែកជំងឺយាយីវិញ ក្រូចប្រភេទនេះអាចមានជំងឺចេញជ័រ ដែលតម្រូវឱ្យកសិករស្រាវជ្រាវបន្ថែម រកទិញថ្នាំបាញ់ការពារ និងថ្នាំបាញ់សត្វល្អិតផ្សេងៗទៀតនៅពេលចេញផ្លែព្រោះវាមានក្លិនឈ្ងុយងាយទាក់ទាញសត្វល្អិតបំផុត។

ជាមួយនឹងការបង្ហើបប្រាប់ពីបទពិសោធផ្ទាល់ខ្លួនខាងលើនេះ អ្នកនាង ឆេង ស្រីពេញ បានផ្តល់ជាយោបល់ថា សម្រាប់កសិករដែលមានចំណាប់អារម្មណ៍ចង់ដាំគឺអាចសាកល្បងដាំបាន ដោយផ្តើមពីចំនួនតិចតួច ឬទ្រង់ទ្រាយតូចឡើងទៅ ហើយអ្វីដែលត្រូវយកចិត្តទុដាក់គឺទីតាំងសម្រាប់ដាំដុះ ចៀសវាងដាំនៅលើដីទំនាប ឆាប់ជាំទឹក ព្រោះក្រូចប្រភេទនេះមានឫសរាក់។ ដោយឡែក ចំពោះពូជក្រូចឆ្មារលឿងនេះ កសិករអាចរកបានពីកន្លែងលក់កូនដំណាំ ឬកូនឈើ (ពូជក្រូចនាំចូល) ឬក៏អាចទិញពីកសិដ្ឋានខាងលើនេះដោយផ្ទាល់ក៏បាន ៕