សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្ថានទូតឥណ្ឌាប្រចាំកម្ពុជា កាលពីថ្ងៃដើមសប្ដាហ៍កន្លងទៅនេះ បានរៀបចំទិវាសហប្រតិបត្តិការបច្ចេកទេស និងសេដ្ឋកិច្ចឥណ្ឌា (ITEC) ជាមួយនឹងការអបអរសាទរដែលរំលេចតួនាទីនៃកិច្ចសហប្រតិបត្តិការក្នុងការជំរុញកិច្ចអភិវឌ្ឍធនធានមនុស្ស ពង្រឹងចំណេះដឹង និងកាលានុវត្តភាពថ្មីៗនៅកម្ពុជា។ ជាការកត់សម្គាល់ ក្នុងរយៈពេលជាង៤ទសវត្សរ៍កន្លងមកនេះ ក្រោមកិច្ចសហប្រតិបត្តិការបច្ចេកទេស និងសេដ្ឋកិច្ចឥណ្ឌា (ITEC) បានជួយពង្រឹងចំណេះដឹង រឹតចំណងមិត្តភាព និងកាលានុវត្តភាពសម្រាប់មន្ត្រីកម្ពុជាឱ្យទទួលបានជំនាញបន្ថែម ដែលរួមចំណែកលើកកម្ពស់ដល់ការអភិវឌ្ឍជាតិ។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា តាមរយៈការបំពាក់បំប៉នមន្ត្រីសាធារណៈជាមួយនឹងទស្សនវិស័យ និងជំនាញអនុវត្តជាសកល កម្មវិធីនេះពង្រឹងសមត្ថភាពរបស់មន្ត្រីក្នុងការផ្តល់សេវាសាធារណៈដែលមានគុណភាព គ្រប់គ្រងបរិវត្តកម្មសេដ្ឋកិច្ច និងឆ្លើយតបទៅនឹងបញ្ហាប្រឈមដែលកំពុងកើតមាន រាប់ចាប់តាំងពីការកសាងភាពធន់ទៅនឹងការប្រែប្រួលអាកាសធាតុ រហូតដល់អភិបាលកិច្ចឌីជីថល។
សូមបញ្ជាក់ដែរថា ថ្មីៗនេះ មន្ត្រីជាង២០រូបនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចូលរួមកម្មវិធីបណ្តុះបណ្តាលផ្នែកគោលនយោបាយ និងអភិបាលកិច្ចនៅប្រទេសឥណ្ឌា ហើយកិច្ចសហប្រតិបត្តិការនេះក៏ផ្តល់ការបណ្តុះបណ្តាលដល់មន្ត្រីកម្ពុជាប្រមាណ ៣០០ កន្លែងជារៀងរាល់ឆ្នាំ។
ឯកឧត្តមរដ្ឋមន្ត្រីបានលើកឡើងពីផលជាក់ស្តែងនៃកិច្ចសហប្រតិបត្តិការ ដូចជាគម្រោង “លើកកម្ពស់វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកំពត” នៅឆ្នាំ២០២២ និងគម្រោងកសាងបណ្ណាល័យវិទ្យាសាស្ត្រថ្មីមួយនៅក្នុងខេត្តបាត់ដំបង ដើម្បីជំរុញការស្រឡាញ់ផ្នែកវិទ្យាសាស្ត្រក្នុងចំណោមសិស្សានុសិស្ស។
ឯកឧត្តមក៏បានលើកឡើងពីគំនិតផ្តួចផ្តើមថ្នាក់តំបន់ រួមទាំងការធ្វើជាម្ចាស់ផ្ទះរបស់កម្ពុជាក្នុងការរៀបចំវេទិកាឫសគល់នវានុវត្តន៍អាស៊ាន-ឥណ្ឌា នៅឆ្នាំ២០២២ និងកិច្ចប្រជុំអ្នកវិទ្យាសាស្ត្រស្ត្រីអាស៊ាន-ឥណ្ឌានៅក្នុងឆ្នាំ២០២៥នេះ។
កិច្ចសហប្រតិបត្តិការបច្ចេកទេស និងសេដ្ឋកិច្ចឥណ្ឌា ត្រូវបានបង្កើតឡើងក្នុងឆ្នាំ១៩៦៤ ជាកម្មវិធីកសាងសមត្ថភាពស្នូលរបស់រដ្ឋាភិបាលឥណ្ឌា។ កម្មវិធីនេះផ្តល់ការបណ្តុះបណ្តាលដោយរ៉ាប់រងលើចំណាយទាំងអស់ ការផ្លាស់ប្តូរអ្នកជំនាញ និងកិច្ចសហការអនុវត្តគម្រោងសម្រាប់ប្រទេសកំពុងអភិវឌ្ឍន៍។ សម្រាប់កម្ពុជា កម្មវិធីនេះបានផ្តល់ការបណ្តុះបណ្តាលដោយផ្តោតលើរដ្ឋបាលសាធារណៈ ធនាគារ ហិរញ្ញវត្ថុ និងបរិវត្តកម្មឌីជីថល ព្រមទាំងពង្រឹងទំនាក់ទំនងរវាងប្រជាជន និងប្រជាជននៃប្រទេសទាំងពីរ។
ឯកឧត្តម ហែម វណ្ណឌី បានសង្កត់ធ្ងន់ថា៖
«ឥណ្ឌានៅតែជាដៃគូដែលគួរឱ្យទុកចិត្ត និងមានការប្តេជ្ញាចិត្តខ្ពស់ក្នុងដំណើររបស់កម្ពុជាឆ្ពោះទៅសេដ្ឋកិច្ចដែលមានបច្ចេកវិទ្យាជឿនលឿន និងផ្អែកលើចំណេះដឹងជាក់លាក់»។
Account
Security
Favourite Content