វ៉ានីឡា ជារុក្ខជាតិដ៏មានតម្លៃមួយនៅលើពិភពលោក ដោយវាឈរនៅលំដាប់ទី២ ជារុក្ខជាតិគ្រឿង​ទេស​ដែលថ្លៃបំផុតបន្ទាប់ពីសសៃផ្កា Saffron។ វ៉ានីឡា មានដើមកំណើតមក​ពី​ប្រទេសម៉ិកស៊ីកូ (Mexico) ប៉ុន្តែបច្ចុប្បន្នគឺមានការដាំដុះច្រើនជាងគេនៅក្នុងប្រទេសម៉ាដាកាស្កា ដែលស្ថិតនៅប៉ែកអាហ្វ្រីកខាងត្បូង។

វ៉ានីឡា ជាគ្រឿងទេសដែលត្រូវបានគេប្រើប្រាស់នៅក្នុងម្ហូបអាហារ ភេសជ្ជៈ និងគ្រឿងសំអាង ម៉្លោះហើយតម្រូវការរបស់វាគឺមានច្រើន។ ដោយហេតុថា ដំណាំប្រភេទនេះលំបាកក្នុងការដាំ ពិបាក​ថែទាំ ត្រូវការល័ក្ខខ័ណ្ឌអាកាសធាតុសមស្រប ព្រមទាំងទាមទារកម្លាំងពលកម្មច្រើន ទើបបាន​ជា​តម្លៃរបស់វាខ្ពស់ខុសពីដំណាំគ្រឿងទេសផ្សេងៗទៀត។ ដំណាំ វ៉ានីឡា ត្រូវជាមួយនឹងល័ក្ខខ័ណ្ឌអាកាសធាតុត្រូពិក ទាមទារពន្លឺ និងសំណើមខ្ពស់ តែមិនត្រូវ​ការកម្ដៅខ្លាំង។ ចំណែកឯដំណើរការដាំ និងថែទាំទៀតសោត ក៏ត្រូវការកម្លាំងពលកម្មច្រើនដែរ ថ្វីត្បិតថាដំណាំនេះទាមទារឱ្យធ្វើដោយដៃ។ វ៉ានីឡា ក្នុងពេលបច្ចុប្បន្នច្រើនតែមានដាំនៅតាមប្រទេសកំពុងអភិវឌ្ឍន៍ ដែលមានតម្លៃកម្លាំងពលកម្មទាប ព្រោះបើពុំនោះទេគេនឹងត្រូវចំណាយច្រើនលើការជួលកម្មករ ហើយពិបាកនឹងរកប្រាក់​ចំណេញ។ 

បើតាមការបញ្ជាក់របស់លោក ចន្ធី សុមេត្តា ប្រធានការិយាល័យជីវសុវត្ថិភាពនៃនាយកដ្ឋានជីវចម្រុះរបស់ក្រសួងបរិស្ថានបានឱ្យដឹងថា ដំណាំនេះត្រូវការដៃមនុស្សសម្រាប់ជួយភ្ជាប់វា ដើម្បីឱ្យវាមានដំណើរលម្អង និងអាចបញ្ចេញជាផ្កាបាន។ សម្រាប់ប្រទេសម៉ិកស៊ីកូ ការដាំដំណាំវ៉ានីឡាមានអំណោយផលច្រើនដោយហេតុថាប្រទេសនេះសម្បូរឃ្មុំដែលអាចជួយផ្សំលម្អងវ៉ានីឡាតាមធម្មជាតិបាន ហើយនេះក៏ជាមូលហេតុដែលវ៉ានីឡាដែលដាំដុះលើប្រទេស ម៉ិកស៊ីកូមានរសជាតិពិសេសជាងគេ។ ក្រៅតែពីចំណុចខាងលើនេះទៅ ដំណាំវ៉ានីឡាក៏ត្រូវការពេលយូរផងដែរទម្រាំអាចចេញផ្កាបាន ដែលជាទូទៅគេត្រូវរង់ចាំ ២ ទៅ ៣ឆ្នាំ ទើបអាចប្រមូលផលបាន។ រីឯការប្រមូលទៀតសោត ក៏មានលក្ខណៈស្មុគស្មាញទៅទៀត ដោយវាទាមទារបច្ចេកទេសខ្ពស់ក្នុងការធ្វើ។

បើតាមលោក ចន្ធី សុមេត្តា គេត្រូវទម្លាក់ទងវ៉ានីឡាចុះពីទ្រើង​ បង្អត់ទឹកក្នុងរយៈពេលសមស្របណាមួយ ហើយធ្វើឱ្យកម្ដៅនៅក្នុងរោងដាំវ៉ានីឡាឡើងក្ដៅខុសពីធម្មតា។

អ្នកជំនាញរូបនេះបកស្រាយថា៖

“នៅពេលធ្វើបែបនេះ វ៉ានីឡាគិតថាខ្លួនឯងនឹងស្លាប់ ទើបវាខិតខំបញ្ចេញផ្កាផ្លែ ដើម្បីទ្រទ្រង់វា ហើយនៅដែលវាចេញផ្កាហើយ គឺវានឹងចេញតែពេលព្រឹកប៉ុណ្ណោះ អីចឹងហើយអ្នកថែទាំត្រូវ​ចាំមើលវារហូត។ ដោយឡែក នៅពេលដែលវ៉ានីឡាចេញជាផ្លែហើយលូតលាស់រហូតដល់ទុំ ក៏គេត្រូវបេះសម្ងួតតាមលក្ខណៈបច្ចេកទេសផងដែរ ដើម្បីអាចទទួលបានវ៉ានីឡាដែលមានទាំងគុណភាព និងរសជាតិ”

បើនិយាយអំពីទីផ្សាររបស់វ៉ានីឡាវិញ វាអាចមានតម្លៃពី ៥០០ ទៅ ៧០០ ដុល្លារក្នុងមួយគីឡូក្រាម ឯណោះ ហើយដែលបច្ចុប្បន្នក្រសួងបរិស្ថានកំពុងដាំសាកល្បងនៅក្នុងមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលេនផងដែរ។ ក្នុងការដាំសាកល្បងនេះ ក្រសួងបានរើសយកប្រភេទវ៉ានីឡាដែលជាតម្រូវការរបស់ពិភពលោកចំនួន ៣គឺ ប្រភេទតៃទី ប្រភេទម៉ាដាហ្គាស្យា និងប្រភេទប៉ុនកូណា ដែលគិតមកដល់ពេលនេះ ការដាំដុះគឺមាន​រយៈពេល២ឆ្នាំហើយ ហើយអ្នកជំនាញប៉ានស្មានថានឹងអាចបានទទួលផលនៅឆ្នាំក្រោយ៕