មណ្ឌលគីរី ៖ មន្ទីរកសិកម្ម រុក្ខាប្រមាញ់ និងនេសាទ ខេត្តមណ្ឌលគិរី​ បានលើកឡើង​ឱ្យដឹងថា ទិន្នផលគ្រាប់កាហ្វេស្រស់នៅខេត្តមណ្ឌ​លគិរី មានតម្លៃថ្លៃជាងមុន ក្រោយពីមានកិច្ចសន្យាផលិតកម្មកសិកម្ម ខណៈអ្នកដាំដុះ និងផ្ទៃដីដាំដុះកាហ្វេមានការកើនឡើងដូចគ្នា។

លោក​ សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានប្រាប់ឱ្យដឹង​នៅ​ថ្ងៃទី១៩​ ខែវិច្ឆិកា​ ឆ្នាំ២០២៣​ ថា ផលិតផលគ្រាប់កាហ្វេស្រស់ ឬ​គ្រាប់កាហ្វេឆៅចម្រុះនៅខេត្តមណ្ឌលគិរីមានការកើនឡើងជាអតិបរមា ចន្លោះ​ពី ២០០រៀល ទៅ ៣០០រៀលក្នុង១គីឡូក្រាម សម្រាប់ឆ្នាំ២០២៣នេះ ក្រោយពី​មានកិច្ចសន្យាផលិតកម្មកសិកម្ម ស្ដី​ពីការផ្គត់ផ្គង់ផលិតផលកាហ្វេស្រស់រវាងក្រុមអ្នកផលិតជាមួយក្រុមហ៊ុនប្រមូលទិញ។

លោកបានលើកឡើង​ថា ៖

«តម្លៃគ្រាប់កាហ្វេស្រស់ ឬគ្រាប់កាហ្វេឆៅ ចម្រុះមានតម្លៃចន្លោះ ១ ៣៥០ ទៅ ១ ៥០០ រៀល នៅក្នុងឆ្នាំ២០២៣ នេះ ដែលកើនឡើងពី ២០០រៀល ទៅ ៣០០រៀល ហើយរំពឹងថាតម្លៃគ្រាប់កាហ្វេស្រស់ ឬគ្រាប់កាហ្វេឆៅចម្រុះនៅតែអាចបន្តកើនដល់ចន្លោះពី ១ ៤០០ ទៅ ១ ៦០០ រៀលក្នុង ១គីឡូក្រាម សម្រាប់ឆ្នាំបន្តបន្ទាប់ទៀត»។

លោក សុង ឃាង បន្តថា កត្តាដែលធ្វើឱ្យតម្លៃគ្រាប់កាហ្វេស្រស់ ឬកាហ្វេឆៅ មានការកើន​ឡើង ដោយសារតែមានការស​ហការជាមួយគ្នារវាងមន្ទីរកសិកម្ម​ខេត្តមណ្ឌលគិរី និង​ក្រុមហ៊ុន ខូហ្វី ក្នុងរយៈពេល២ឆ្នាំដើម្បីប្រមូលទិញយកគ្រាប់កាហ្វេស្រស់​ក្នុងតម្លៃខ្ពស់នៅលើទីផ្សារ។

លោកបានប្រាប់ថា ៖

«ការរក្សាតម្លៃទីផ្សារ ផលិតផលកាហ្វេស្រស់ ឬគ្រាប់កាហ្វេឆៅ បានចូលរួមចំណែកលើកកម្ព​ស់ជីវ​ភាពរស់នៅកសិករកាន់តែប្រសើរឡើង និងមានភាពធន់ជាងមុន និងអាចពង្រឹងទៅលើការដាំដុះដើម្បីធានានូវខ្សែចង្វាក់ផ្គត់ផ្គង់ត្រឹមត្រូវតាមស្តង់ដារនិងនិរន្តរភាព»។

អ្នកស្រី មាស មករា ពលរដ្ឋ​រស់នៅភូមិម៉ាប្រយ៉ោង ឃុំភូលូក ស្រុកពេជ្រតា ខេត្តមណ្ឌលគិរី បានប្រាប់ឱ្យដឹងដែរ​ថា អ្នក​ស្រីបានចាប់យកកសិកម្មផ្នែកដាំកាហ្វេនេះអស់រយៈពេលជាង ៩ឆ្នាំមកហើយ ដើម្បីផ្គត់ផ្គង់ទីផ្សារនៅពេលបច្ចុប្បន្ន និងបានជួ​យ​លើកស្ទួយវិស័យកសិកម្មក្នុងប្រទេសបានមួយផ្នែកផងដែរ​។

អ្នកស្រីបានបន្តថា បច្ចុប្បន្ននេះ ដំណាំកាហ្វេ គឺជាប្រភេទដំណាំដែលកំពុងមានតម្រូវការខ្ពស់នៅក្នុងទីផ្សារ មិនថានៅក្នុងប្រទេស ឬក៏ក្រៅប្រទេសទេ។

អ្នកស្រីបានបញ្ជាក់ថា ៖

«គ្រាប់កាហ្វេស្រស់នាពេលបច្ចុប្បន្ននេះមានតម្លៃគួរសម ជាពិសេសក្រោយពីការសម្របសម្រួលបង្កើតឱ្យមានកិច្ចសន្យាកសិកម្ម មានក្រុមហ៊ុនចាំប្រមូលទិញ ដោយយើងមិនបារម្ភរឿងទីផ្សារឡើយ។  ប៉ុន្តែយើងត្រូវគោ​រពតាមលក្ខខណ្ឌរបស់ក្រុមហ៊ុន ដោយត្រូវប្រើជីធម្មជាតិ និងថែទាំដោយយកចិត្តទុកដាក់ទើបគ្រាប់កាហ្វេស្រស់មានគុណភាពល្អ»។

​យោងតាមការបញ្ជាក់ពីប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី គិតត្រឹម​ឆ្នាំ២០២៣ មានកសិករប្រ​មាណចំនួន ៣៦៥គ្រួសារ និងក្រុមហ៊ុនចំនួន១ ដែលមានផ្ទៃដីសរុបចំនួន ៥២៥ហិកតា បានធ្វើការដាំដុះកាហ្វេ បើទោះ​បី​ជាចំនួនគ្រួសារមានការកើនឡើងបន្តិច​បន្តួច តែមានការពង្រីកផ្ទៃដីដាំដុះច្រើន​ជាងមុន។

ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ជារឿយៗ​ក្រសួងតែងតែជំរុញឱ្យអ្នកពាក់ព័ន្ធធ្វើកិច្ចសន្យាផលិ​តកម្ម​កសិកម្ម រវាងក្រុមហ៊ុនឯកជន ជាមួយកសិករ ព្រោះកិច្ចសន្យាផលិតកម្មកសិកម្មបានដើរតួនាទីយ៉ាងសំខាន់ក្នុងការជំរុញខ្សែច្រវាក់តម្លៃផលិតកម្មកសិកម្ម ជាពិសេសពង្រឹងការទទួលខុសត្រូវ និងភាពជឿទុកចិត្តគ្នារវាងភាគីអ្នកផលិត និងភាគីអ្នកទិញ ។

បើតាមក្រសួងកសិកម្ម កំណើននៃការទទួលទានកាហ្វេនៅកម្ពុជា មានការកើនឡើងគួរឱ្យកត់សម្គាល់ ដោយក្រសួងកសិ​កម្ម បាន និងកំពុងឱ្យ​មានការពង្រីកផ្ទៃដីដាំកាហ្វេរ៉ូប៊ូស្តា និងការប្រើប្រាស់កាហ្វេនេះនៅកម្ពុជា ខណៈបច្ចុប្បន្នការដាំដុះកាហ្វេប្រ​ភេទរ៉ូប៊ូស្តានេះនៅមានតិចតួចនៅឡើយ។

ក្រសួងបានបញ្ជាក់ថា កាហ្វេប្រភេទ រ៉ូប៊ូស្តា មានភាពអំណោយផលសម្រាប់ការដាំដុះនៅកម្ពុជា ដោយអាចដាំបាននៅតំ​បន់ខ្ពស់រាបដូចជានៅមណ្ឌលគិរី ដែលអាកាសធាតុត្រជាក់ល្មម និងមានភ្លៀងច្រើន ដែលអាចឱ្យកសិករដាំដុះទទួលផលច្រើន៕ អត្ថបទ(CPA) ៖ វណ្ណ សុជាតា​