ភ្នំពេញ ៖ មនុស្សជាច្រើនតែងតែមានការរៀបចំផែនការហិរញ្ញវត្ថុ និងមានបំណងចង់សម្រេចបាននូវគោលដៅហិរញ្ញវត្ថុ ពោលគឺសេរីភាពហិរញ្ញវត្ថុផ្ទាល់តែម្តង ប៉ុន្តែមុននឹងឈានដល់ការសម្រេចបានសេរីភាព គឺរមែងជួបកត្តារារាំងមួយចំនួនដែលមិនអនុញ្ញាតឱ្យសម្រេចដល់គោលដៅ។

អ្នកជំនាញសេដ្ឋកិច្ច និងហិរញ្ញវត្ថុ លោក ង៉ែត ជូ បានលើកឡើងពី “មូលហេតុធំៗ៦” ដែលរារាំងមនុស្សជាច្រើនមិនឱ្យមានសេរីភាពហិរញ្ញវត្ថុ រួមមានដូចខាងក្រោម ៖

១) ភាពលោភលន់ ៖ មនុស្សមិនមានសមត្ថភាពអាចបំពេញភាពលោភលន់គ្មានដែនកំណត់របស់ខ្លួនបានឡើយ។ អតីតមេដឹកនាំឥណ្ឌា លោក Mohatma Gandhi លើកឡើងថា «ពិភពលោកមានធនធានគ្រប់គ្រាន់សម្រាប់បំពេញសេចក្តីត្រូវការចាំបាច់របស់មនុស្សគ្រប់រូប។ ប៉ុន្តែមិនគ្រប់គ្រាន់សម្រាប់ភាពលោភលន់របស់មនុស្សគ្រប់រូបនោះទេ»។

២) មិនស្គាល់ពីតម្រូវការផ្ទាល់ខ្លួនពិតប្រាកដ ៖ មនុស្សជាច្រើនតែងភាន់ច្រឡំការចង់បានថាជាតម្រូវការ។ ឧទាហរណ៍ មនុស្សមានតម្រូវការមធ្យោបាយធ្វើដំណើរដើម្បីទៅធ្វើការ។ មនុស្សអាចប្រើកង់ ម៉ូតូ រថយន្តក្រុង ឬរថយន្តផ្ទាល់ខ្លួនដែលមានតម្លៃសមរម្យ ដើម្បីបំពេញសេចក្តីតម្រូវការនោះ។ ប៉ុន្តែមនុស្សជាច្រើនចង់បានរថយន្តទំនើបដែលមានតម្លៃខ្ពស់រាប់ម៉ឺនរាប់សែនដុល្លា ដើម្បីបង្ហាញពីភាពទាន់សម័យ ឬបង្អួតអ្នកដទៃ។

៣) វង្វេងនឹងអបាយមុខ ៤ ប្រការ ៖ មានស្រី ញៀនស្រា ឬគ្រឿងញៀន លេងល្បែង និងសេពគប់បាបមិត្ត (មិត្តនាំមកនូវក្តីអន្តរាយ)។

៤) មិនមានចំណេះដឹងហិរញ្ញវត្ថុផ្ទាល់ខ្លួន និងគ្រួសារ ៖ កង្វះចំណេះដឹងហិរញ្ញវត្ថុ មិនចេះចាត់ចែងបំណុល និងទ្រព្យដែលរកបានដោយលំបាកឱ្យមានភាពរីកចម្រើន និរន្តភាព និងចៀសផុត ឬកាត់បន្ថយបាននូវហានិភ័យផងទាំងពួង។ ឆាប់ជឿការបោកប្រាស់ ឬការអូសទាញរបស់អ្នកដទៃដោយកង្វះការពិចារណា។

៥) មិនយល់ពីនិយមន័យនៃសេរីភាពហិរញ្ញវត្ថុ ៖ សេរីភាពហិរញ្ញវត្ថុមិនមែនទាល់តែមានទ្រព្យមហាសាលចាយតាមចិត្តចង់នោះទេ។ គឺមានទ្រព្យគ្រប់គ្រាន់អាចសងបំណុល ចាយវាយតាមតម្រូវការចាំបាច់សម្រាប់ការរស់នៅ អាចទំនុកបម្រុងការសិក្សារបស់កូនៗ ការដើរកម្សាន្ត និងថែទាំសុខភាពរបស់សមាជិកគ្រួសារ។

៦) មិនបានធ្វើផែនការហិរញ្ញវត្ថុ និងអនុវត្តសំដៅសម្រេចឱ្យបាននូវសេរីភាពហិរញ្ញវត្ថុក្នុងកាលកំណត់ជាក់លាក់ណាមួយ ៖ ការចង់បានសេរីភាពហិរញ្ញវត្ថុដោយគ្មានគោលដៅជាក់លាក់តាមកាលកំណត់ណាមួយ គ្មានផែនការសកម្មភាព និងការអនុវត្តប្រកបដោយបញ្ញា និងការអត់ធ្មត់ ការចង់បាននោះមិនអាចសម្រេចបានលទ្ធផលនោះទេ។ ឧទាហរណ៍ អ្នកមានអាយុ ៣០ ឆ្នាំ មានទ្រព្យសម្បត្តិ ១០ ម៉ឺនដុល្លា អ្នកត្រូវការទ្រព្យ ២ លានដុល្លាសម្រាប់ការរស់នៅដោយមានសេរីភាពផ្នែកហិរញ្ញវត្ថុ និងអាចបញ្ជូនកូនៗទៅរៀននៅបរទេសនៅពេលអ្នកមានអាយុ ៤៥ ឆ្នាំ។ ដូច្នេះអ្នកមានពេល ១៥ ឆ្នាំសំរាប់សន្សំប្រាក់ និងវិនិយោគ ដើម្បីបង្កើនទ្រព្យពី ១០ ម៉ឺនដុល្លាទៅ ២ លានដុល្លាដែលត្រូវមានកំណើនក្នុងអត្រាផ្គួបប្រចាំឆ្នាំ២២%។ ដើម្បីសម្រេចបានគោលដៅនេះ អ្នកត្រូវដឹងថា តើត្រូវរកប្រាក់ខែអោយបាន១ឆ្នាំប៉ុន្មាន? ចំណាយប៉ុន្មាន? វិនិយោគប៉ុន្មាន? វិនិយោគលើអ្វីខ្លះ និងរំពឹងថាចំណេញ១ឆ្នាំប៉ុន្មាន? ប្រើបំណុលបែបណា? គ្រប់គ្រងហានិភ័យបែបណា?៕