វេទិកាផ្គូរផ្គងអ្នកផលិត និងអ្នកទិញ គឺជាការបង្កើតជំនួបមួយដែលអនុញ្ញាតឱ្យអ្នកផលិតជាមួយនឹងអ្នកទិញ មានឱកាសបានជួបជជែកគ្នា ស្វែងរកដំណោះស្រាយរួមគ្នា ដើម្បីលើកកម្ពស់ផលិតផលក្នុង ស្រុកឱ្យកាន់តែប្រសើរ។
វេទិកានេះ ធ្វើឡើងនៅតាមបណ្ដាខេត្តនានា ដោយមានការចូលរួមពីម្ចាស់ផលិតផលនានា និងអតិថិជនដែលមានតម្រូវការលើផលិតផលទាំងនោះ។ ក្នុងនោះក៏មានការតាំងលក់ផលិតផលខ្មែរដែលសុទ្ធសឹងតែជាសមាជិកចលនាភូមិមួយផលិតផលមួយ។
ដោយឡែក វេទិកាផ្គូរផ្គងអ្នកទិញ-អ្នកលក់ចុងក្រោយគេបង្អស់គឺធ្វើឡើងនៅខេត្តកំពង់ធំ។ តាមរយៈវេទិកាលើកនេះ លោកបណ្ឌិត សួង ណយ អគ្គលេខាធិការងចលនាភូមិមួយ ផលិតផលមួយបានចាត់ទុកថាជាភាពជោគជ័យដ៏ត្រចះត្រចង់មួយ។
ជាភាពជោគជ័យព្រោះថា អ្នកទិញចាប់ផ្ដើមពិភាក្សាកាន់តែស៊ីជម្រៅអំពីអ្វីដែលពួកគេចង់បាន រីឯអ្នកផលិតក៏បានទទួលយក និងចែករំលែកទៅវិញអំពីទិដ្ឋភាពជាក់ស្ដែងនៃអាជីវកម្មរបស់ពួក គេ។
លោកបណ្ឌិត សួង ណយ បានមានប្រសាសន៍ថា៖
«គោលបំណងនៃការរៀបចំវេទិកាយើង គឺដើម្បីឱ្យពួកគាត់បាននិយាយគ្នាអំពីតម្រូវការរៀងខ្លួន ដើម្បីកែតម្រូវរៀងខ្លួន អីចឹងហើយគឺអត់មាន អីត្រូវបន្ទោសគ្នាទេ»។
លោកបណ្ឌិតបន្តទៀតថា៖
«បន្ទោសគ្នា ក៏មិនមែនជាដំណោះស្រាយដែរ វាមិនមានបានអីមកវិញទេ ហើយខ្ញុំក៏សប្បាយចិត្តដែលពីវេទិកាមួយ ទៅវេទិកាមួយ បងប្អូនយើងកាន់តែបើកចិត្តនិយាយជាមួយ គ្នា ហើយយល់ពីតម្រូវការគ្នាកាន់តែច្រើន»។
ពីដើមឡើយ តែងតែមានការស្ដីបន្ទោសគ្នា អ្នកទិញតែងថាអ្នកផលិតមិនបានផលិតរបស់មានគុណភាព ឬមានគុណភាព តែតម្លៃថ្លៃពេក ដូច្នេះហើយបានជាពួកគេនិយមទិញផលិតផលក្រៅស្រុក ជាង។ រីឯអ្នកផលិត ក៏តែងត្អូញត្អែរថាផលិតផលដែលខ្លួនខិតខំផលិតយ៉ាងលំបាក បែរជាមិនទទួលបានការគាំទ្រពីប្រជាជនក្នុងស្រុកជាដើម។
គួរបញ្ជាក់ថា ថ្មីៗនេះគណៈកម្មាធិការជាតិ និងគណៈកម្មាធិការខេត្តសៀមរាបជំរុញចលនាភូមិមួយផលិតផលមួយ បានជូនដំណឹងពីការរៀបចំវេទិកាផ្គូផ្គងរវាងអ្នកផលិត និងអ្នកទិញនៅថ្ងៃទី ២៥ ដល់ថ្ងៃទី ២៧ ខែសីហានេះ នៅផ្សារទំនើបម៉ាក្រូសៀមរាប។
ក្នុងនោះ ក៏មានគម្រោងអភិវឌ្ឍអាជីវកម្មប្រកបដោយសុចរិតភាព ដើម្បីទទួលបានទីផ្សារផលិតផលក្នុងស្រុក និងនាំចេញទៅក្រៅប្រទេសផងដែរ តាមរយៈការតាំងបង្ហាញលក់ផលិតផលក្នុងស្រុកផងដែរ៕