សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រោយមានវត្តមានរបស់អ៉ីនធឺណិតចូលមកក្នុងជីវភាពរស់នៅប្រចាំថ្ងៃ ការទាក់ទង ក៏ដូចជាការទិញ-លក់ ដោះដូរទំនិញក៏កាន់តែមានភាពងាយស្រួលជាងមុន។ ផ្ទុយពីទម្លាប់ពីមុនមក ដែលត្រូវដើរផ្សារដើម្បីទិញទំនិញនោះ បច្ចុប្បន្នគេអាចបញ្ជាទិញទំនិញបានយ៉ាងងាយស្រួលដោយប្រើប្រាស់ត្រឹមតែទូរស័ព្ទឆ្លាតវៃមួយគ្រឿងប៉ុណ្ណោះ។ ភាពសម្បូរបែបនៃការចាយវាយទាំងនេះហើយដែលនាំឱ្យបុគ្គលម្នាក់ៗកាន់តែត្រូវប្រុងប្រយ័ត្ន កុំឱ្យធ្លាក់ចូលទៅក្នុងការអូសទាញរបស់អាជីវករតាមអនឡាញ និងនាំឱ្យប៉ះពាល់បន្តទៅដល់ការគ្រប់គ្រងហិរញ្ញវត្ថុ។
ចេញពីបទពិសោធន៍ផ្ទាល់ខ្លួន អ្នកស្រី នុត រត្ថា នាយិកាប្រតិបត្តិនៃក្រុមហ៊ុនបណ្ដាញព័ត៌មាន អប្សារា មេឌាសឺវីស (AMS) បានចែករំលែកថា ជាជំហានដំបូង ដើម្បីកុំឱ្យប៉ះពាល់ដល់ការចាយវាយប្រចាំថ្ងៃ ពេលបានចំណូលមក គឺត្រូវដកទុកមួយចំណែកសម្រាប់ចំណាយចាំបាច់ ដូចជា ថ្លៃផ្ទះ ថ្លៃទឹក ភ្លើង និងថ្លៃម្ហូបអាហារជាដើម។ ក្រោយពីដកទុកនូវខ្ទង់ចំណាយចាំបាច់ហើយ គឺដល់ដំណាក់កាលមួយដែលត្រូវហាមចិត្តខ្លួនឯងចំពោះ ការទិញសម្ភារៈដែលមិនចាំបាច់។
ទាក់ទងនឹងចំណុចនេះ អ្នកស្រី នុត រត្ថា បានបន្តឱ្យដឹងថា ៖
«បច្ចុប្បន្ននេះ អ្នកលក់ផលិតផល ឬទំនិញតាមអនឡាញមានវិធីសាស្ត្រច្រើនណាស់ ធ្វើយ៉ាងណាដើម្បីអាចទាក់ចិត្តយើងបាន ដូច្នេះ វិធីសាស្ត្រដែលខ្ញុំធ្លាប់ប្រើ ហើយឃើញថាមានប្រសិទ្ធភាព គឺពេលចង់ទិញអ្វីមួយគួរតែទិញនៅសប្ដាហ៍ទី៣ ឬចុងខែ»។
បើតាមការលើកឡើងរបស់អ្នកស្រីមានន័យថា ការទុកពេលឱ្យខ្លួនឯងគិតមុននឹងសម្រេចចិត្តទិញអ្វីមួយគឺអាចជួយបានច្រើន ដោយសម្ភារៈខ្លះមិនមានភាពចាំបាច់ក្នុងការទិញនោះទេ ប៉ុន្តែដោយសារវិធីសាស្ត្រលក់របស់គេ ក៏អាចធ្វើឱ្យយើងចង់បានរបស់នោះ។ ម្យ៉ាងទៀត នៅអំឡុងសប្ដាហ៍ទី៣ ឬទី៤ បុគ្គលិកភាគច្រើនគឺចាប់ផ្ដើមខ្សត់ខ្សោយថវិកាសម្រាប់ចាយវាយ ដូច្នេះការសន្សំសំចៃក៏អាចកើតមាននៅអំឡុងពេលនោះដែរ។
ទម្លាប់មួយទៀតដែលអាចជួយសន្សំសំចៃផងដែរគឺបង្កើតទម្លាប់ស៊ើបសួរតម្លៃនៅលើទីផ្សារមុននឹងសម្រេចចិត្តថាទិញ។
អ្នកស្រីបានបញ្ជាក់ថា ៖
«យើងប្រៀបធៀបទៅនឹងការដើរផ្សារ គឺយើងច្រើនតែតថ្លៃអ្នកលក់ មិនខុសគ្នាពីការទិញអនឡាញ យើងអាចចំណាយពេលបន្តិចក្នុងការឆែកតម្លៃរកហាងណាដែលលក់ក្នុងតម្លៃធូរជាងគេ។ ធ្វើបែបនេះយើងអាចចំណេញបាន ៤-៥ដុល្លារ ត្រឹមរយៈពេល ៥ទៅ១០ នាទីតែប៉ុណ្ណោះ វិធីនេះអាចឱ្យយើងចំណេញ ឬកាត់បន្ថយចំណាយបានច្រើនដែរ»។
ក្រោយអនុវត្តបាននូវប្រការទាំងនេះហើយ ច្បាស់ណាស់ថាបុគ្គលម្នាក់ៗអាចមានវិន័យល្អជាងមុនក្នុងការគ្រប់គ្រងលុយកាក់របស់ខ្លួន។ ជំនួសឱ្យការចាយវាយទៅលើការទិញសម្ភារៈមិនចាំបាច់ គេអាចសល់ប្រាក់ដើម្បីសន្សំវិញ ហើយនៅក្នុងការសន្សំនេះដែរ អ្នកស្រីបានឱ្យជាគន្លឹះមួយគឺជំរុញទឹកចិត្តខ្លួនឯងឱ្យស្រឡាញ់លេខបូក ជាជាងលេខដក។
ជាមួយគ្នានេះ អ្នកស្រីក៏បានចែករំលែកទៀតថា បន្ថែមពីលើចំណុចដែលបានលើកឡើងខាងលើនេះ ការរាប់អានមនុស្សគឺជាកត្តាលីករដ៏សំខាន់មួយ។ ប្រសិនបើចង់សន្សំ ត្រូវតែដើរជាមួយមិត្តភក្កិដែលបបួលគ្នាសន្សំ បើដើរជាមួយអ្នក ចាយវាយខ្ជះខ្ជាយ ច្បាស់ណាស់មិនអាចសល់លុយសម្រាប់សន្សំនោះទេ។ ជារួមមក អ្នកស្រីយល់ថាការមានផែនការហិរញ្ញវត្ថុ មានផែនការចាយវាយច្បាស់លាស់ នៅតែជា រឿងសំខាន់ដែលមិនអាចខ្វះបាន ហើយដើម្បីអាចរៀបចំផែនការ និងអនុវត្តផែនការហិរញ្ញវត្ថុបាន កាន់តែមានប្រសិទ្ធភាព គឺទាមទារឱ្យបុគ្គលម្នាក់ៗមានវិន័យតឹងរឹង៕
Account
Security
Favourite Content