ភ្នំពេញ ៖ ការយល់ដឹងទៅលើដំណាក់កាលនានាដើម្បីអាចនាំចេញផលិតផល​មួយចេញទៅលក់នៅទីផ្សារក្រៅស្រុក នៅតែជាឧបសគ្គចម្បងសម្រាប់ម្ចាស់អាជីវកម្មក្នុងស្រុក។ ផ្អែកលើស្ថានភាពនេះ ស្ថាប័នពាក់ព័ន្ធ ជាពិសេសក្រសួងពាណិជ្ជកម្ម បានខិតខំប្រឹងប្រែងរកវិធីសាស្ត្រក្នុងការដាក់ចេញនូវយន្តការនានា ក៏ដូចជាបើកនូវវគ្គបណ្តុះបណ្ដាលផ្សេងៗ ដើម្បីពង្រឹងចំណេះដឹងម្ចាស់អាជីវកម្ម ទាក់ទងនឹងការនាំចេញ។

ក្នុងនោះ វេទិកាស្ដីពីវិស័យនាំចេញកម្ពុជា កាលពីពេលកន្លងទៅក៏បានដើរតួនាទីយ៉ាងសំខាន់ក្នុងការបញ្ជ្រាបចំណេះដឹងផងដល់បណ្តាពាណិជ្ជករ និងសហគ្រិនក្នុងស្រុកផងដែរ។

អ្នកស្រី សេង ច័ន្ទមុនីរតន៍ ប្រធានសហគ្រាសផលិតទឹកត្រី សេង រី ដែលបានចូលរួមវេទិកាខាងលើនេះបានឱ្យដឹងថា ក្នុងនាមជាម្ចាស់អាជីវកម្ម អ្នកស្រីពិតជាបានទទួលនូវចំណេះដឹងជាច្រើនពាក់ព័ន្ធ នឹងការនាំចេញពីវេទិកាដែលរៀបចំឡើងដោយក្រសួងពាណិជ្ជកម្មមួយនេះ។

អ្នកស្រីបានបន្តឱ្យដឹងទៀតថា កន្លងមក អ្នកស្រីមានបំណងចង់នាំចេញផលិតផលរបស់ខ្លួនចេញទៅលក់នៅទីផ្សារខាងក្រៅ ក៏ប៉ុន្តែមិនដឹងថាគួរត្រូវចាប់ផ្ដើមពីចំណុចណា និងត្រូវធ្វើអ្វីខ្លះនោះទេ។

អ្នកស្រី សេង ច័ន្ទមុនីរតន៍៖

«ពីមុនមកយើងចង់នាំចេញទៅក្រៅ ប៉ុន្តែមិនដឹងថា ត្រូវនាំចេញ​ដោយរបៀបណា ទាក់ទងគេរបៀបម៉េច។ ប៉ុន្តែបន្ទាប់ពីចូលរួមវេទិកានេះហើយ ខ្ញុំអាចដឹងថា ត្រូវទាក់ទង​ទៅកាន់ភាគីណា»។

សម្រាប់អ្នកស្រីផ្ទាល់បានយលច្បាស់ថា ក្រសួងពាណិជ្ជកម្មបានដើរតួនាទីយ៉ាងសំខាន់ក្នុងការបង្ហាញផ្លូវដល់អាជីវករ ថា​តើគួរធ្វើបែបណាដើម្បីអាចនាំចេញផលិតផលរបស់ខ្លួនបាន។ មិនត្រឹមតែបង្ហាញផ្លូវ​ប៉ុណ្ណោះ​ទេ វេទិកានេះក៏បានរកដំណោះស្រាយ ដោយភ្ជាប់ទំនាក់ទំនងជាមួយវិស័យហិរញ្ញវត្ថុ​ផ្លូវការក្នុងករណី​ដែលម្ចាស់អាជីវកម្មត្រូវការដើមទុន។

តាមរយៈផលដែលអ្នកស្រីទទួលបានពីការចូលរួមវេទិកាខាងលើ អ្នកស្រីចង់ឃើញវេទិកាបែបនេះកើតឡើងជាបន្តបន្ទាប់ទៀត ដោយហេតុថា អ្នកស្រីចង់ស្វែងយល់ឱ្យកាន់តែស៊ីជម្រៅទៅលើ​លក្ខខណ្ឌផ្សេងៗ ដែលត្រូវបំពេញ ដើម្បីអាចសម្រេចបាននូវស្តង់ដារនាំចេញ។

គួររំលឹកថា ក្រៅពីវេទិកាស្ដីពីការនាំចេញកម្ពុជា កាលពីខែវិច្ឆិកាកន្លងទៅ ក្រសួងពាណិជ្ជកម្ម ក៏បានដាក់សម្ពោធឱ្យប្រើប្រាស់ជាផ្លូវការនូវ «មជ្ឈមណ្ឌលសេវានាំចេញ» ដើម្បីលើកកម្ពស់ដល់ការ​នាំចេញរបស់កម្ពុជា និងពង្រីកនូវសក្ដានុពលផលិតផលកម្ពុជា (Product of Cambodia) ទៅកាន់ទី​ផ្សារ​អន្តរជាតិ តាមរយៈការជួយឱ្យអ្នកនាំចេញទទួលបាននូវការយល់ដឹងសំខាន់ៗដូចជា៖ ការបណ្តុះបណ្តាលអំពីនីតិវិធីក្នុងការនាំចេញ ឱកាសក្នុងការបង្កើតបណ្តាញ​ជាមួយនឹងអ្នកជំនាញ និងអ្នកទិញសក្ដានុពលនៅក្នុងទីផ្សារគោលដៅ។

ការបង្កើតមជ្ឈមណ្ឌលសេវានាំចេញ (ESC) នេះ គឺជាគំនិតផ្តួចផ្តើមថ្មីរបស់ក្រសួងពាណិជ្ជកម្ម សហការជាមួយមជ្ឈមណ្ឌលសម្រាប់ជំរុញការនាំចូលពីប្រទេសកំពុងអភិវឌ្ឍន៍ (CBI) ក្នុងគោល​បំណង លើកកម្ពស់ដល់ការនាំចេញរបស់កម្ពុជា និងជួយដល់ពាណិជ្ជករក្នុងការត្រៀម​ខ្លួន​ក្នុងការនាំចេញ ព្រមទាំងជួយជំរុញដល់ពាណិជ្ជករឱ្យមានទំនុកចិត្តក្នុងការប្រកួតប្រជែងលើទីផ្សារ​អន្តរជាតិផងដែរ៕