ភ្នំពេញ ៖ មួយរយៈចុងក្រោយនេះ គេសង្កេតឃើញមានចលនាគាំទ្រកសិផលក្នុងស្រុកមានសន្ទុះកើនឡើងគួរឱ្យកត់សម្គាល់ ទាំងម្ចាស់អាជីវកម្មតូច-ធំ ក៏ដូចជាបណ្តាហាងអាហារដ្ឋាន ភោជនីយដ្ឋានធំៗបានងាកមកចូលរួមគាំទ្រ និងប្រើប្រាស់គួរឱ្យកត់សម្គាល់បន្ទាប់ពីមានការផ្សព្វផ្សាយយ៉ាងទូលាយពីសំណាក់ក្រសួងកសិកម្ម អង្គការដៃគូអភិវឌ្ឍន៍ដែលពាក់ព័ន្ធ ជាពិសេសសហគមន៍ដែលជាអ្នកផលិតតែម្ដង ក្នុងគោលបំណងពង្រីកទីផ្សារ ជាពិសេសប្រកួតប្រជែងជាមួយការនាំចូលបន្លែពីក្រៅស្រុក។

ឯកឧត្តម ឃឹម ហ្វីណង់​ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ៖ ចង់ដាំបន្លែក្នុងស្រុកជំនួសឱ្យការនាំចូលមកពីខាងក្រៅ ចាំចាប់ទាមទារឱ្យមានការរៀបចំខ្លួនទុកជាមុនសិន ហើយអ្វីដែលសំខាន់គឺការចងក្រង ប្រមូលផ្តុំគ្នាជាសហគមន៍ និងអនុវត្តតាមវិធីសាស្ត្រកសិកម្មបែបទំនើប ធ្វើយ៉ាងណាអាចបង្កើនគុណភាព រក្សាស្ថិរភាពនៃបរិមាណសម្រាប់ផ្គត់ផ្គង់ ខណៈដែលតម្លៃក៏អាចទទួលបានថ្លៃជាងមុន។

ឯកឧត្តម ឃឹម ហ្វីណង់ បានលើកជាឧទាហរណ៍ជាក់ស្ដែងរបស់ប្រជាកសិករនៅស្រុកត្រាំកក់ ខេត្តតាកែវ ដែលបានអភិវឌ្ឍខ្លួនពីការដាំបន្លែជាលក្ខណៈគ្រួសារ និងតាមបែបប្រពៃណីមកជាការដាំតាមតម្រូវការទីផ្សារក្រោមការចងក្រងជាសហគមន៍កសិកម្មទំនើប ដែលត្រូវបានក្រុមហ៊ុន Tropicam Fruit and Vegetables ចាប់ផ្តើមប្រមូលទិញស្ពៃក្រញាញ់ ដែលមានស្រាប់ជាបណ្តោះអាសន្នក្នុងតម្លៃ២០០០៛/គីឡូក្រាមពីសហគមន៍ ដោយក្នុងមួយសប្ដាហ៍ក្រុមហ៊ុនចុះប្រមូលទិញចំនួន២ដង ហើយក្នុងម្ដងចំនួន ២តោន។

ឯកឧត្តមបញ្ជាក់ថា នៅពេលដែលការផលិតត្រូវបានពង្រឹងនូវគុណភាព សុវត្ថិភាព តម្រូវការទីផ្សារនឹងមានការកើនឡើង ព្រមទាំងមានការគាំទ្រច្រើនពីសំណាក់ប្រជាជនក្នុងស្រុកដែលជាអ្នកទទួលទាន។ ប្រការនេះវានឹងក្លាយទៅជារបាំងដោយស្វ័យប្រវត្តិក្នុងការកាត់បន្ថយការនាំចូលបន្លែពីក្រៅស្រុក ហើយអតិថិជនដែលជាអ្នកទទួលទានក៏ចំណាយតិចជាងមុន ខណៈដែលកសិករដែលជាអ្នកផលិតក៏មានឱកាសទទួលតម្លៃនៃកសិផលថ្លៃជាងការដាំដុះតាមបែបប្រពៃណី។

ដោយឡែក លោក សាន្ត សំណាង អនុប្រធានក្រុមប្រឹក្សាភិបាល សហគមន៍កសិកម្មកន្ទ្រាំងបល្ល័ង្គរស្មីស្ត្រីសាមគ្គី បានប្រាប់ AMS ថា បច្ចុប្បន្ននេះ ប្រជាកសិករដែលជាសមាជិករបស់សហគមន៍មានចំនួនប្រមាណ ៣០០គ្រួសារ កំពុងមមាញឹកក្នុងការងារដាំដុះ ប្រមូលផលទៅកាន់ទីផ្សារ និងជំរុញការដាំដុះដំណាំបន្លែជាច្រើនប្រភេទ រួមមានដូចជា ខាត់ណាផ្កា ស្ពៃ សណ្តែក​កួរ ត្រសក់ និងបន្លែចម្រុះជាច្រើន ទៅតាមផែនការនៃក្រុមផលិតរបស់សហគមន៍ដែលបានរៀបចំ។

លោកបានបញ្ជាក់ថា ៖ ដំណើរការផលិតដំណាំបន្លែរបស់កសិករ បច្ចុប្បន្ននៅមិនទាន់បំពេញបានតាមផែនការទីផ្សារនៅឡើយ ដោយសារបន្លែខ្លះមិនអាចដាំវិលជុំបាន និងទំហំផ្ទៃដីបង្កបង្កើននៅមានលក្ខណៈតូចចង្អៀតនៅឡើយ។

លោកបន្តថា ថ្វីត្បិតតម្លៃទីផ្សារបន្លែក្នុងពេលបច្ចុប្បន្នមានការប្រែប្រួល ដោយសារភាពជន់ជោរនៃបន្លែដែលកសិករនិយមដាំតៗគ្នាក៏ពិតមែន ប៉ុន្តែសហគមន៍បានស្វែងរកទីផ្សារ លក់ចេញផលិតផលរបស់កសិករបានយ៉ាងល្អប្រសើរ។ ក្នុងនោះ ដើម្បីបង្កើនផលិតភាពក្នុងការផលិតបន្លែឱ្យស្របតាមតម្រូវការរបស់ទីផ្សារ សហគមន៍កំពុងទំនាក់ទំនងជាមួយស្ថាប័នរដ្ឋាភិបាល និងអង្គការដៃគូនានា ដើម្បីបន្តជួយទៅលើរោងសំណាញប្រមាណ៣០ខ្នងបន្ថែមទៀតសម្រាប់កសិករជាសមាជិក ដើម្បីឱ្យការងារដាំដុះបានកាន់តែប្រសើរ។