សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត ៖ ឱ្យតែនិយាយពីនំបំពង់ មនុស្សភាគច្រើននឹកគិតទៅដល់រសជាតិផ្អែម ក្លិនឈ្ងុយ ស្រួយឆ្ងាញ់ ដែលគេនិយមទទួលទានលេងក្រៅអាហារពេល ជាពិសេសទទួលទានជាមួយទឹកតែរឹតតែជក់មាត់ ដែលធ្វើឱ្យនំប្រភេទនេះមានតម្រូវការទីផ្សារល្អ។ យ៉ាងណាក៏ដោយ ចំពោះប្រភពផលិត និងផ្គត់ផ្គង់នំដ៏មានប្រជាប្រិយភាពមួយនេះ គេតែងនឹកគិតដល់ខេត្តកំពត ដែលមានសិប្បកម្មផលិតនំលក្ខណៈគ្រួសារមួយកន្លែង និងមានជំនាញច្បាស់ និងបទពិសោធន៍ជាច្រើនឆ្នាំ។
នំបំពង់ស្នាដៃខ្មែរ ខេត្តកំពត ជាយីហោសិប្បកម្មផលិតនំបំពង់លក្ខណៈគ្រួសារមួយកន្លែងស្ថិតនៅឃុំកំពង់ក្រែង ស្រុកទឹកឈូ ខេត្តកំពត ខណៈដែលបច្ចុប្បន្នកំពុងមានភាពមមាញឹកក្នុងការផលិត ដើម្បីផ្គត់ផ្គង់ទីផ្សារទាំងនៅក្នុងតំបន់ ក៏ដូចជានៅតាមបណ្តាខេត្ត / ក្រុង នានាមួយចំនួនទៀតផងដែរ។
លោក ហេង ឃីម ជាម្ចាស់សិប្បកម្មផលិតនំបំពង់ខាងលើបានប្រាប់ AMS ឱ្យដឹងថា ៖
«សព្វថ្ងៃនេះ សិប្បកម្មរបស់យើងខ្ញុំមានទ្រង់ទ្រាយជាលក្ខណៈគ្រួសារនៅឡើយ ដោយមានគ្នាផលិតត្រឹម ៤-៥នាក់ប៉ុណ្ណោះ ជាមួយលទ្ធភាពអាចផលិត និងលក់នំបានប្រមាណ ៤០-៥០គីឡូក្រាមក្នុងមួយថ្ងៃ។ យើងលក់ទៅឱ្យអតិថិជនទាំងលក់រាយ និងបោះដុំ ហើយក៏មានលក់តាមអនឡាញផងដែរ»។
នំបំពង់ស្នាដៃខ្មែរ ខេត្តកំពត ត្រូវបានរៀបចំ និងផលិតឡើងច្រើនរសជាតិ រួមមានដូចជា រសជាតិស្លឹកតើយ រសជាតិដូង រសជាតិកាហ្វេ រសជាតិខ្ញី រសជាតិសូកូឡា រសជាតិក្រូចឆ្មា រសជាតិខ្នុរ និងរសជាតិទុរេនជាដើម ដោយតម្លៃចាប់ពី ២៥០០០ – ៤០០០០រៀល អាស្រ័យតាមរសជាតិ ជាពិសេស រសជាតិ ខ្នុរ និងទុរេន អាចមានតម្លៃថ្លៃជាងគេ ព្រោះរាល់រសជាតិ និងក្លិនគឺត្រូវប្រើប្រាស់វត្ថុធាតុដើមធម្មជាតិ មិនមានសារធាតុគីមីនោះទេ។
លោកបានបញ្ជាក់ឱ្យដឹងថា ចំពោះបច្ចេកទេសក្នុងការផលិតនំបំពង់វិញ អ្វីដែលសំខាន់គឺការលាយម្សៅ ធ្វើយ៉ាងណាឱ្យនំដុតហើយមានសភាពស្រួយល្អ ក្រៅពីនេះគេត្រូវការវត្ថុធាតុដើមបន្ទាប់បន្សំមួយចំនួនទៀត ដូចជា ខ្ទិះដូង ល្ងរ ស៊ុត និងស្ករ ទើបអាចផលិតនំដែលមានរសជាតិឈ្ងុយឆ្ងាញ់បាន។
គួររំឭកដែរថា មុខរបរធ្វើនំបំពង់នេះ ជាអាជីវកម្មលក្ខណៈគ្រួសារតាំងពីយូរមកហើយ ដោយពេលនោះក្រុមគ្រួសាររបស់លោក ឃីម ធ្វើ និងរែកនំយកទៅលក់នៅតាមផ្សារ និងទីប្រជុំជន។ ក្រោយមក ដោយមើលឃើញពីសក្ដានុពលរបស់នំប្រភេទនេះ លោកបានសម្រេចចិត្តកែច្នៃ បង្កើនរសជាតិផ្សេងៗគ្នា ដើម្បីឱ្យអតិថិជនអាចមានជម្រើសច្រើន អាស្រ័យតាមចំណូលចិត្ត។
យ៉ាងណាមិញ នៅក្នុងដំណើរការអាជីវកម្មមួយនេះ លោក ហេង ឃីម ក៏ធ្លាប់ជួបបញ្ហាប្រឈមផងដែរ ប៉ុន្តែលោកនៅតែជំនះបានរហូតមកដល់សព្វថ្ងៃ ហើយនៅពេលអនាគត ប់មានលទ្ធភាព ឬមានដៃគូសហការ លោកចង់ពង្រីកសិប្បកម្មមួយនេះឱ្យកាន់តែធំ បង្កើនការផលិត សម្រាប់ផ្គត់ផ្គង់នៅលើទីផ្សារទូទាំងប្រទេស និងឈានទៅដល់ការនាំចេញផងដែរ៕
Account
Security
Favourite Content