កេសរកូល ត្រូវបានគេស្គាល់ថាជារុក្ខជាតិថ្នាក់ខ្ពស់ ដែលទាក់ទាញភ្នាក់ងារនាំលំអងដូចជា ឃ្មុំ កន្លង់ និងសត្វស្លាបជាដើម។ រុក្ខជាតិនេះក៏ជាសូចនាករដែលវាស់ពីសុខភាពនៃប្រព័ន្ធអេកូឡូស៊ីផងដែរ ដោយវត្តមានរបស់វាបង្ហាញ​អំពីភាពសម្បូរសប្បាយ និងភាពចម្រុះនៃប្រព័ន្ធអេកូឡូស៊ី។

កេសរកូល ក៏ជារុក្ខជាតិដែលស្រស់ស្អាត និងមានបែងចែកជាច្រើនប្រភេទ ដែលប្រភេទនីមួយៗ មានភាពស្រស់ស្អាតផ្សេងៗគ្នា។ កេសរកូលខ្លះក៏ធំ ខ្លះទៀតក៏តូច ខ្លះក៏ពណ៍ផ្កាឈូក ខ្លះក៏ ពណ៍ស្វាយ ខ្លះក៏មានពណ៍លាយចម្រុះគ្នា ហើយខ្លះទៀតក៏មានក្លិនក្រអូប ដែលគេអាចស្រាវ ជ្រាវផលិតជាទឹកអប់ទៀតផង។ ប៉ុន្តែ រុក្ខជាតិកេសរកូលនេះរើសទីតាំងក្នុងការលូតលាស់ណាស់ ដោយវាដុះតែនៅតាមតំបន់ត្រូវពិក ក្នុងព្រៃទឹកភ្លៀង ដែលត្រជាក់ និងសើមជាប់ជានិច្ច។ នៅកម្ពុជា កេសរកូលមានដុះច្រើននៅតាមជួរ ភ្នំក្រវាញ ដែលជាតំបន់សម្បូរទៅដោយធនធានធម្មជាតិ។

បច្ចុប្បន្ន ប្រទេសថៃដែលនៅក្បែរខាងកម្ពុ ជាបានរកឃើញកេសរកូល ឬអរគីដេប្រមាណជាង ១០០០ប្រភេទ ខណៈដែលនៅកម្ពុជាត្រូវបានគេប៉ានស្មានថាមានប្រហែល ៥០០ប្រភេទ។ ប៉ុន្តែជាក់ស្ដែង កេសរកូលដែលបានកំណត់អត្តសញ្ញាណរួចរាល់គឺមានជាង ២០០ប្រភេទប៉ុណ្ណោះ ម្លោះហើយបានជាអ្នកជំនាញ ក៏ដូចជាក្រសួងបរិស្ថានកំពុងខិតខំប្រឹងប្រែងរុករក កេសរកូលព្រៃ ដើម្បីយកវាមករក្សាទុកនៅក្នុងមជ្ឈមណ្ឌលស្រាវជ្រាវកេសរកូល។

ដោយសារតែភាពស្រស់ស្អាតរបស់វា មនុស្សជាច្រើនបានចូលព្រៃដើម្បីដកយកពូជកេសរកូលមកធ្វើ អាជីវកម្ម ហើយសកម្មភាពទាំងនេះ តិចឬច្រើន ក៏បានប៉ះពាល់ទៅដល់ការស្រាវជ្រាវកំណត់​អត្តសញ្ញាណ​របស់អ្នកជំនាញផងដែរ។ ប្រសិនបើសកម្មភាពដកហូតយកកេសរកូលនេះមិនមាន ការបញ្ឈប់ទេ វាអាចទៅរួច ដែលថាពូជកេសរកូលព្រៃរបស់កម្ពុជាមានកាន់តែខ្សត់ទៅៗ និងអាចឈានដល់ការបាត់បង់ពីធម្មជាតិទៀតផង។ ផ្ទុយទៅវិញ បើសិនជាសកម្មភាពដកហូតរបស់ឈ្មួញនេះបានថយចុះវិញ ទៅថ្ងៃអនាគត កម្ពុជាអាច​ស្រាវជ្រាវ​កំណត់អត្តសញ្ញាណកេសរកូលបានច្រើនប្រភេទ ហើយអាចមានលទ្ធភាពបង្កាត់ចេញជា​កេសរកូល​ប្រភេទថ្មីទៀត យើងអាចទាញប្រយោជន៍ពីវាបានជាច្រើនទៀត។ ជាឧទាហរណ៍​នៅប្រទេសសិង្ហបុរី ក្នុងមួយឆ្នាំមានភ្ញៀវ​ទេសចរ ជាង៤លាននាក់ចូលទៅទស្សនា សួនរុក្ខសាស្ត្រ​សិង្ហបុរី (Singapore Botanic Gardens)។ ម្យ៉ាងទៀត វាក៏ជួយទៅដល់ការសិក្សាផ្នែកបច្ចេកទេសនៃការធ្វើចំណាត់ថ្នាក់ (Taxonomy) ដែលជំនាញនេះនៅកម្ពុជាកំពុងមានតិចតួចនៅឡើយ​ ដែលជាហេតុធ្វើឱ្យការស្រាវជ្រាវកំណត់អត្ត សញ្ញាណកេសរកូលប្រព្រឹត្តទៅដោយសន្សឹមៗ។

ក្រៅពីនោះ គេក៏អាចបង្កាត់ពូជថ្មីៗ ដែលមានរូបរាងស្រស់ស្អាត និងមានក្លិនក្រអូប ដែលវាអាច​ចំណេញដល់ការធ្វើអាជីវកម្មលក់ផ្កា និងផលិតជាទឹកអប់ផងដែរ។ ប៉ុន្តែអ្វីដែលក្រសួងបរិស្ថាន​កំពុងយកចិត្តទុកដាក់ គឺការធ្វើអាជីវកម្មលើកេសរកូលព្រៃ៕