ភ្នំពេញ ៖ កាលពីប៉ុន្មានឆ្នាំមុន បឹងកេងកង គឺជាតំបន់ដែលមានតម្លៃដីធ្លីខ្ពស់ជាងគេនៅរាជធានីភ្នំពេញ ឬនៅប្រទេសកម្ពុជាទាំងមូល ដោយសារតែតំបន់នេះជាតំបន់ដែលមានសក្ដានុពលទាក់ទាញការវិនិយោគ មានអង្គការក្រៅរដ្ឋាភិបាល ស្ថាប័នជាតិ និងមជ្ឈមណ្ឌលពាណិជ្ជកម្មចម្រុះកម្រិតខ្ពស់ និងមធ្យម ហើយក៏ជាតំបន់ដែលមានអាជីវកម្មម៉ាកយីហោល្បីៗលំដាប់អន្តរជាតិច្រើនជាងគេ។ ប៉ុន្តែមកដល់ពាក់កណ្ដាលឆ្នាំ២០២៣នេះ បឹងកេងកង លែងក្លាយជាតំបន់ដែលមានតម្លៃដីខ្ពស់ជាងគេនោះទៀតហើយ។
បើតាមរបាយការណ៍របស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានបង្ហាញពីតម្លៃដីធ្លីនៅខណ្ឌបឹងកេងកងក្នុងឆមាសទី១ឆ្នាំ ២០២៣ ដោយក្នុងនោះរបាយការណ៍បានបញ្ជាក់ពីតម្លៃដីនៅក្នុងខណ្ឌមួយនេះស្ថិតនៅចន្លោះពី ២ ៧០០ដុល្លារអាមេរិកក្នុងមួយម៉ែត្រការ៉េ ដល់ ៩ ៨០០ដុល្លារអាមេរិកក្នុងមួយម៉ែត្រការ៉េ ខណៈដីនៅខណ្ឌដូនពេញ មានតម្លៃរហូតដល់ ១៣ ០០០ដុល្លារអាមេរិកក្នុងមួយម៉ែត្រការ៉េ ។
តាមរយៈរបាយការណ៍ដែលសិក្សាដោយសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានបង្ហាញពីតម្លៃដីនៅតាមសង្កាត់នីមួយៗដូចខាងក្រោមនេះ ៖
១. សង្កាត់បឹងកេងកង ១ ៖ តម្លៃដីនៅក្នុងសង្កាត់នេះមានតម្លៃចន្លោះពី ៥ ៣០០ដុល្លារអាមេរិកទៅ ៩ ៨០០ដុល្លារអាមេរិកសម្រាប់តំបន់នៅជាប់ផ្លូវសំខាន់ ឬផ្លូវធំ និងតម្លៃចន្លោះពី ៤ ៨០០ដុល្លារទៅ ៥ ៤០០ដុល្លារអាមេរិកក្នុងមួយម៉ែត្រការ៉េ សម្រាប់ដីនៅជាប់ផ្លូវតូច ។
២. សង្កាត់បឹងកេងកង២ ៖ តម្លៃដីធ្លីនៅក្នុងសង្កាត់មួយនេះ មានតម្លៃចន្លោះពី ២ ៧០០ដុល្លារអាមេរិកទៅ ៧ ០០០ដុល្លារអាមេរិកក្នុងមួយម៉ែត្រការ៉េ ក្នុងនោះតម្លៃ ៤ ៧០០ដុល្លារទៅ ៧ ០០០ដុល្លារអាមេរិកក្នុងមួយម៉ែត្រការ៉េសម្រាប់ដីនៅជាប់ផ្លូវធំ និងតម្លៃចន្លោះពី ២ ៧០០ដុល្លារអាមេរិកទៅ ៤ ២០០ដុល្លារអាមេរិកសម្រាប់តំបន់នៅតាមបណ្ដោយផ្លូវតូចៗ ។
៣.សង្កាត់បឹងកេងកង៣ ៖ ដីធ្លីនៅសង្កាត់មួយនេះ មានតម្លៃចន្លោះពី ២ ៧០០ដុល្លារអាមេរិកទៅដល់ ៧ ០០០ដុល្លារអាមេរិកក្នុងមួយម៉ែត្រការ៉េ ក្នុងនោះដែរតម្លៃដីនៅតាមផ្លូវធំ និងផ្លូវតូចៗគឺមានតម្លៃដូចគ្នានឹងសង្កាត់បឹងកេងកង២ដែរ។
៤. សង្កាត់អូរឡាំពិក ៖ តម្លៃដីនៅក្នុងសង្កាត់មយយនេះ ខ្ពស់ជាងនៅសង្កាត់បឹងកេងកង៣បន្តិច ក្នុងនោះដែរនៅតាមបណ្ដោយផ្លូវធំមានតម្លៃចន្លោះពី ៤ ៨០០ដុល្លារអាមេរិកទៅ ៨ ២០០ដុល្លារអាមេរិក ហើយចន្លោះពី ២ ៧០០ដុល្លារអាមេរិកទៅ ៤ ៧០០ដុល្លារអាមេរិកក្នុងមួយម៉ែត្រការ៉េ ។
៥. សង្កាត់ទំនប់ទឹក ៖ សង្កាត់នេះតម្លៃដីអាចមានចន្លោះពី ៣ ១០០ដុល្លារអាមេរិកទៅ ៦ ៥០០ដុល្លារអាមេរិកក្នុងមួយម៉ែត្រការ៉េសម្រាប់តំបន់នៅជាប់ផ្លូវធំ និងចន្លោះពី ២ ៧០០ដល្លារអាមេរិកដល់ ៤ ៣០០ដុល្លារអាមេរិក សម្រាប់តំបន់នៅតាមបណ្ដោយផ្លូវតូច ។
៦. សង្កាត់ទួលស្វាយព្រៃ១ និងទួលស្វាយព្រៃ២ ៖ សង្កាត់ទាំងពីរនេះ តម្លៃដីគឺដូចគ្នា ដោយក្នុងនោះដែរនៅតាមបណ្ដោយផ្លូវធំមានតម្លៃចន្លោះពី ៤ ៣០០ដុល្លារអាមេរិកទៅ ៧ ៧០០ដុល្លារអាមេរិកក្នុងមួយម៉ែត្រការ៉េ និង ២ ៧០០ដុល្លារអាមេរិកទៅ ៤ ៣០០ដុល្លារអាមេរិកសម្រាប់តំបន់នៅតាមបណ្ដោយផ្លូវតូចៗ ៕