សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ធនាគារអេស៊ីលីដា ភីអិលស៊ី បានប្រកាសលក់សញ្ញាបណ្ណសាជីវកម្មនៅផ្សារមូលបត្រកម្ពុជា ក្នុងទំហំទឹកប្រាក់ប្រមាណ ៨៦លានដុល្លារអាមេរិក ដែលពិធីនេះត្រូវបានធ្វើឡើងនៅព្រឹកថ្ងៃទី២៤ ខែកុម្ភៈ ឆ្នាំ២០២៥ ក្រោមអធិបតីភាព ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលនៃផ្សារមូលបត្រកម្ពុជា ។
នៅក្នុងឱកាសនោះដែរ ឯកឧត្តមបណ្ឌិតសភាចារ្យ ហ៊ាន សាហ៊ីប បានមានប្រសាសន៍ថា មូលបត្របំណុល បានរួមចំណែកជាច្រើនដល់ការជំរុញកំណើនសេដ្ឋកិច្ចកម្ពុជាក្នុងនោះរួមមាន ៖ ទី១). រក្សាស្ថិរភាព និងជំរុញកំណើនសេដ្ឋកិច្ចប្រកបដោយផលិតភាព និងនិរន្តរភាព, ទី២). កាត់បន្ថយការពឹងផ្អែកលើប្រាក់កម្ចីពីបរទេស, សំដៅទៅកាត់បន្ថយហានិភ័យបំណុលក្រៅប្រទេស, ការប្រែប្រួលអត្រាការប្រាក់, និង បញ្ហាប្តូររូបិយប័ណ្ណ ជាដើម, ទី៣). បង្កើនទំហំ និងប្រភពហិរញ្ញប្បទានរបស់រាជរដ្ឋាភិបាលសម្រាប់ការអភិវឌ្ឍ, ការធានាប្រសិទ្ធភាពនៃការវិនិយោគ, ការគាំទ្រដល់គម្រោងហេដ្ឋារចនាសម្ព័ន្ធសំខាន់ៗ និង វិស័យអាទិភាព, ជាពិសេស ការជំរុញការអភិវឌ្ឍសេដ្ឋកិច្ចរយៈពេលវែង ។
ឯកឧត្តមបណ្ឌិតសភាចារ្យ បានលើកឡើងថា ក្រោមការដឹកនាំដ៏ស្វាហាប់ ឈ្លាសវៃ និង ប៉ិនប្រសព្វរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា, រាជរដ្ឋាភិបាល បានបន្តយកចិត្តទុកដាក់លើវិស័យមូលបត្រ តាមរយៈការជំរុញការធ្វើនវានុវត្តយន្តការហិរញ្ញប្បទាន និងផលិតផលហិរញ្ញវត្ថុ សំដៅគាំទ្រដល់ការវិនិយោគ និងការធ្វើពិពិធកម្មសេដ្ឋកិច្ច ។
ជាលទ្ធផល តាមការព្យាករ សេដ្ឋកិច្ចកម្ពុជាសម្រេចបានកំណើន ៦% ក្នុងឆ្នាំ២០២៤ និងបន្តមានកំណើនថែមទៀត ដល់ ៦,៣% សម្រាប់ឆ្នាំ២០២៥ នេះ ហើយការវិនិយោគឯកជននៅកម្ពុជាបានបង្ហាញសញ្ញាវិជ្ជមានល្អប្រសើរ ឆ្លុះបញ្ចាំងតាមរយៈការអនុម័តគម្រោងវិនិយោគថ្មីៗ ដោយក្រុមប្រឹក្សាអភិវឌ្ឍន៍កម្ពុជាចំនួន ៤១៤ គម្រោងនៅឆ្នាំ២០២៤ កើនឡើង ១៤៦ គម្រោងធៀបនឹងឆ្នាំ២០២៣ ។ កំណើនសេដ្ឋកិច្ច និងការវិនិយោគនេះ នឹងធ្វើឱ្យប្រជាជនមានជីវភាពល្អប្រសើរជាងមុន ព្រមទាំងបង្កើនទំនុកចិត្តដល់វិនិយោគិន លើផលិតផលមូលបត្រកាន់តែច្រើនថែមទៀត ។
ឯកឧត្តមបណ្ឌិតសភាចារ្យ ប្រធានក្រុមប្រឹក្សាភិបាល បានវាយតម្លៃខ្ពស់ដល់ភាគីពាក់ព័ន្ធ ដែលបានសហការ និងគាំទ្រដល់ការចុះបញ្ជីលក់សញ្ញាបណ្ណសាជីវកម្មរបស់ធនាគារ អេស៊ីលីដា ភីអិលស៊ី ដែលជាសមិទ្ធផលថ្មីមួយទៀតរបស់ផ្សារមូលបត្រកម្ពុជានៅដើមឆ្នាំ២០២៥ នេះ ។
ជាមួយគ្នានេះ ដើម្បីពន្លឿនការអភិវឌ្ឍនៃផ្សារមូលបត្រកម្ពុជាឱ្យរីកចម្រើនខ្លាំងក្លា ឯកឧត្តមបណ្ឌិតសភាចារ្យ ហ៊ាន សាហ៊ីប បានគាំទ្រ និងលើកទឹកចិត្តដល់ភាគីពាក់ព័ន្ធ បន្តសកម្មភាពផ្សព្វផ្សាយ និង បញ្ជ្រាបការយល់ដឹងឱ្យបានកាន់តែទូលំទូលាយ ជាពិសេស បង្កើនកិច្ចសហការជាមួយស្ថាប័នហិរញ្ញវត្ថុ សមាគមធុរកិច្ចជាតិ និងអន្តរជាតិ ដើម្បីបង្កើតបណ្តាញទំនាក់ទំនង និងលើកទឹកចិត្តក្រុមហ៊ុនសក្តានុពលចូលរួមឱ្យបានកាន់តែច្រើនបន្ថែមទៀត ។
លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានមានប្រសាសន៍ថា ការចុះបញ្ជីលក់សញ្ញាបណ្ណធម្មតា ឬសញ្ញាបណ្ណបន្ទាប់បន្សំ លើកទី១នេះ បានកើតចេញពីលទ្ធផលជោគជ័យដែលទទួលបានទំនុកចិត្ត និងការជឿជាក់ពីសំណាក់វិនិយោគិនលើសពីការរំពឹងទុក។ ជាមួយគ្នានេះ ថ្នាក់ដឹកនាំរបស់ធនាគារ អេស៊ីលីដា ជឿជាក់ថា ការបោះផ្សាយសញ្ញាបណ្ណបន្ទាប់បន្សំលើកនេះ នឹងផ្ដល់ឱ្យវិនិយោគិន និងអតិថិជននូវជម្រើសវិនិយោគមួយបន្ថែមទៀតផងដែរ។
បន្ថែមលើនេះ ការបោះផ្សាយនេះ ត្រូវបានលោកបណ្ឌិត អ៊ិន ចាន់នី លើកឡើងថា នឹងចូលរួមចំណែកយ៉ាងសំខាន់ក្នុងការជួយរុញកំណើនដល់ការអភិវឌ្ឍទីផ្សារមូលធននៅកម្ពុជា និងជាយន្តការថ្មីសម្រាប់កៀរគរប្រភពទុនក្នុងស្រុកសម្រាប់គាំទ្រអតិថិជនក្នុងស្រុក និងចូលរួមចំណែកអភិវឌ្ឍន៍សេដ្ឋកិច្ចជាតិ និងសង្គម ៕
Account
Security
Favourite Content