សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បណ្តាក្រុមអ្នកផលិតក្នុងស្រុកជាច្រើនបានសម្តែងការគាំទ្រចំពោះចំណាត់ការរបស់ក្រសួងពាណិជ្ជកម្ម ដែលបានអន្តរាគមន៍បញ្ចូលផលិតផលខ្មែរបន្ថែមទៀតដាក់លក់នៅតាមបណ្តាស្វានីយ៍ប្រេងឥន្ទនៈ ភីធីធី ទូទាំង១៩ ខេត្តក្រុង ។ ការថ្លែងគាំទ្រនេះត្រូវបានធ្វើឡើងបន្ទាប់ពីថ្នាក់ដឹកនាំក្រសួងពាណិជ្ចកម្មបានរៀបចំកិច្ចប្រជុំ ដើម្បីតាមដានវឌ្ឍនភាពការងារ ក្រោមកិច្ចសហការរវាងក្រសួងពាណិជ្ជកម្ម និងក្រុមហ៊ុនភីធីធី(ខេមបូឌា) ក្នុងគោលបំណងជំរុញ និងបង្កើនការលក់ផលិតផលខ្មែរនៅតាមបណ្តាស្ថានីយប្រេងឥន្ធនៈភីធីធី ។
លោកស្រី កែវ សុវណ្ណរី ស្ថាបនិកក្រុមហ៊ុនកសិផលរីករាយ បានសម្តែងការសាទរចំពោះចំណាត់ការក្រសួងក្នុងការស្វែងរកទីផ្សារបន្ថែមសម្រាប់ដាក់លក់ផលិតផលក្នុងស្រុក ដែលជាផ្នែកមួយក្នុងការលើកកំពស់ផលិតផលខ្មែរក្នុងស្រុកឱ្យកាន់តែរីកចម្រើន និងគាំទ្រកាន់តែច្រើនថែមមួយកម្រិត។
លោកស្រីបញ្ជាក់ថា ៖
«ចំពោះសោភណ្ឌភាពនៃការវេចខ្ចប់ផលិតផលក្នុងស្រុក ហាក់នៅមានកម្រិតបើប្រៀបធៀបជាមួយផលិតផលនាំចូល ប៉ុន្តែភាគច្រើននៃផលិតផលក្នុងស្រុកផលិតឡើងបានគិតគូរ និងយកចិត្តទុកដាក់ខ្ពស់ពីសុខភាពប្រជាពលរដ្ឋដែលជាអ្នកប្រើប្រាស់ និងជាផលិតផលដែលមានការពិនិត្យគុណភាពស្តង់ដារត្រឹមត្រូវ និងបានអំពាវនាវដល់ពលរដ្ឋខ្មែរ គាំទ្រផលិតផលក្នុងស្រុកយើង ជាជាងគាំទ្រផលិតផលនាំចូល ដើម្បីជួយផ្តល់ការងារដល់ពលរដ្ឋខ្មែរ ក៏ដូចជាការចូលរួមលើកកំពស់សេដ្ឋកិច្ចជាតិ»។
លោក ម៉ៅ ច័ន្តតារា ប្រធានក្រុមហ៊ុន DARAR FOOD បានសាទរចំពោះចំណាត់ថ្មីៗបន្ថែមទៀតរបស់ក្រសួង ខណៈដែលអ្នកផលិតផលក្នុងស្រុកកំពុងជួបផលលំបាកក្នុងការស្វែងរកទីផ្សារ ដែលនេះជាចំណាត់ការថ្មីបន្ថែមទៀតក្នុងការស្វែងរកទីផ្សារសម្រាប់ផលិតផលក្នុងស្រុក។ យ៉ាងនេះក្តីលោកបានអំពាវនាវដល់ក្រសួង ធ្វើយ៉ាងណាអន្តរាគមន៍ទៅតាមបណ្តាផ្សារទំនើបនានា ជួយសម្រួលសម្រាប់ជួលទីតាំងដាក់លក់ផលិតផលខ្មែរក្នុងតម្លៃទាប និងអន្តរាគមន៍ទៅដល់អ្នកផលិតបាកូដសម្គាល់ផលិតផលធ្វើជូនក្រុមហ៊ុនក្នុងស្រុកក្នុងតម្លៃទាប។
គួរបញ្ជាក់ថា អង្គប្រជុំរបស់ក្រសួងពាណិជ្ជកម្ម បានឯកភាពលើគម្រោងសកម្មភាពក្នុងការចាប់ផ្តើមអនុវត្តការលក់ផលិតផលខ្មែរនៅតាមបណ្តាស្ថានីយប្រេងឥន្ធនៈភីធីធី នៅក្នុងខេត្តទាំង១៩។ ក្នុងឱកាសនោះតំណាងក្រុមហ៊ុន ភីធីធី (ខេមបូឌា) ក៏បានរាយការណ៍អំពីវឌ្ឍនភាពការងារមួយចំនួនផងដែរ រួមមានការត្រៀមរៀបចំដំឡើងស្តង់នៅតាមបណ្តាស្ថានីយរាជធានី-ខេត្តទាំង១៩ និងការរៀបចំមាតិកាសម្រាប់ផ្សព្វផ្សាយលើបណ្តាញសង្គមរបស់ខ្លួនផងដែរ៕ ដោយ ៖ វិន ឈុនហ៊ាត
Account
Security
Favourite Content