សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គ្រឹះស្ថានមីក្រូហិរញ្ញវត្ថុ អិលអូអិលស៊ី ដែលជាស្ថាប័នឈានមុខគេមួយនៅកម្ពុជា បានទទួលបណ្ណសរសើរពីអាជ្ញាធរប្រយុទ្ធប្រឆាំងគ្រឿងញៀន ដែលប្រគល់ដោយវត្តមានដ៏ខ្ពង់ខ្ពស់របស់ឧបនាយករដ្ឋមន្ត្រី ស សុខា ជាមួយអត្ថន័យដែលបានសរសេរយ៉ាងដូច្នេះថា «សូមកោតសរសើរចំពោះថ្នាក់ដឹកនាំ និងបុគ្គលិកទាំងអស់នៃគ្រឹះស្ថានមីក្រូហិរញ្ញវត្ថុ អិលអូអិលស៊ី LOLC (ខេមបូឌា) ដែលមានស្នាដៃឆ្នើមចូលរួមយ៉ាងសកម្មក្នុងការងារប្រយុទ្ធប្រឆាំងគ្រឿងញៀនឆ្នាំ២០២៤កន្លងមក»។
កម្មវិធីនេះត្រូវបានរៀបចំឡើងដោយរាជរដ្ឋាភិបាលកម្ពុជា ក្នុងគោលបំណងបើកកិច្ចប្រជុំផ្សព្វផ្សាយពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១០ និងមានវត្តមានអញ្ជើញចូលរួមដ៏ខ្ពង់ខ្ពស់ពី ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ។
គួរបញ្ជាក់ផងដែរថា គ្រឹះស្ថានមីក្រូហិរញ្ញវត្ថុ អិលអូអិលស៊ី តែងតែសហការជាមួយអាជ្ញាធរប្រយុទ្ធប្រឆាំងគ្រឿងញៀន ក្នុងការចូលរួមផ្សព្វផ្សាយអំពីយុទ្ធនាការប្រយុទ្ធប្រឆាំងគ្រឿងញៀន តាមរយៈការចែកជូននូវខិតប័ណ្ណ ស្ទីគឃ័រ សម្ភារផ្សព្វផ្សាយមួយចំនួនតាមរយៈការតាំងពិព័រណ៍ ផ្ទាំងរូបភាព បដាសារព្រមាន សៀវភៅចំណេះដឹងពីគ្រោះថ្នាក់នៃគ្រឿងញៀន និងវត្ថុអនុស្សារីយ៍ផ្សេងៗរួមមាន មួក ប្រតិទិន ឆ័ត្រ ផ្លិត កែវ សម្រាប់ចែកជូន និងផ្សព្វផ្សាយបន្តដល់ក្រុមគ្រួសារ មិត្តភក្តិ និងមនុស្សជាទីស្រឡាញ់កុំឱ្យធ្លាក់ចូលទៅក្នុងអន្ទាក់នៃគ្រឿងញៀន។
បណ្ណសរសើរនេះ បានឆ្លុះបញ្ចាំងឱ្យឃើញថា អិលអូអិលស៊ី មិនត្រឹមតែជាគ្រឹះស្ថានមីក្រូហិរញ្ញវត្ថុដែលផ្ដល់ដំណោះស្រាយហិរញ្ញវត្ថុដែលឆ្លើយតបទៅនឹងតម្រូវការប្រជាជនកម្ពុជាប៉ុណ្ណោះទេ ប៉ុន្តែថែមទាំងបានយកចិត្តទុកដាក់ទៅលើបញ្ហាសង្គម ក៏ដូចជាសុខុមាលភាពប្រជាជនផងដែរ។
ឯកឧត្តមសន្តិបណ្ឌិត នេត សាវឿន បានព្រមានពីគ្រោះថ្នាក់ដែលការប្រើប្រាស់គ្រឿងញៀនបង្កឡើងដល់សង្គម បុគ្គល និងក្រុមគ្រួសាររបស់ពួកគេ។ បញ្ហាគ្រឿងញៀនបានក្លាយជាបញ្ហាសកល មិនមែនសម្រាប់តែប្រទេសកម្ពុជាទេ គឺសម្រាប់មនុស្សគ្រប់ជាតិសាសន៍។
ឯកឧត្តមបានបន្តថា៖
«ស្របជាមួយបញ្ហាអសន្តិសុខសកល ដែលកំពុងកើតឡើងផងនោះ ក្រុមឧក្រិដ្ឋជនទុច្ចរិត បានឆ្លៀតឱកាសបង្កើនសកម្មភាព និងឧបាយកលរបស់ខ្លួនក្នុងការផលិត ចែកចាយ ជួញដូរ និងចរាចរ ជាពិសេសនៅតំបន់ ត្រីកោណមាស និងអឌ្ឍច័ន្ទមាស។ ដើម្បីឆ្លើយតបទៅនឹងបញ្ហាដ៏ស្មុគស្មាញនេះ រាជរដ្ឋាភិបាលកម្ពុជា នៅតែប្តេជ្ញាចិត្តយ៉ាងមុតមាំក្នុងការដោះស្រាយបញ្ហាគ្រឿងញៀនជាអាទិភាពកំពូល តាមរយៈគោលនយោបាយ យុទ្ធសាស្ត្រ និងវិធីសាស្រ្តគ្រប់ជ្រុងជ្រោយ ដើម្បីដោះស្រាយបញ្ហាប្រឈម និងការពារប្រទេសកម្ពុជា ជាសង្គមស្អាតស្អំ ជៀសផុតពីឧបសគ្គដែលគ្រឿងញៀនបង្ករឡើងក្នុងការអភិវឌ្ឍន៍ប្រទេសជាតិ»។
ក្នុងនាមជាគ្រឹះស្ថានមីក្រូហិរញ្ញវត្ថុដែលមានទំនួលខុសត្រូវមួយនៅក្នុងសង្គម អិលអូអិលស៊ី ប្តេជ្ញាចិត្តថានឹងបន្តសហការជាមួយអាជ្ញាធរប្រយុទ្ធប្រឆាំងគ្រឿងញៀនជាបន្តបន្ទាប់ក្នុងការចូលរួមផ្សព្វផ្សាយ និងលុបបំបាត់ការប្រើប្រាស់គ្រឿងញៀន ដែលបង្កឲ្យមានប៉ះពាល់ទៅលើសុខភាពផ្ទាល់ខ្លួន ហើយជះឥទ្ធិពលទៅលើគ្រួសារ និងសង្គមជាតិទាំងមូលផងដែរ៕
Account
Security
Favourite Content