សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ធំ ៖ ស្រាលម៉ើ ជាផលិតកែច្នៃថ្មីដែលត្រូវបានផលិតឡើងដោយសិប្បកម្មមួយនៅក្នុងខេត្តកំពង់ធំ ហើយបានដាក់លក់ជាផ្លូវការនៅឆ្នាំ២០២២ ខណៈដែលបច្ចុប្បន្ននេះ បាន និងកំពុងចែកចាយយ៉ាងទូលាយស្ទើរទូទាំងប្រទេសកម្ពុជា ជាពិសេស ការដាក់តាំងបង្ហាញលក់នៅតាមបណ្តាផ្សារទំនើបធំៗគួរឱ្យកត់សម្គាល់។
អ្នកស្រី ឆុង សោភា ម្ចាស់សិប្បកម្មផលិតស្រាលម៉ើ S D F មានទីតាំងនៅភូមិសាលាឃុំ ឃុំទ្រៀល ស្រុកតាំងគោក ខេត្តកំពង់ធំ បានប្រាប់ AMS ឱ្យដឹងថា ៖ បន្ទាប់ពីទទួលបាននូវបទពិសោធន៍ក្នុងការផលិត ក៏ដូចជាការជ្រៀតចូលនៅក្នុងទីផ្សារដោយមានការប្រកួតប្រជែងជាមួយផលិតដទៃទៀត ជាពិសេសប្រភេទស្រាដែលនាំចូលមកពីក្រៅប្រទេស បច្ចុប្បន្ននេះ សិប្បកម្មបានធ្វើការអភិវឌ្ឍទៅលើផលិតផលរបស់ខ្លួនយ៉ាងយកចិត្តទុកដាក់ ទាំងរសជាតិ គុណភាព សុវត្ថិភាព ក៏ដូចជាការវេចខ្ចប់ កាន់តែល្អប្រសើរជាងមុន។
អ្នកស្រីបានបញ្ជាក់ថា ៖
«សម្រាប់បច្ចុប្បន្ននេះ យើងបានចេញនូវផលិតផលថ្មី គឺ ស្រាលម៉ើលក្ខណៈ Premium ដោយបានកែតម្រូវរសជាតិកាន់តែឆ្ងាញ់ និងទាក់ទាញជាងមុនស្របតាមការចង់បានរបស់អតិថិជន ដូចជា បន្ថយជាតិផ្អែម មានកម្រិតអាល់កុលខ្ពស់ជាងមុន ដែលការអភិវឌ្ឍនេះត្រូវបានធ្វើឡើងទៅលើស្រាលម៉ើទាំង២រសជាតិ គឺរសជាតិដើម និងរសជាតិស្នេហ៍គ្រាដំបូង ជាពិសេស យើងបានដាក់លក់នៅតាមបណ្ដាផ្សារទំនើបធំៗ ដូចជា អ៊ីអនទាំង ៣ ទីតាំង និងតាមផ្សារម៉ាតដទៃទៀតផងដែរ»។
អ្នកស្រីបន្ថែមថា ចំពោះការវេចខ្ចប់ក៏ត្រូវបានកែសម្រួលជាថ្មី ទាំងប្រភេទដប និងចំណុះ ដោយក្នុងនោះ ចំណុះ ៣៧៥មីលីលីត្រ លក់ក្នុងតម្លៃ ៣០០០០រៀល សម្រាប់ប្រភេទធម្មតា ឯ Premium តម្លៃ ៣៥០០០រៀល និងដបចំណុះ ៧៥០មីលីលីត្រ លក់តម្លៃ ៦០០០០រៀលចំពោះប្រភេទធម្មតា និងតម្លៃ ៦៥០០០រៀលចំពោះស្រាលម៉ើ Premium។
ពាក់ព័ន្ធនឹងដំណាក់កាល និងបច្ចេកទេសនៃការផលិតវិញ ម្ចាស់សិប្បកម្មខាងលើនេះបានរៀបរាប់ថា នៅក្នុងចង្វាក់ផលិតកម្ម គឺមានចែកចេញជា ២ គឺដំណាក់កាលផលិត និងដំណាក់កាលបន្ទំ ដែលការបន្ទំនេះផងដែរ ទុកកាន់តែយូរកាន់តែល្អ ហើយបើរាប់ចាប់ពីការផលិតរហូតដល់អាចច្រកដបបាន គឺត្រូវប្រើរយៈពេលប្រមាណ ៣ខែទើបទទួលបានផលិតផលសម្រេច ខណៈដែលផ្លែលម៉ើ ១គីឡូក្រាមអាចចម្រាញ់បានស្រា ១លីត្រ។
ចំពោះវត្ថុធាតុដើមក្នុងការផលិតស្រាលម៉ើ រួមមាន ផ្លែលម៉ើស្រស់ ទឹកឃ្មុំ និងតំបែរ ដែលជាវត្ថុធាតុដើមក្នុងស្រុក លើកលែងតែតំបែរដែលជាទំនិញនាំចូល។ ចំពោះការផ្គត់ផ្គង់ផ្លែលម៉ើ អ្នកស្រី សោភា បានអះអាងថា មិនមានបញ្ហាខ្វះខាតនោះឡើយដោយសារមានចំការលម៉ើធំៗទាក់ទងមកសហការច្រើន ពោលគឺឱ្យតែស្រាមានទីផ្សារគឺមិនខ្វះវត្ថុធាតុដើមនោះឡើយ។
គួររំឭកដែរថា ស្រាលម៉ើ S D F ជាយីហោដែលបានចាប់ផ្ដើមស្រាវជ្រាវ និងផលិតនៅឆ្នាំ២០២១ និងចេញលក់ជាផ្លូវការនៅចុងឆ្នាំ២០២២ ។ នៅក្នុងកិច្ចដំណើរការចាប់ផ្ដើមផលិតនៅឆ្នាំ២០២១ គឺផលិតក្នុងបរិមាណតិចតួចប៉ុណ្ណោះ ប៉ុន្តែដោយមានការកើនឡើងនូវចំនួនអតិថិជនដែលគាំទ្រ សិប្បកម្មបានចាប់ផ្តើមបង្កើនការផលិតបន្តិចម្ដងៗ រហូតមានការផ្គត់ផ្គង់នៅតាមបណ្តាហាងលក់ភេសជ្ជៈ ម៉ាត ជាពិសេសនៅក្នុងផ្សារទំនើបធំៗ ដូចជា ផ្សារទំនើបអ៊ីអន ទាំង៣ទីតាំងក្នុងរាជធានីភ្នំពេញតែម្ដង៕
Account
Security
Favourite Content