គ្រាន់តែនិយាយដល់ផ្លែបំពេញរាជ្យ គេតែងតែនឹកឃើញដ​​ល់រសជាតិផ្អែម ជូរ និងចត់ របស់ផ្លែឈើប្រភេទនេះ ដែលគេនិយមទទួលទានជាគ្រឿងម្ជូរ ឬត្រាំប្រឡាក់អំបិលដើម្បីបង្កើនរសជាតិឆ្ងាញ់យ៉ាងជក់មាត់ទើបធ្វើឱ្យដំណាំប្រភេទនេះមានតម្រូវការទីផ្សារខ្ពស់ និងតម្លៃថ្លៃគួរសម។

អ្នកស្រី តូ កក្កដា ជាអាជីវករលក់ផ្លែបំពេញរាជ្យម្នាក់នៅភូមិបឹងព្រួលលើ ឃុំបឹងព្រួល ស្រុកត្បូងឃ្មុំ ខេត្តត្បូងឃ្មុំ បានរៀបរាប់ប្រាប់ AMS Economy ឱ្យដឹងថា៖

«តាមពិតទៅយើងលក់ផ្លែឈើតាមរដូវកាល ដែលប្រមូលទិញមកពីកសិករក្នុងតំបន់យើងនេះផ្ទាល់តែម្ដង ហើយបំពេញរាជ្យយើងទើបតែលក់ថ្មីៗនេះទេ ដោយសារនៅពេលចុះទៅតាមភូមិឃើញបំពេញរាជ្យផ្លែល្អ ទើបទទួលទិញពីបងប្អូនកសិករយើង»។

អ្នកស្រីបន្ថែមថា៖

«បំពេញរាជ្យអាចលក់បានក្នុងតម្លៃ ៦០០០រៀល ក្នុង១គីឡូក្រាម ចំណែកបំពេញរាជ្យមួយដើមអាចបេះបានចន្លោះពី ៣០-៤០គីឡូក្រាម ហើយនៅពេលវាទុំភាគច្រើននៅខែឧសភានេះផ្ទាល់តែម្ដង ដែលយើងដើរបេះ និងផុសលក់តាមបណ្ដាញសង្គមផង បោះឱ្យតាមម៉ូយនៅតាមខេត្តផ្សេងៗដូចជា ព្រះសីហនុ កំពង់ស្ពឺ បាត់ដំបង តាកែវ និងភ្នំពេញផងដែរ»។  

ពាក់ព័ន្ធនឹងអាជីវកម្មនេះដែរ អ្នកស្រីក៏បានលើកឡើងពីផលលំបាកមួយចំនួនដែរថា អ្វីដែលយើងប្រឈមភាគច្រើនទាក់ទងនឹងការដឹកជញ្ជូន ដែលយើងត្រូវផ្ញើទៅតាមខេត្តឆ្ងាយៗ តាមរយៈសេវាកម្មដឹកជញ្ជូន ធ្វើឱ្យផលិតផលខ្លះអាចខូចជាំ។

គួររំឭកដែរថា ម្ចាស់អាជីវកម្មខាងលើបានចាប់ផ្ដើមអាជីវកម្មលក់ផ្លែឈើហូបផ្លែនេះនៅឆ្នាំ២០២១ ក្រៅពីបំពេញរាជ្យ អ្នកស្រី កក្កដាក៏មានលក់នូវផ្លែឈើ និងដំណាំហូបផ្លែផ្សេងទៀតដូចជា ចេកក្រមួន ឪឡឹកលឿង ស្វាយ និងប៉ិកួៈ ដែលជាកសិផលក្នុងស្រុក ប្រមូលទិញពីបងប្អូនក្នុងតំបន់មានរសជាតិ គុណភាព និងសុវត្ថិភាពដល់អ្នកទទួលទាន។

គួរបញ្ជាក់ដែរថា បំពេញរាជ្យជាផ្លែឈើហូបផ្លែមានរសជាតិជូរអែម និងផ្ដល់អត្ថប្រយោជន៍ចំពោះអ្នកទទួលទានដូចជា ផ្ទុកនូវវីតាមីន C  ជួយការពាររាងកាយពីជំងឺផ្សេងៗ ផ្ទុកជាតិដែក ជួយបង្កើនកោសិកាឈាមក្រហមក្នុងរាងកាយ ផ្ទុកជាតិសរសៃ និងអ៊ីដ្រាតជួយសម្រួលដល់ប្រព័ន្ធរំលាយអាហារ និងការបន្ទោរបង់ ជួយក្នុងការសម្រកទម្ងន់ ផ្ទុកជាតិកាលស្យូម ជួយបំប៉នឆ្អឹង ជួយការពារពីជំងឺពុកឆ្អឹង ផ្ទុកជាតិប៉ូតាស្យ៉ូមជួយដល់ប្រព័ន្ធសរសៃប្រសាទ ហើយគេក៏អាចយកវាទៅផ្សំធ្វើជាឱសថសម្រាប់ព្យាបាលជំងឺថែមទៀតផង៕