សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម ហៅកាត់ថា ARDB បានថ្លែងឱ្យដឹងថា គិតត្រឹមត្រីមាសទី១ឆ្នាំ២០២៤ ធនាគារ មានសំពៀតឥណទានសរុបចំនួន ៤៣១ លានដុល្លារអាមេរិក ក្នុងនោះសំពៀតឥណទានបៃតងសរុប១៨លានដុល្លារអាមេរិក ដែលបានគាំទ្រដល់វិស័យស្រូវអង្ករ និងបន្លែសុវត្ថិភាពនៃវិស័យកសិកម្ម។
ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម និងជាអនុប្រធានក្រុមប្រឹក្សាភិបាលនៃសមាគម គ្រឹះស្ថានហិរញ្ញវត្ថុអភិវឌ្ឍន៍ក្នុងតំបន់អាស៊ីប៉ាស៊ីហ្វិក ADFIAP បានថ្លែងរបាយការណ៍នេះ ក្នុងពិធីបើកកិច្ចប្រជុំប្រចាំឆ្នាំសមាគមគ្រឹះស្ថានហិរញ្ញវត្ថុអភិវឌ្ឍន៍ក្នុងតំបន់អាស៊ីប៉ាស៊ីហ្វិក លើកទី៤៧» នៅថ្ងៃទី១៥ ខែឧសភា ឆ្នាំ២០២៤ ក្រោមប្រធានបទ «តួនាទីរបស់ DFIs ក្នុងប្រព័ន្ធអេកូហិរញ្ញវត្ថុប្រកបដោយនិរន្តរភាព៖ ការដាំដុះអាកាសធាតុឆ្លាតវៃ និងអនាគតប្រកបដោយចីរភាព»។
ក្នុងវេទិកានោះ ឯកឧត្តម បានគូសបញ្ជាក់ថា ក្នុងនាមកម្ពុជា ជាប្រទេសផលិត និងនាំចេញកសិផលដ៏សំខាន់មួយក្នុងពិភពលោក កម្ពុជាក៏មានការប្តេជ្ញាចិត្តខ្ពស់ក្នុងការធ្វើបរិវត្តកម្មវិស័យកសិកម្មឱ្យកាន់តែទំនើប មានផលិតភាព និងភាពធន់ខ្ពស់ជាងមុននឹងអាកាសធាតុផងដែរ ។ ជាការកត់សម្គាល់ វិស័យកសិកម្ម ត្រូវបានកំណត់ជាអាទិភាពគន្លឹះមួយ ក្នុងការលើកកម្ពស់ការអភិវឌ្ឍប្រកបដោយភាពធន់ ចីរភាព និងបរិយាប័ន្ន ក្នុងយុទ្ធសាស្ត្របញ្ចកោណ ណាក់កាលទី១ ។
ឯកឧត្តមបណ្ឌិត កៅ ថាច បានបញ្ជាក់ថា ៖ កិច្ចប្រជុំនេះ គឺដើម្បីបង្កើនកិច្ចសហប្រតិបត្តិការ និងពង្រឹងភាពជាដៃគូរវាងស្ថាប័នហិរញ្ញប្បទានអភិវឌ្ឍន៍ក្នុងតំបន់អាស៊ីប៉ាស៊ីហ្វិក ដោយផ្តល់ឱកាសសម្រាប់កម្ពុជា ក្នុងការចែករំលែកបទពិសោធន៍ និងទស្សនៈស្តីពីការអនុវត្តកម្មវិធីហិរញ្ញប្បទានពិសេសរបស់ខ្លួន។
សូមជម្រាបថា ARDB នៃប្រទេសកម្ពុជាបានក្លាយជាសមាជិករបស់ ADFIAP តាំងពីឆ្នាំ ២០០៥។ ARDB បានចូលរួមយ៉ាងសកម្មក្នុងការអនុវត្តគោលនយោបាយរបស់រដ្ឋាភិបាលកម្ពុជា ក្នុងការផ្តល់ហិរញ្ញប្បទានពិសេសដើម្បីគាំទ្រតួអង្គទាំងអស់នៅក្នុងខ្សែសង្វាក់អភិវឌ្ឍន៍កសិកម្ម កសិឧស្សាហកម្ម និងសេដ្ឋកិច្ចសង្គម។
រាជរដ្ឋាភិបាលកម្ពុជា បានដាក់ចេញគោលនយោបាយជាតិអភិវឌ្ឍន៍វិស័យកសិកម្ម ឆ្នាំ២០២២-២០៣០ ជាវិធានការជាក់លាក់ សំដៅជំរុញអន្តរកាលឆ្ពោះទៅរកប្រព័ន្ធស្បៀងដែលមានលក្ខណៈទំនើប និងប្រកបដោយចីរភាព តាមរយៈការធ្វើទំនើបកម្ម និងការធ្វើពាណិជ្ជនីយកម្ម ខ្សែច្រវាក់តម្លៃកសិកម្ម ការលើកកម្ពស់ការវិនិយោគសាធារណៈ និងឯកជន នៅក្នុងវិស័យកសិកម្ម ការបង្កើនភាពធន់ទៅនឹងការប្រែប្រួលអាកាសធាតុ និងការពង្រឹងការគ្រប់គ្រងស្ថាប័ន និងការកែទម្រង់បទប្បញ្ញត្តិ ។
ធនាគារ ARDB បាន និងកំពុងសហការយ៉ាងជិតស្និទ្ធិ ជាមួយដៃគូយុទ្ធសាស្ត្រជាតិ និងអន្តរជាតិ ដើម្បីផ្សារភ្ជាប់គោលដៅរបស់ខ្លួនជាមួយនឹងគោលដៅអភិវឌ្ឍន៍ប្រកបដោយចីរភាព ។ នៅឆ្នាំ២០២២ ធនាគារ ARDB បានបង្កើតនាយកដ្ឋានហិរញ្ញប្បទានបៃតង ក្នុងគោលបំណងចូលរួមកាត់បន្ថយផលប៉ះពាល់ដល់បរិស្ថាន បង្កើនភាពធន់ទៅនឹងការប្រែប្រួលអាកាសធាតុ និងជំរុញការចាប់យកបច្ចេកវិទ្យាថ្មីៗ ដែលអាចធ្វើឱ្យវិស័យកសិកម្មសម្របខ្លួនបានទៅនឹងការប្រែប្រួលអាកាសធាតុ តាមរយៈការផ្តល់ទុនបង្វិល និងការគាំទ្រដល់ការវិនិយោគក្នុងខ្សែច្រវាក់តម្លៃកសិកម្ម ។
គួរបញ្ជាក់ថា ធនាគារ ARDB នឹងបន្តកិច្ចខិតខំប្រឹងប្រែងសហការជាមួយដៃគូអភិវឌ្ឍន៍ទាំងក្នុងស្រុក និងក្រៅប្រទេស ដើម្បីកៀរគរធនធានបន្ថែមសម្រាប់គាំទ្រគម្រោងបៃតងក្នុងវិស័យកសិកម្ម ព្រមទាំងសម្រេចបានគោលដៅធំៗរបស់ខ្លួន ដែលរួមមានការក្លាយជាស្ថាប័នដែលទទួលបានហិរញ្ញប្បទានផ្ទាល់ពីមូលនិធិអាកាសធាតុបៃតង (Accredited Entity) និងការក្លាយជាធនាគារអាកាសធាតុជាតិនាពេលអនាគត ។
សូមជម្រាបថា ការធ្វើជាម្ចាស់ផ្ទះនៃកិច្ចប្រជុំប្រចាំឆ្នាំរបស់ ADFIAP នឹងផ្តល់ផលប្រយោជន៍ដល់ប្រទេសជាតិ លើកកម្ពស់តួនាទីរបស់កម្ពុជានៅលើឆាកអន្តរជាតិ ស្របជាមួយនឹងយុទ្ធសាស្ត្រ និងគោលនយោបាយរបស់រាជរដ្ឋាភិបាលកម្ពុជា ធនាគារ ARDB បានចូលរួមយ៉ាងសកម្មក្នុងការលើកកម្ពស់លទ្ធភាពទទួលបានហិរញ្ញប្បទានបៃតង និងហិរញ្ញប្បទានអភិវឌ្ឍន៍ ៕
Account
Security
Favourite Content