ក្រសួងបរិស្ថានគ្រោងនឹងរៀបចំវេទិកាជាតិកេសរកូលលើកទី៣ ក្នុងខែមីនា ឆ្នាំ២០២៣ខាងមុខនេះ ដើម្បីបន្តបញ្ជា្របការយល់ដឹង និងបន្តការអភិរក្សរុក្ខជាតិកេសរកូលនៅកម្ពុជាឱ្យបានកាន់តែច្រើន​ប្រភេទថែមទៀត។ នេះបើតាមការបញ្ជាក់របស់អ្នកនាំពាក្យក្រសួងបរិស្ថាន។

ឯកឧត្តម នេត្រ ភក្ត្រា បានឱ្យដឹងទៀតថា វេទិកានេះនឹងមានការចូលរួមពីសំណាក់ក្រសួងស្ថាប័នពាក់ព័ន្ធ ជាពិសេសបងប្អូនអាជីវករដែលមានអាជីវកម្មលក់ផ្កា មិនថាផ្កាបានមកពីការបង្កាត់ ឬផ្កាដែលមានលក់នៅលើទីផ្សារ។ ជាមួយគ្នានេះដែរ ក្រសួងបរិស្ថាននឹងនាំយកនូវប្រភេទកេសរកូលព្រៃទៅដាក់តាំងបង្ហាញជូនអ្នកចូលរួមផងដែរ។

យ៉ាងណាមិញ ការរៀបចំវេទិកានេះឡើងគឺស្ថិតក្រោមគោលបំណងដូចជា ដើម្បីបង្ហាញពីភាព​សម្បូរបែបនៃកេសរកូលរបស់ប្រទេសកម្ពុជា ខណៈដែលបច្ចុប្បន្ននេះបើតាមការស្មានមានកេសរកូល​​ប្រមាណជា ៥០០ប្រភេទ ​បានមកពីការសិក្សាប្រមូលរបស់ក្រុមមន្ត្រីជំនាញយកចេញពី​ខេត្តព្រះសីហនុ កំពត កោះកុង ខេត្តព្រះវិហារ ខេត្តសៀមរាប។

បើតាមការបញ្ជាក់បន្ថែមរបស់ឯកឧត្តម នេត្រ ភក្រ្តា បច្ចុប្បន្ននេះកម្ពុជាបានប្រមូលកេសរកូលបាន​ចំនួន ៥ពាន់សំណាក ក្នុងនោះមានកេសរកូលចំនួន ២១០ប្រភេទ ហើយកេសរកូលដែលបានកំណត់អត្តសញ្ញាណជាក់លាក់គឺមានជាង ១០០ប្រភេទ។

អ្នកនាំពាក្យរូបនេះបានបន្តថា៖

“គោលបំណងទី២គឺ ដើម្បីផ្សព្វផ្សាយឱ្យបានដឹង នឹងបណ្ដុះស្មារតី​ប្រជាពលរដ្ឋឱ្យស្រឡាញ់ធនធានធម្មជាតិ ជាពិសេសអ្វីដែលយើងមាន ហើយវេទិការបស់​យើងនេះ​ក៏ទាញនូវការចាប់អារម្មណ៍ជារួមដល់សាធារណៈជន ក៏ដូចជាអ្នកពាក់ព័ន្ធអំពីការព្រួយ​បារម្ភថា​ យើងអាចនឹង​បាត់បង់ប្រភេទកេសរកូល ដោយសារតែកន្លងទៅ នេះមានការធ្វើអាជីវកម្ម​ហួស​ប្រមាណទៅលើកេសរកូលព្រៃ។ រីឯគោលបំណងទី៣គឺដើម្បីទប់ស្កាត់កុំឱ្យមានការធ្វើអាជីវកម្មហួសជ្រុលទៅលើកេសរកូលព្រៃ គឺយើងបានចេញនូវសេចក្ដីណែនាំដល់រដ្ឋបាលរាជធានីខេត្តដែលមានតំបន់ការពារធម្មជាតិ ជាពិសេសគឺមន្ត្រីឧទ្យានុរក្សនៃមន្ទីរ បរិស្ថានសូមឱ្យពួកគាត់ទៅគ្រប់គ្រងឱ្យបានល្អ ហើយក៏​ជូនដំណឹងដល់ពលរដ្ឋកុំឱ្យធ្វើអាជីវកម្មហួសប្រមាណ”

ឯកឧត្តមបន្តថា កម្ពុជាយើងត្រូវការទាំងផែនការ និងការអនុវត្តដើម្បីអាចថែរក្សា និងអភិរក្សកេសរ​កូល​ឱ្យ​​គង់វ​ង្ស។ ហើយឯកឧត្តមសង្ឃឹមថា មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលេន អាចជាកន្លែងផ្ដល់ពូជដើម្បីផ្គត់ផ្គង់ទៅតម្រូវការក្នុងស្រុកបន្ថែម ខណៈដែលបច្ចុប្បន្នមានការ​នាំចូលផ្កាមកច្រើន។ ម្យ៉ាងទៀត ជាមួយនឹងជីវភាពពលរដ្ឋដែលប្រសើរជាងមុន ពួកគេអាចមាន​លទ្ធភាពតុបតែងផ្ទះដោយប្រើប្រាស់កេសរកូលផងដែរ។ គួរបញ្ជាក់ថា វេទិកាជាតិកេសរកូលលើកទី២កន្លងទៅ បានប្រព្រឹត្តិទៅក្នុងខែឧសភា ឆ្នាំ២០២២ ស្ថិតនៅអគារខេមរានី សហភាពសហព័ន្ធយុវជនកម្ពុជា (ស.ស.យ.ក)។ ក្នុងនោះផងដែរ ក៏មានការ ចូលរួមពីមន្ត្រីឧទ្យានុរក្ស ប្រជាពលរដ្ឋ មន្ត្រីបរិស្ថាន ម្ចាស់អាជីវកម្មលក់ផ្កា ក៏ដូចជាអ្នកថតរូបផ្កា សម្រាប់ផ្សព្វផ្សាយជាដើម៕ អត្ថបទដោយ ៖ កែវ បុស្បា