សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត ជាខេត្តជាប់មាត់សមុទ្រមួយដែលសម្បូរទៅដោយធនធានធម្មជាតិយ៉ាងសម្បូរបែប ជាពិសេសធនធានដែលទទួលបានពីសមុទ្រ ជាពិសេសជីវចម្រុះក្នុងសមុទ្រតែម្ដង ដែលសូម្បីតែទឹកសមុទ្រក៏អាចបង្ហូរចូលស្រែផលិតជាអំបិលដ៏មានគុណភាពសម្រាប់ផ្គត់ផ្គង់នៅក្នុងស្រុក និងនាំចេញទៅក្រៅប្រទេសផងដែរ។ ជាក់ស្ដែង បច្ចុប្បន្ននេះ មានក្រុមហ៊ុនខ្នាតមធ្យមមួយកន្លែងដែលស្ថិតនៅក្នុងខេត្តដ៏មានសក្ដានុពលមួយនេះ កំពុងមមាញឹកក្នុងការផលិតអំបិល និងទឹកត្រី ដែលច្នៃពីធនធានទទួលបានពីសមុទ្រសម្រាប់ផ្គត់ផ្គង់នៅលើទីផ្សារ។
ង៉ូវហេងកំពត ជាយីហោទឹកត្រីមួយដែលបានផលិតចេញពីការផ្អាប់ត្រីសមុទ្រ (កាកើម) ជាមួយនឹងអំបិលកំពត ធ្វើឱ្យផលិតផលទឹកត្រីនេះមានទាំងគុណភាព និងរសជាតិឆ្ងាញ់ប្លែក រហូតបានក្លាយជាផលិតផលសម្គាល់ភូមិសាស្រ្តថែមទៀតផង។
ឧកញ៉ា ចាន់ ស៊ីថា អគ្គនាយកក្រុមហ៊ុនផលិតទឹកត្រី ង៉ូវហេងកំពត បានមានប្រសាសន៍ថា ៖
«នៅពេលបច្ចុប្បន្ន ផលិតផលទឹកត្រីរបស់យើងហាក់ទទួលបានការគាំទ្រពីទីផ្សារក្នុងស្រុកច្រើន ជាពិសេសពីអ្នកដែលគាត់បានដឹងតាមរយៈការផ្សព្វផ្សាយ ធ្លាប់បានប្រើប្រាស់ ដឹងពីគុណភាពផលិតផលក្នុងស្រុក អាចទុកចិត្តបាន និងជួយផ្សព្វផ្សាយបន្តថែមទៀតផង»។
លោកឧកញ៉ាបន្តថា៖
«អាជីវកម្មយើងបង្កើតឡើងតាំងពីឆ្នាំ១៩៩៥ ដោយយកត្រីកាកើម និងអំបិលជាវត្ថុធាតុដើមចម្បងក្នុងការផលិតទឹកត្រី ធ្វើឱ្យផលិតផលរបស់យើងមានរសជាតិឈ្ងុយឆ្ងាញ់ បន្ទុំតាមបែបធម្មជាតិ១០០% ច្បាស់លាស់ទុកចិត្តបាន ទាំងក្លិន ពណ៌ និងរសជាតិឆ្ងាញ់ប្លែក រហូតត្រូវបានគេទទួលស្គាល់ជាផលិតផលសម្គាល់ភូមិសាស្ត្រប្រចាំខេត្តកំពត»។
លោកឧកញ៉ាបានបន្តឱ្យដឹងទៀតថា ចំពោះផលិតផលរបស់អាជីវកម្មខ្នាតធំមួយនេះបានផ្ដោតចម្បងទៅលើផលិតផលទឹកត្រី ទឹកស៊ីអ៊ីវ អំបិល និងម្រេចកំពតផ្ទាល់ ក្នុងការលក់ទាំងនៅលើទីផ្សារក្នុងស្រុក តាមផ្សារទំនើបទូទាំងប្រទេស និងកិច្ចសហការនាំចេញទៅក្រៅប្រទេស ដូចជា អាម៉េរិក អូស្ត្រាលី ជប៉ុន និងកូរ៉េជាដើម។ ក្រៅពីនេះ ក៏មានផលិតផលផ្សេងទៀតដូចជា ទឹកម្ទេស ទឹកសៀង ប្រេងខ្យង ទឹកខ្មេះ ជាដើម ដែលសុទ្ធសឹងជាផលិតផលមានតម្រូវការប្រើប្រាស់ប្រចាំថ្ងៃក្នុងការចម្អិនម្ហូបអាហារ។ តាមរយៈខ្សែចង្វាក់ផលិតកម្មនេះ សិប្បកម្មខាងលើបានចូលរួមចំណែកលើកកម្ពស់ជីវភាពដល់ប្រជានេសាទ និងក្រុមអ្នកផលិតអំបិលក្នុងខេត្តកំពត ក៏ដូចជាការផ្ដល់ការងារដល់កម្មករចំនួនផងដែរ។
យ៉ាងណាក៏ដោយ ជាមួយនឹងការទទួលបានប្រជាប្រិយភាព និងកេរ្តិ៍ដូចសព្វថ្ងៃ សិប្បកម្មមួយនេះក៏ធ្លាប់ជួបបញ្ហាប្រឈមមួយចំនួនផងដែរ ជាពិសេសផ្នែកដើមទុនបម្រុងក្នុងការពង្រីកផលិតកម្ម ក៏ដូចជាតម្លៃវត្ថុធាតុដើម, ការចំណាយថ្លៃដឹកជញ្ជូននៅមានកម្រិតខ្ពស់ ហើយការវេចខ្ចប់ទៀតសោតត្រូវទិញវត្ថុធាតុដើមនាំចូលពីក្រៅប្រទេសនៅឡើយ។ យ៉ាងណាមិញ អគ្គនាយកក្រុមហ៊ុនរូបនេះនៅតែមានឆន្ទៈក្នុងការផលិត ក៏ដូចជាអភិវឌ្ឍផលិតផលបន្ថែមទៀត ក្រោយទទួលបានការជួយគាំទ្រពីបងប្អូនក្នុងស្រុកជាច្រើន ដែលវាជាកម្លាំងចិត្តសម្រាប់ក្រុមហ៊ុន ជំរុញការផលិតឱ្យបានច្រើន បង្កើនគុណភាព រសជាតិ និងអនាម័យ ឱ្យស្របតាមកម្រិតស្តងដារ ដើម្បីធ្វើយ៉ាងណាអាចប្រកួតប្រជែងជាមួយផលិតផលនាំចូលពីក្រៅប្រទេស៕
Account
Security
Favourite Content