ក្រុមហ៊ុន ម៉េងលី ជេ. គួច អេឌ្យូខេសិន (MJQE) ដែលមានដូចជាមជ្ឈមណ្ឌលភាសា អេ អាយ អាយ (Aii) សាលារៀន អន្តរទ្វីប អាមេរិកាំង (AIS) និងសូហ្គូ (SOGO) មានសេចក្តីសោមនស្សក្នុងការប្រកាសពីការវិលត្រឡប់មកវិញនៃកម្មវិធី «មាគ៌ាឆ្ពោះទៅកាន់ពិភពលោក» ឬ «Window to the World» ដែលជាដំណើរទស្សនកិច្ចសិក្សាអប់រំនឹងប្រព្រឹត្តទៅចាប់ពីថ្ងៃទី១២ ដល់ថ្ងៃទី១៥ ខែមិថុនា ឆ្នាំ២០២៤។ កម្មវិធីនេះជាគំនិតផ្តួចផ្តើមនៃការដឹកនាំប្រកបដោយចក្ខុវិស័យ និងការណែនាំរបស់អ្នកឧកញ៉ា វេជ្ជបណ្ឌិត គួច ម៉េងលី ដែលជាស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន ដើម្បីផ្តល់ឱកាសដល់សិស្សានុសិស្សដែលមានជីវភាពលំបាកនៅតាមជនបទក្នុងប្រទេសកម្ពុជា មកទស្សនកិច្ចសិក្សានៅរាជធានីភ្នំពេញ។ ដំណើរទស្សនកិច្ចសិក្សានេះមានដូចជាការ ដំណើរទស្សនកិច្ចវប្បធម៌ ទស្សនកិច្ចសិក្សានៅទីតាំងប្រវត្តិសាស្ត្រមួយល្បីៗដើម្បីពង្រឹងការយល់ដឹងពីប្រទេសកម្ពុជា សាកលវិទ្យាល័យ និងការជួបពិភាក្សាជាមួយអ្នកអ្នកឧកញ៉ា វេជ្ជបណ្ឌិត គួច ម៉េងលី។

កម្មវិធីនេះ ចាប់ផ្តើមនៅឆ្នាំ២០១៩ ដោយបានឆ្លុះបញ្ចាំងពីចក្ខុវិស័យ របស់អ្នកឧកញ៉ា វេជ្ជបណ្ឌិត គួច ម៉េងលីចំពោះការអប់រំ។ ឆ្នាំនេះ ក្រុមហ៊ុន ម៉េងលី ជេ. គួច អេឌ្យូខេសិន សូមស្វាគមន៍សិស្សឆ្នើមចំនួន ២០ នាក់ ពីវិទ្យាល័យព្រៃទប់ ក្នុងខេត្តតាកែវ មកកាន់រាជធានីភ្នំពេញ នៃប្រទេសកម្ពុជាសម្រាប់មាគ៌ានៃការពង្រីកចំណេះដឹងរបស់ពួកគេ និងបណ្តុះក្តីសម្រៃរបស់ពួកគេ។ សិស្សទាំងនេះ ដែលភាគច្រើនប្រឈមមុខនឹងបញ្ហាប្រឈមសំខាន់ៗ ដូចជាភាពក្រីក្រ និងឱកាសពង្រឹងការសិក្សានៅមានកម្រិត។

អ្នកឧកញ៉ា វេជ្ជបណ្ឌិត គួច ម៉េងលី បានឆ្លុះបញ្ចាំងពីបេសកកម្មរបស់កម្មវិធីនេះថា៖ «វត្ថុបំណងរបស់ «មាគ៌ាឆ្ពោះទៅកាន់ពិភពលោក» គឺដើម្បីពង្រីកការយល់ដឹងរបស់យុវជនកម្ពុជា និងមើលឃើញពិភពលោកកាន់តែទូលាយជាងមុន។ តាមរយៈការនាំពួកគេទៅកាន់រាជធានីនេះ យើងសង្ឃឹមថានឹងបណ្តុះទឹកចិត្តដល់ពួកគេ ហើយបង្ហាញថាការអប់រំគឺពិតជា មាគ៌ាទៅរកលទ្ធភាពគ្មានដែនកំណត់។ កម្មវិធីនេះគឺជាផ្នែកមួយនៃបេសកកម្មរបស់យើងក្នុងការធានាថាកុមារគ្រប់រូបនៅក្នុងប្រទេសកម្ពុជាទទួលបានការអប់រំប្រកបដោយគុណភាព»។

នៅឆ្នាំនេះ សិស្សានុសិស្សនឹងស្វែងយល់អំពីប្រវត្តិសាស្រ្តដ៏សម្បូរបែបរបស់ប្រទេសកម្ពុជាជាមួយនឹងការទៅទស្សនាទីតាំងល្បីៗដូចជា ព្រះបរមរាជវាំង សារមន្ទីរជាតិ សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន(ស.ស.រ) វិមានឈ្នះឈ្នះ និងទីកន្លែងជាច្រើនទៀត។ ពួកគេនឹងស្វែងយល់ពីទិដ្ឋភាពសិក្សាជាមួយនឹងដំណើរទស្សនកិច្ចតាមសាកលវិទ្យាល័យកំពូលៗ ដើម្បីរៀបចំគម្រោងក្នុងពេលអនាគត។ ចំនុចសំខាន់នៃដំណើរទស្សនៈកិច្ចសិក្សាអប់រំនេះ គឺពិធីសំណេះសំណាល និងផ្តល់អនុសាសន៍ជូនសិស្សានុសិស្សផ្ទាល់ដោយ អ្នកឧកញ៉ា វេជ្ជបណ្ឌិត គួច ម៉េងលី ដើម្បីផ្តល់ឱកាសឱ្យសិស្សចូលរួមក្នុងកិច្ចសន្ទនាប្រកបដោយអត្ថន័យអំពីក្តីស្រមៃរបស់ពួកគេ និងតួនាទីដ៏សំខាន់នៃការអប់រំសម្រាប់អនាគត។

លោក តឹប វង្សដារ៉ា នាយកវិទ្យាល័យព្រៃទប់ បានបង្ហាញក្តីរំភើបរបស់គាត់ថា៖«វាគឺជាកិត្តិយសសម្រាប់សិស្សានុសិស្សរបស់យើងដែលត្រូវបានជ្រើសរើសចូលរួមក្នុងកម្មវិធីនេះ។ ខ្ញុំជឿជាក់ថាបទពិសោធមួយនេះនឹងបន្សល់ទុកនូវឥទ្ធិពលដ៏យូរអង្វែងដល់ជីវិតរបស់ពួកគេ និងផ្តល់នូវឱ្យពួកគេនូវការលើកទឹកចិត្ត និងទស្សនវិស័យដ៏ទូលំទូលាយលើអនាគតរបស់ពួកគេ»។

ស៊ុយ សិលា ជាសិស្សថ្នាក់ទី១០ និងជាសិស្សចូលរួមម្នាក់ក្នុងចំណោម២០នាក់បាននិយាយថា៖ «ខ្ញុំពិតជារំភើបណាស់ដែលបានចូលរួមក្នុងកម្មវិធីនេះ។ ខ្ញុំចង់ទៅទស្សនាសាកលវិទ្យាល័យនានាក្នុងរាជធានីភ្នំពេញ។ ខ្ញុំជឿជាក់ថា វានឹងជួយខ្ញុំក្នុងការជ្រើសរើសមុខវិជ្ជារបស់ខ្ញុំនៅពេលខ្ញុំចូលសាកលវិទ្យាល័យ។ កន្លែងដំបូងដែលខ្ញុំចង់ទៅគឺព្រះបរមរាជវាំង។ កម្មវិធីនេះនឹងពង្រឹងការយល់ឃើញរបស់ខ្ញុំ»។

ណី រតនា ជាសិស្សថ្នាក់ទី១១ និងជាអ្នកចូលរួមម្នាក់ដែរនោះក៏បានបន្ថែមថា៖ «ខ្ញុំនឹងចួលរួមយ៉ាងសកម្មនៅក្នុងកម្មវិធីនេះ និងរៀនសូត្រឱ្យបានច្រើនតាមដែលអាចធ្វើបាន។ ខ្ញុំចង់ទៅកន្លែងដែលខ្ញុំមិនធ្លាប់ទៅ ជាពិសេស វត្តភ្នំ»។

លោក ណី សុភា ជាឪពុករបស់សិស្ស ណី រតនា បាននិយាយទាំងមោទកភាពថា៖ «នេះពិតជាឱកាសដ៏ល្អសម្រាប់កូនស្រីរបស់ខ្ញុំ និងយុវជនកម្ពុជាឱ្យទៅមើលការអភិវឌ្ឍរបស់ទីក្រុង។ វាជាក្តីសុបិនរបស់កូនខ្ញុំ ក្នុងការទៅលេងកន្លែងប្លែកៗ ហើយខ្ញុំពុំទាន់មានលទ្ធភាពសម្រេចក្តីប្រាថ្នាកូនស្រីខ្ញុំបាននៅឡើយ។ សូមអរគុណដល់ អ្នកឧកញ៉ា វេជ្ជបណ្ឌិត គួច ម៉េងលី ដែលបានជួយកូនស្រីរបស់ខ្ញុំឱ្យសម្រេចក្តីស្រមៃនេះ»។

គោលបំណងរបស់កម្មវិធី «Window to the World» គឺជំរុញឱ្យមានការស្រលាញ់ការសិក្សា និងលើកទឹកចិត្តលើការសិក្សាពេញមួយជីវិតដល់សិស្សានុសិស្ស។ រៀបចំពួកគេឱ្យក្លាយជាពលរដ្ឋដែលមានចំណេះដឹង និងមានសមត្ថភាពពិតប្រាកដក្នុងការចូលរួមចំណែកជាវិជ្ជមានដល់សហគមន៍របស់ពួកគេ សង្គមកម្ពុជា និងនៅលើឆាកអន្តរជាតិ។
ក្រុមហ៊ុន ម៉េងលី ជេ. គួច អេឌ្យូខេសិន ប្តេជ្ញាចិត្តក្នុងការផ្តល់ការអប់រំដល់ប្រជាជនកម្ពុជា ប្រកបដោយគុណភាព វិន័យ និងសេវាកម្ម តាមរយៈមជ្ឈមណ្ឌលភាសា អេ អាយ អាយ (Aii) សាលារៀន អន្តរទ្វីប អាមេរិកាំង (AIS) និងសូហ្គូ (SOGO)។ Aii និង AIS គឺជាគ្រឹះស្ថានអប់រំឈានមុខគេរបស់ប្រទេសកម្ពុជា ដោយផ្តល់ជូននូវកម្មវិធីភាសាដ៏សម្បូរបែបលើជំនាញភាសាអង់គ្លេស ចិន និងថៃ និងការអប់រំចំណេះទូទៅ៕