ពិធីបើកដំណើរការជាផ្លូវការនូវសមាគមទឹកឃ្មុំនៅកម្ពុជាដំបូងគេបង្អស់បានប្រារព្ធឡើងដើម្បីប្រមូលផ្ដុំនូវអ្នកដែលមានសមត្ថភាព ចំណេះដឹង បទពិសោធន៍ និងជំនាញទាក់ទងនឹងទឹកឃ្មុំ ធ្វើយ៉ាងណាអាចចូលរួមជួយជំរុញកិច្ចសហប្រតិបត្តិការក្នុងការគាំទ្រ ផ្សព្វផ្សាយ និងអភិវឌ្ឍស្តង់ដារទឹកឃ្មុំកម្រិតជាតិ និងអន្តរជាតិ។
កម្មវិធីនេះត្រូវបានប្រារព្ធឡើងនៅព្រឹកថ្ងៃទី ២៦ ខែសីហា ចុងសប្ដាហ៍កន្លងទៅ នៅអគារមជ្ឈមណ្ឌលអភិវឌ្ឍធុរកិច្ច ដោយមានវត្តមានដ៏ខ្ពង់ខ្ពស់ពីសំណាក់ឯកឧត្តម គឹម សុន រដ្ឋលេខាធិការនៃក្រសួងកសិកម្ម រុក្ខាប្រមាញ់ និងនេសាទ ឯកឧត្តម ឡាំ គីមឡេង អនុរដ្ឋលេខាធិការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោកជំទាវ ប៉ុក ណាដា ប្រធានសហព័ន្ធស្ត្រីអ្នកជំនួញកម្ពុជា ឯកឧត្តមបណ្ឌិត តាន់ មុនីវណ្ណ អគ្គនាយករងក្រុមហ៊ុន ម៉ុង ឫទ្ធី គ្រុប និងជាសមាជិកក្រុមប្រឹក្សាភិបាលនៃសមាគមទឹកឃ្មុំកម្ពុជា ឯកឧត្តម គង់ សុវណ្ណ ទីប្រឹក្សាគណៈកម្មាធិការសុវត្ថិភាពចរាចណ៍ផ្លូវគោក និងជាសមាជិកក្រុមប្រឹក្សាភិបាលនៃសមាគមទឹកឃ្មុំកម្ពុជា ឯកឧត្ដម ជាង វុត្ថា ជំនួយការការក្រសួងប្រៃសណីយ៍ និងទូរគមនាគមន៍ និងជាសមាជិកក្រុមប្រឹក្សាភិបាលនៃសមាគមន៍ទឹកឃ្មុំនៅកម្ពុជា និងអ្នកតំណាង មកពីក្រសួងនានា ក៏ដូចជាអ្នកជំនាញដែលបានចូលរួមដោយផ្ទាល់ និងតាមរយៈ Zoom ផងដែរ។
ឆ្លៀតក្នុងឱកាសនេះ អ្នកស្រី សែម ស្រីតូច ប្រធានសមាគមទឹកឃ្មុំកម្ពុជា និងជាសមាជិកក្រុមប្រឹក្សាភិបាល បានមានប្រសាសន៍ថា កម្មវិធីថ្ងៃនេះ ជាការបើកទំព័រថ្មីនៃវត្តមានសមាគមទឹកឃ្មុំកម្ពុជា ទោះបីនៅមានភាពក្មេងខ្ចីក៏ពិតមែន តែផ្នែកសមត្ថភាព ចំណេះដឹង និងបទពិសោធរបស់សមាជិក អ្នកបច្ចេកទេស អ្នកជំនាញទឹកឃ្មុំ បរិស្ថាន សេដ្ឋកិច្ចបរិស្ថាន ជំនាញគ្រប់គ្រងសុវត្ថិភាពចំណីអាហារ ដែលសុទ្ធសឹងតែមានជំនាញ និងឆន្ទៈក្នុងការចូលរួមដំណើរការរបស់សមាគមទៅតាមយុទ្ធសាស្ត្រ បេសកកម្ម និងទស្សនៈវិស័យដែលបានកំណត់។
អ្នកស្រីបន្ថែមថា យើងក៏ស្នើសុំការចូលរួមគាំទ្រ ផ្សព្វផ្សាយ និងអភិវឌ្ឍទឹកឃ្មុំដែលត្រូវបានទទួលស្គាល់ស្តង់ដារគុណភាពជាតិ និងអន្តរជាតិ ដើម្បីផ្គត់ផ្គង់ទឹកឃ្មុំ និងផលិតផលបន្ថែមតម្លៃផ្សេងទៀតពីសត្វឃ្មុំទៅកាន់ទីផ្សារក្នុងស្រុក និងពិភពលោក ក៏ដូចជាចូលរួមគាំទ្រដល់ផែនការយុទ្ធសាស្ត្ររបស់រាជរដ្ឋាភិបាលកម្ពុជាស្ដីពីយន្តការស្ដារព្រៃឈើ និងទេសភាព (FLR) ផងដែរ។
គួរបញ្ជាក់ដែរថា សមាគមទឹកឃ្មុំកម្ពុជា ត្រូវបានទទួលស្គាល់ជាផ្លូវការនៅថ្ងៃទី ២៩ ខែឧសភា ឆ្នាំ២០២៣ ដោយមានចក្ខុវិស័យវែងឆ្ងាយក្នុងការអភិវឌ្ឍគុណភាពទឹកឃ្មុំនៅកម្ពុជាឱ្យក្លាយជាផលិតផលដែលមានគុណប្រយោជន៍សម្រាប់អ្នកប្រើប្រាស់ផង និងអាចមានគុណភាពអាចនាំចេញបាន ហើយសមាគមរបស់នេះនឹងមានជាការចែករំលែក ការបង្រៀន ក៏ដូចជាការផ្សព្វផ្សាយពីផលិតផល ការធ្វើទីផ្សារទឹកឃ្មុំប្រកបដោយនិរន្តរភាពផងដែរ៕