សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កម្ពុជាបានបញ្ចប់ការប្រមូលស្រូវស្រាលរដូវវស្សាលើផ្ទៃដី ៧៥ម៉ឺនហិកតា និងទទួលបានផលចំនួន ៣ លានតោន។ ការប្រមូលស្រូវរដូវវស្សាជាជំហានសំខាន់បន្ទាប់គឺនៅខែវិច្ឆិកា និងខែធ្នូ ឆ្នាំ២០២៣នេះ ដែលការប្រមូលផលលើផ្ទៃដីសរុបប្រមាណ ២,១ លានហិកតា ជាមួយនឹងការរំពឹងទទួលផលសរុបប្រមាណ ៦,៣ លានតោន។ នេះបើតាមការឱ្យដឹងពីឯកឧត្តម បណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។
ឯកឧត្តមបណ្ឌិត យ៉ង សាំងកុមារ បានគូសបញ្ជាក់ថា សម្រាប់ឆ្នាំ២០២៣នេះ កម្ពុជារំពឹងប្រមូលផលស្រូវរដូវវស្សាសរុបបានរហូតដល់ ៩, ៣ លានតោន គឺលើសរដូវវស្សាឆ្នាំ២០២២ ប្រមាណ ៦០ម៉ឺនតោន ខណៈដែលកាលពីឆ្នាំមុន មានប្រមាណ ៨,៧ លានតោន។ ដោយឡែក ការដាំដុះ និងការប្រមូលផលស្រូវវស្សានេះរួមមានស្រូវផ្ការំដួលមានប្រមាណជាង ៨០ម៉ឺនហិកតា ជាមួយផលរំពឹងទុកប្រមាណ ២,៤ លានតោន ឬស្មើនឹង ២៥ ភាគរយនៃផលស្រូវវស្សាសរុប ឬប្រមាណជិត ៤០ ភាគរយនៃផលស្រូវវស្សាប្រមូលនៅខែវិច្ឆិកា និងខែធ្នូ ឆ្នាំ២០២៣។
ឯកឧត្តម បានបន្ថែមថា បច្ចុប្បន្ន តម្លៃស្រូវផ្ការំដួលជាមធ្យម ១៣០០ រៀលក្នុង ១គីឡូក្រាម គឺខ្ពស់ជាងឆ្នាំមុនជាមធ្យមប្រមាណ ២០០ រៀល ឬស្មើនឹងប្រមាណ ១៨ ភាគរយ ។ តែតម្លៃអាចមានការប្រែប្រួលដោយសារការប្រមូលផលនឹងមានការកើនឡើងខ្លាំងចាប់ពីសប្តាហ៍ក្រោយ។ តែទោះជាយ៉ាងណាក៏ដោយ តម្លៃស្រូវនៅតែល្អជាងឆ្នាំ២០២២ កន្លងមក។
ឯកឧត្តមបានបានបញ្ជាក់ ៖
« បច្ចុប្បន្នយើងកំពុងតាមដានការគ្រប់គ្រងលើការប្រមូលផលដើម្បីសម្របសម្រួលឱ្យកសិករទទួលបានតម្លៃល្អសមរម្យសម្រាប់ផលិតផលស្រូវផ្ការំដួល ហើយរោងម៉ាស៊ីនទទួលបានស្រូវផ្ការំដួលគុណភាពល្អសម្រាប់ការកែច្នៃនាំចេញ ជាពិសេសកសិករ និងរោងម៉ាស៊ីនដែលចូលរួមជាមួយប្រព័ន្ធពូជស្រូវផ្ការំដួល ។ ជាក់ស្តែង អាស្រ័យទៅលើការប្រែប្រួលអាកាសធាតុ និងកត្តាប្រឈមនានា ព្រោះវាគ្រាន់តែជាការរំពឹងទុករបស់ក្រសួងតែប៉ុណ្ណោះ ថ្វីដ្បិតការប្រមូលផលស្រូវរដូវវស្សាបានច្រើន និងមានតម្លៃល្អជាងឆ្នាំមុនមែន តែសម្រាប់ផែនការឆ្នាំក្រោយ ក្រសួងនឹងពិនិត្យមើលបន្ថែមទាក់ទងនឹងតម្រូវការសកលផងដែរ ដើម្បីជូនដំណឹងដល់កសិករ»។
ឯកឧត្តមរដ្ឋលេខាធិការ ក៏បានណែនាំពីសារ:សំខាន់នៃការប្រើពូជសុទ្ធ ខណៈឯកឧត្តមចុះទៅជួបក្រុមនិស្សិតស្ម័គ្រចិត្ត និងកសិករនៅឃុំអន្លង់ត្នោត ស្រុកក្រគរ ខេត្តពោធិ៍សាត់កាលពីដើមខែវិច្ឆិកានេះ ដើម្បីពិនិត្យស្រែដែលប្រើពូជសុទ្ធផ្ការំដួលមុនពេលប្រមូលផល ដើម្បីទទួលបានទិន្នផលច្រើន និងងាយស្រួលលក់នៅលើទីផ្សារ។
ឯកឧត្តមរដ្ឋលេខាធិការ បានបន្តថា ការណែនាំឱ្យនិស្សិតស្ម័គ្រចិត្ត ផ្តល់យោបល់ និងជួយដល់កសិករធ្វើការជ្រើសរើសពូជស្រូវសុទ្ធល្អទុកធ្វើជាពូជ ព្រោះថាការបញ្ចេញពូជសុទ្ធនេះ គឺដើម្បីឱ្យសហគមន៍យកទៅប្រើប្រាស់ដាំដុះ និងផលិតបន្ត។ ជៀសវាងខាងរោងម៉ាស៊ីនទម្លាក់តម្លៃស្រូវ ដោយសារស្រូវពុំមានគុណភាព។ ដូច្នេះដើម្បីកាត់បន្ថយបញ្ហានេះក្រសួងបានចេញជាគោលនយោបាយមួយ ដែលជំរុញឱ្យកសិករប្រើប្រាស់ពូជសុទ្ធ ដើម្បីផលិតស្រូវសុទ្ធលក់ឱ្យរោងម៉ាស៊ីនតាមរយៈការចុះកិច្ចសន្យាជាមួយគ្នាក្នុងតម្លៃមួយសមរម្យ។
ជាមួយគ្នានេះ ឯកឧត្តម បណ្ឌិត យ៉ង សាំង កុមារ ក៏បានឱ្យដឹងដែរថា ជាដំណោះស្រាយ សហគមន៍ដែលទទួលបានពូជសុទ្ធពីក្រសួងយកទៅផលិតបានជាពូជសុទ្ធសម្រាប់លក់បន្តឱ្យកសិករ គួរដាក់នៅក្នុងតម្លៃទាបសមរម្យជាងបច្ចុប្បន្ននេះ ដើម្បីឱ្យកសិករផលិតស្រូវចំណីបានសុទ្ធល្អ។ ម្យ៉ាងវិញទៀត ខាងរោងម៉ាស៊ីនក៏គួរគិតពិចារណាទិញស្រូវពីកសិករក្នុងតម្លៃខ្ពស់ជាងមុនផងដែរសម្រាប់កសិករដែលផលិតបានស្រូវចំណីសុទ្ធល្អ។
សូមបញ្ជាក់ថា របាយការណ៍ពីក្រសួងកសិកម្ម បានឱ្យដឹងថា នៅក្នុងរយៈពេល ១០ ខែ ឆ្នាំ២០២៣នេះ ការនាំចេញអង្ករគឺមានជាង ៥៣ ម៉ឺនតោន កើនឡើងជាង ៤ ភាគរយ, ស្រូវចំនួនជាង ២ លានតោន កើនឡើងជាង ២១ ភាគរយ ប្រៀបធៀបនឹងរយៈពេលដូចគ្នាក្នុងឆ្នាំ២០២២៕
Account
Security
Favourite Content