ផ្ទីដូង គឺជាប្រភេទបន្លែបៃតង ដែលគេអាចយកទៅចម្អិនដាំ ស្លរ ជាម្ហូបអាហារបានច្រើនមុខ និងមានរសជាតិឆ្ងាញ់ផង ផ្តល់អត្ថប្រយោជន៍ចំពោះសុខភាពផង និងមានមនុស្សជាច្រើនចូលចិត្តនិយមទទួលទាន។ ដូច្នេះហើយបានជាកសិករជាច្រើនរស់នៅក្នុងតំបន់កោះគរ ទឹកដីខេត្តកណ្តាល និយមនាំគ្នាដាំផ្ទីដូងនេះលក់ ខណៈដែលមានតម្រូវការទីផ្សារល្អ តម្លៃសមរម្យ ហើយអាចប្រមូលផលបានយូរថ្ងៃទៀតផង។

កសិករឈ្មោះ ប៊ុន លាង ជាអ្នកប្រកបរបរកសិកម្មដាំដំណាំផ្ទីដូង រស់នៅក្នុងភូមិកោះគរ សង្កាត់រការខ្ពស់ ក្រុងតាខ្មៅ ខេត្តកណ្តាល បានឱ្យដឹងថា ផ្ទីដូង មិនត្រឹមតែងាយស្រួលដាំដុះប៉ុណ្ណោះទេ ថែមទាំងងាយស្រួលថែទាំជាងដំណាំផ្សេងទៀតផង។ លើសពីនេះ ដំណាំប្រភេទនេះឱ្យផលវិលជុំច្រូតលក់ម្តង ហើយដាក់ជីស្រោចទឹកត្រឹមតែមួយសប្តាហ៍ វានឹងដុះលូតធំល្មមច្រូតកាត់លក់បានម្តងទៀត ហើយគេអាចប្រមូលផលបានក្នុងរយៈពេលយូរអាចរហូតដល់ប្រមាណជាង៣ខែឯណោះ។

ក្នុងទំហំក្បាលដីប្រហែលជាង ១០ម៉ែត្រ គុណនឹង ៦០ម៉ែត្រ គេអាចលើកថ្នាលដាំផ្ទីដូងបានជាច្រើនថ្នាល ប៉ុន្តែដើម្បីអាចប្រមូលផលវិលជុំរាល់ថ្ងៃបាន គេមិនត្រូវសាបគ្រាប់ក្នុងពេលដំណាលគ្នាតែមួយនោះឡើយ ពោលគឺត្រូវសាបបណ្តាក់គ្នា ២ ឬ ៣ ថ្នាលម្តង ដើម្បីឱ្យផ្ទីដុះលូតលាស់បន្តបន្ទាប់គ្នា ហើយឱ្យផលជាបន្តបន្ទាប់ ខ្លាចក្រែងឱ្យផលស្មើៗគ្នាក្នុងថ្ងៃតែមួយអាចជន់ជោរនៅលើទីផ្សារពិបាកលក់ចេញ ។

ចំណែកកសិករម្នាក់ទៀត លោក ឃុត ព្រលឹង បានប្រាប់ពីវិធីសាស្រ្តដាំដុះថា ដំណាំផ្ទីដូង មិនមានការលំបាកនោះឡើយ ដោយកសិករគ្រាន់តែភ្ជួរាស់ដី ដាក់ជី រួចហាលដីចោលឱ្យឆ្អិនរយៈពេលប្រហែលជា១សប្តាហ៍ ដើម្បីសម្លាប់មេរោគ បន្ទាប់មកគេត្រូវលើកពូនជាថ្នាលមានទទឹងប្រហែល១ម៉ែត្រ និងមានគម្លាតពីថ្នាលមួយទៅថ្នាលមួយប្រវែង ២ ឬ ៣ ស.ម។ ពេលលើកថ្នាលរួច គេត្រូវយកគ្រាប់មករោយពីលើ និងគ្របចំបើងឱ្យបានជិត និងស្រោចទឹកជាប្រចាំ ព្រឹកម្តង ល្ងាចម្តង រហូតដល់អាយុ១០ថ្ងៃ ផ្ទីមានកំពស់ ៦-៨ ស.ម គេចាប់ផ្តើមយកចំបើងចេញ ហើយចាប់ផ្តើមដកស្មៅ ជ្រុំដី​ និងដាក់ជីប៉ន រហូតដល់អាយុ ២៥-៣០ថ្ងៃ គេអាចប្រមូលផលលើកទី១បានហើយ។ ពេលច្រូតរួច ដាក់ជី ស្រោចទឹក រយៈពេល ៧ថ្ងៃ គេអាចច្រូតកាត់យកទៅលក់បានម្តងទៀត រួចធ្វើដដែលៗរហូតដល់ ៣ខែ ទើបផ្ទីលែងឱ្យផល។

សូមបញ្ជាក់ថា ក្នុងទំហំក្បាលដីប្រមាណជា១០ម៉ែត្រ គុណនឹង ៦០ម៉ែត្រ គេអាចប្រមូលផលម្តងបានប្រមាណចន្លោះពី ៦០ ទៅ ៨០គីឡូក្រាម ហើយក្នុងមួយគីឡូក្រាមអាចលក់បាន ១០០០រៀល (តម្លៃបោះដុំ) តម្លៃនេះលក់ក្នុងរដូវប្រាំង ប៉ុន្តែបើសិនជារដូវផ្ទីមិនសូវឱ្យផលច្រើន ដូចជានៅរដូវវស្សា ពិសេសរដូវទឹកជំនន់ ផ្ទីអាចឡើងថ្លៃមួយគីឡូ ៣០០០រៀល។

មេភូមិកោះគរ លោក លី ហុង បានមានប្រសាសន៍ថា ប្រជាពលរដ្ឋនៅក្នុងភូមិកោះគរ ក្រៅពីប្រកបការងារនៅតាមរោងចក្រ សហគ្រាស និងស្ថាប័នផ្សេងៗ ពួកគាត់តែងឆ្លៀតពេលដាំដុះដំណាំបន្លែផ្សេៗទៅតាមចំណង់ចំណូលចិត្ត ដើម្បីរកប្រាក់កម្រៃបន្ថែម និងសម្រាប់ផ្គត់ផ្គង់ជីវភាពគ្រួសារ។ ចំពោះដំណាំដែលកសិករនៅក្នុងភូមិកោះគរ និយមដាំច្រើនជាងគេរួមមាន ដូចជា ស្លឹកបាស កាឆាយ ខ្ទឹមស ជីនាងវង ជីរណា ជាពិសេសដំណាំផ្ទីដូងតែម្ដង។

គួរបញ្ជាក់ដែរថា ផ្ទី ជារុក្ខជាតិសម្បូរទៅដោយប្រូតេអ៊ីន ភ្នាក់ងារប្រឆាំងអុកស៊ីតកម្ម ជំនួយឆ្អឹង ជំនួយដល់ការរំលាយអាហារ មិនមានជាតិ Gluten បន្ថយកម្រិតកូឡេស្តេរ៉ុល ការពារជំងឺក្រិនសរសៃឈាម លុបបំបាត់ជំងឺហើមសរសៃឈាម ជំនួយភ្នែក កាត់បន្ថយពិការភាពពីកំណើត ជួយឱ្យស្រកទម្ងន់ និងជំនួយដល់សរសៃសក់៕ វិន ឈុនហ៊ាត