ភ្នំពេញ ៖ ការធ្លាក់ចុះនៃថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈបានជំរុញឱ្យអត្រាអតិផរណានៅកម្ពុជាបន្តមានការថមថយចុះគួរឱ្យកត់សម្គាល់នៅឆមាសទី១ ឆ្នាំ២០២៤ ស្របពេលដែលអតិផរណាម្ហូបអាហារមានកម្រិតទាបក្នុងបរិការណ៍ដែលកំណើនផលិតកម្មកសិកម្មក្នុងស្រុកមានភាពល្អប្រសើរ គួបផ្សំនឹងការថយចុះថ្លៃដើមផលិត ដូចជា ជីកសិកម្ម និងប្រេងឥន្ធនៈ។

យោងតាមរបាយការណ៍​ប្រចាំឆមាសទី១ និងទិសដៅការងារឆមាសទី២ ឆ្នាំ២០២៤ របស់ធនាគារជាតិនៃកម្ពុជាបានឱ្យដឹងថា ស្ថានភាពថ្លៃមានបរិត្តផរណា -០,៥% និង ០,៣% នៅខែមករា និងខែកុម្ភៈ រៀងគ្នាជាចម្បង ដោយសារការថយចុះនៃថ្លៃសាំងមុននឹងកើនឡើងសន្សឹមៗមកវិញនូវកម្រិតអតិផរណា ១,៦% នៅខែមិថុនា។ ជាមធ្យម អតិផរណារួមនៅឆមាសទី១ ឆ្នាំ២០២៤ មានកម្រិត ០,៤% ទាបជាងឆមាសមុន (៣%) និងគ្រាដូចគ្នាឆ្នាំមុន (១,២%) ដោយសារការធ្លាក់ចុះនៃថ្លៃក្រុមទំនិញ និងសេវាពាក់ព័ន្ធជាមួយប្រេងឥន្ធនៈ។

ថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈបានថយចុះ -០,៨% នៅឆមាសនេះ (កើន ០,៨% នៅឆមាសទី២ ឆ្នាំ២០២៣) ដោយសារថ្លៃសាំងមានកម្រិតទាបជាងគ្រាដូចគ្នាឆ្នាំមុនបន្តិច។ ថ្លៃសាំងនៅកម្ពុជាមានកម្រិតជាមធ្យម ៤.៣១៧ រៀលក្នុង១លីត្រ នៅឆមាសនេះ ថយ -២% ធៀបនឹង ៤.៣៨៦ រៀល កាលពីឆមាសមុន និងថយថ្លៃ -១% ធៀបនឹង ៤.៣៥៨ រៀល កាលពីគ្រាដូចគ្នាឆ្នាំមុន។

កំណើនថ្លៃក្រុមម្ហូបអាហារបានថយល្បឿន មក ០,៧% (៣,៨% នៅឆមាសមុន) ដែលបណ្តាលមកពីការថយសម្ពាធពីចំណាយថ្លៃដើម ដូចជា ជីកសិកម្ម ប្រេងឥន្ធនៈ និងថ្លៃដឹកជញ្ជូន ស្របពេលដែលការផ្គត់ផ្គង់ផលិតផលកសិកម្មក្នុងស្រុកបន្តកើនឡើង។

អតិផរណាស្នូលបានថយមកត្រឹម ០,៣% (២,៥% នៅឆមាសទី២ ឆ្នាំ២០២៣) ដោយសារការថយចុះថ្លៃក្រុមភោជនីយដ្ឋាន -០,៤% (៣% នៅ ឆមាសទី២ ឆ្នាំ២០២៣) និងការថយកំណើនថ្លៃក្រុមផ្ទះសម្បែង ០,៣% (៣,៣% នៅឆមាសទី២ ឆ្នាំ២០២៣) គួបផ្សំនឹងឥទ្ធិពលពីការថមថយថ្លៃម្ហូបអាហារ និងប្រេងឥន្ធនៈ។

លោកជំទាបណ្ឌិត ជា សិរី ទេសាភិបាល ធនាគារជាតិនៃកម្ពុជា បានថ្លែងបញ្ជាក់ថា អតិផរណាមានកម្រិតជាមធ្យមត្រឹម ០,៤% ប៉ុណ្ណោះក្នុងឆមាសទី១នេះ ដោយសារការធ្លាក់ថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈ រួមទាំងកម្រិតទាបនៃអតិផរណាម្ហូបអាហារ និងអតិផរណាស្នូល។ អត្រាអតិផរណាទាបនេះបានរួមចំណែកការពារអំណាចទិញរបស់ប្រជាជនកម្ពុជា ស្របពេលដែលអត្រាប្តូរប្រាក់មានស្ថិរភាពក្នុងកម្រិតមធ្យម ៤.០៧៥ រៀល ក្នុងមួយដុល្លារអាមេរិក ដែលបានកើនថ្លៃ ០,៤% ធៀបនឹងគ្រាដូចគ្នាឆ្នាំមុន។

គួររំលេចថា ការរក្សាអត្រាប្តូរប្រាក់ឱ្យប្រែប្រួលទាបជាង ១% គឺជាជោគជ័យមួយរបស់កម្ពុជា បើធៀបនឹងរូបិយប័ណ្ណក្នុងតំបន់ ដូចជា រ៉ូពីឥណ្ឌូណេស៊ី ប៉េសូហ្វីលីពីន ដុងវៀតណាម បាតថៃ រីងហ្គីត ម៉ាឡេស៊ី និងគីបឡាវ ដែលថយថ្លៃលើសពី ៣,៨%។

លោកជំទាបណ្ឌិត ជា សិរី បានឱ្យដឹងថា ការសម្រេចបាននេះក៏ដោយសារការអនុវត្តនយោបាយរូបិយវត្ថុយ៉ាងប្រុងប្រយ័ត្ន ដោយថ្លឹងថ្លែងពីតម្រូវការ និងការផ្គត់ផ្គង់ប្រាក់រៀលនៅក្នុងសកម្មភាពសេដ្ឋកិច្ច។ ប្រសិទ្ធភាពនៃការប្រើប្រាស់ឧបករណ៍នយោបាយរូបិយវត្ថុនានាក៏បានចូលរួមកាត់បន្ថយការធ្វើអន្តរាគមន៍នៅលើទីផ្សារប្តូរប្រាក់ ដែលធ្លាប់តែជាឧបករណ៍ចម្បងមួយក្នុងការរក្សាស្ថិរភាពអត្រាប្តូរប្រាក់ ហើយដែលជាទូទៅការធ្វើអន្តរាគមន៍ម្តងៗអាចធ្វើឱ្យទុនបម្រុងអន្តរជាតិថយចុះ។

ទន្ទឹមនេះ សម្រាប់ឆ្នាំ២០២៤ និងឆ្នាំ២០២៥ ធនាគារអភិវឌ្ឍន៍អាស៊ី (ADB) បានឱ្យដឹងថា អតិផរណារបស់កម្ពុជាត្រូវបានរពឹងថានឹងបន្តក្នុងកម្រិតទាប និងមានស្ថិរភាព។ អតិផរណាជារួមនឹងមានជាមធ្យមប្រហែល ២,០% ក្នុងឆ្នាំ២០២៤ និង២០២៥។ ចំណោមគោលនយោបាយសំខាន់ៗ ដើម្បីរក្សាបានកម្រិតអតិផរណាទាប និងស្ថិរភាព ក្នុងនោះគឺ ធនាគារជាតិនៃកម្ពុជា ដែលប្តេជ្ញារក្សាអត្រាប្តូរប្រាក់ឱ្យមានស្ថិរភាពធៀបនឹងប្រាក់ដុល្លារអាមេរិក ដើម្បីរក្សាបានស្ថិរភាពថ្លៃ និងទំនុកចិត្តសាធារណៈជុនលើប្រាក់រៀល គ្រោងដាក់អនុវត្តអត្រាការប្រាក់គោល ដើម្បីគ្រប់គ្រងអត្រាប្រាក់លើទីផ្សារជាមួយការជំរុញយ៉ាងសកម្មឱ្យមានការប្រើប្រាស់ប្រាក់រៀលឱ្យកាន់តែទូលំទូលាយ៕