សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ រូបភាពពីផ្កាយរណបបានបង្ហាញថា ប្រទេសចិនកំពុងពន្លឿនការសាងសង់បណ្តាញទម្របាញ់មីស៊ីលបន្ទាយក្រោមដី និងមជ្ឈមណ្ឌលបញ្ជាការដ្ឋានយ៉ាងធំសម្បើម ដែលគ្របដណ្តប់លើផ្ទៃដីរាប់ពាន់គីឡូម៉ែត្រការ៉េ នៅក្នុងតំបន់វាលខ្សាច់ភាគពាយព្យនៃប្រទេស។
តាមរយៈការចេញផ្សាយដោយកាសែត The Defense News នៅសប្តាហ៍នេះបានឱ្យដឹងថា ការពង្រីកហេដ្ឋារចនាសម្ព័ន្ធយោធានេះ ធ្វើឡើងក្នុងគោលបំណងការពារកងកម្លាំងដែលប្រតិបត្តិការជាមួយនឹងមីស៊ីលឆ្លងទ្វីប (ICBM) និងធានានូវសមត្ថភាពវាយបកវិញដោយអាវុធនុយក្លេអ៊ែរ ក្នុងករណីមានការវាយប្រហារណាមួយមកកាន់ប្រទេសចិន។
ទីតាំងយុទ្ធសាស្ត្រសំណង់ថ្មីនេះស្ថិតនៅចន្លោះពី ១៤០ ទៅ ២៣០ គីឡូម៉ែត្រ ពីតំបន់ផ្ទុកគ្រាប់នុយក្លេអ៊ែរ Hami ដែលស្ថិតនៅក្នុងតំបន់ Xinjiang។ ទម្របាញ់មីស៊ីលចល័តមានផ្ទៃជាបេតុងសម្រាប់ធ្វើជាទម្របាញ់មីស៊ីលជាង ៨០ កន្លែង ដែលត្រូវបានសាងសង់ឡើងភ្ជាប់ទៅនឹងប្រព័ន្ធផ្លូវខ្វាត់ខ្វែង ដែលអ្នកជំនាញជឿថា ប្រើសម្រាប់ចល័តរថយន្តដឹកមីស៊ីល និងប្រព័ន្ធការពារដែនអាកាស។ ការពង្រឹងប្រព័ន្ធបញ្ជាការមានទាំងការសាងសង់ប៉មទំនាក់ទំនង និងផ្កាយរណបធំៗ រួមទាំងបណ្តាញខ្សែកាបអុបទិកក្រោមដី ដើម្បីរក្សាប្រព័ន្ធទំនាក់ទំនង និងប្រព័ន្ធបញ្ជាការយោធាឱ្យមានសុវត្ថិភាពខ្ពស់។
ប្រភពដដែលបានសរសេរថា សម្រាប់អ្នកជំនាញយោធាពួកគេមើលឃើញថា ការវិនិយោគដ៏មហិមានេះ ស្តែងឱ្យឃើញពីការប្រជែងគ្នាកាន់តែខ្លាំងផ្នែកអាវុធនុយក្លេអ៊ែររវាងចិន និងសហរដ្ឋអាម៉េរិក ជាពិសេស ចំពេលដែលភាពតានតឹងជុំវិញបញ្ហាកោះតៃវ៉ាន់កំពុងកើនឡើង។
លោក Hans Kristensen នាយកគម្រោងព័ត៌មាននុយក្លេអ៊ែរនៃសហព័ន្ធអ្នកវិទ្យាសាស្ត្រអាម៉េរិក បានមានប្រសាសន៍ថា ៖ «ខ្ញុំមិនដែលធ្លាប់ឃើញអ្វីដូចនេះពីមុនមកទេ ហើតវាគឺជាកិច្ចខិតខំប្រឹងប្រែងដ៏អស្ចារ្យ និងខុសប្លែកពីធម្មតាដែលរដ្ឋាភិបាលចិនធ្លាប់ធ្វើ»។
សូមជម្រាបថា ការធ្វើបច្ចុប្បន្នភាពហេដ្ឋារចនាសម្ព័ន្ធនេះ ស្របទៅនឹងគោលនយោបាយមិនអាចឲ្យប្រើប្រាស់មុន (No First Use) របស់ទីក្រុងប៉េកាំង។ យោងតាមគោលនយោបាយនេះ ចិនត្រូវតែធានាថា កងកម្លាំងរបស់ខ្លួនអាចរស់រានមានជីវិតពីការវាយប្រហារលើកដំបូងរបស់សត្រូវ ដើម្បីមានលទ្ធភាពវាយបកទៅវិញ។ បូករួមជាមួយប្រព័ន្ធផ្កាយរណបព្រមានជាមុនដែលមានឈ្មោះថា ហួយាន-១ (Huoyan-1) ដែលបណ្តាញការពារក្នុងវាលខ្សាច់ថ្មីនេះ នឹងផ្តល់នូវកិច្ចការពារ និងភាពបត់បែនខ្ពស់សម្រាប់យុទ្ធសាស្ត្រវាយបកការពារខ្លួនរបស់ទីក្រុងប៉េកាំងនាពេលបច្ចុប្បន្ន និងទៅអនាគត៕
Account
Security
Favourite Content