ជីកំប៉ុស្តិ៍ ជាប្រភេទជីសរីរាង្គដែលផ្ដល់នូវសារធាតុចិញ្ចឹមសម្រាប់ដំណាំផង និងជាប្រភេទជីដែលអាចជួយកែលម្អជីជាតិរបស់ដីធ្វើឱ្យដីធូរ ងាយស្រួលដល់ការលូតលាស់របស់ដំណាំ។ ក្នុងនោះ មានបច្ចេកទេសផលិតជីកំប៉ុស្តិ៍សំខាន់ៗមួយចំនួនដែលកសិករគួរយល់ដឹងដើម្បីផលិត ក៏ដូចជាអាចច្នៃជីដ៏មានជីជាតិសម្រាប់ដាំដំណាំ។
សម្រាប់ការផលិតជីកំប៉ុស្តិ៍ឱ្យបានជោគជ័យ កសិករគួរយកចិត្តទុកដាក់ទៅលើធាតុផ្សំដូចជាលាមកសត្វ ដើមពោត ចំបើង ស្មៅ ស្លឹកឈើ និងផេះជាដើម។ ក្រៅពីនេះ គេក៏ត្រូវពិនិត្យមើលខ្យល់នៅក្នុងគំនរជីឱ្យបានសមស្រប សំណើមមិនជោគពេក មិនស្ងួតពេក និងកត្តាសីតុណ្ហភាពផងដែរ។ ចំពោះប្រភេទជីកំប៉ុស្តិ៍វិញ ជាធម្មតាត្រូវបានគេដឹងជាទូទៅថាមានជីកំប៉ុស្តិ៍គោក ជីកំប៉ុស្តិ៍ទឹក និងជីកំប៉ុស្តិ៍ទ្រុង ដែលសុទ្ធសឹងតែមានអត្ថប្រយោជន៍ចំពោះដំណាំ និងដីដាំដំណាំដូចៗគ្នា គ្រាន់តែរបៀបផលិត និងរបៀបប្រើប្រាស់ខុសៗគ្នា ដូចជាកំប៉ុស្តិ៍គោកគេធ្វើជាគំនរជី កំប៉ុស្តិ៍ទឹកគេប្រើជាពាងដើម្បីផ្ទុក ហើយកំប៉ុស្តិ៍ទ្រុងគេអាចយកបន្ទះឫស្សីមកវាយធ្វើទ្រុងដើម្បីដាក់ជីផងដែរ។
សម្រាប់ប្រភេទកំប៉ុស្តិ៍គោក អ្នកផលិតអាចបំបែកមេជីកំប៉ុស្តិ៍គោកដោយយកល្បាយដែលរលួយហើយ ១គីឡូក្រាមទៅលាយជាមួយលាមកសត្វក្រៀមឬស្រស់ ឬកាកសំណល់បន្លែផ្សេងៗ កន្លះគីឡូក្រាម រួចស្រោចមេជីទឹកផ្អាប់ទុករយៈពេល ១សប្ដាហ៍ឱ្យរលួយល្អ ប្រសិនបើមិនរលួយល្អ គេអាចផ្អាប់ទុកបន្តទៀតដោយបន្ថែមមេជីទឹក លាយជាមួយស្កររងូស្រោចពីលើច្របល់ឱ្យស្មើសាច់ហើយគ្របទុក។
ចំណែកប្រភេទជីកំប៉ុស្តិ៍ទឹកវិញ មានភាពងាយស្រួលដល់ដំណាំដោយសារវាផ្ទុកនូវសារធាតុចិញ្ចឹមដែលរលាយស្រាប់ ពិសេសមានក្លិនអាជួយដេញសត្វល្អិតចង្រៃ ដែលកសិករគួរប្រើនៅក្រោយពេលស្ទូង មុនពេលដំណាំចេញផ្កា ឬនៅពេលដំណាំជួបរោគសញ្ញាប្លែកៗ ដោយគេអាចស្រោចទឹក ១លីត្រលើផ្ទៃដី ១ម៉ែត្រការេ តែបើស្រោចលើស្លឹកដំណាំផ្ទាល់ គេត្រូវលាយជីជាមួយនឹងទឹកធម្មតា មួយសប្ដាហ៍ម្ដង ឬ ២-៣ដង សម្រាប់ដំណាំខ្វះជីជាតិខ្លាំង។
ដោយឡែកការប្រើប្រាស់កំប៉ុស្តិ៍ទ្រុងវិញ គេអាចប្រើលាយជាមួយដីសម្រាប់សាប និងផ្សាំកូនបន្លែ ដោយប្រើជាប្រភេទជីទ្រាប់បាត ៣០០គីឡូក្រាម លើផ្ទៃដី ១០០ម៉ែត្រការ៉េ។ នៅពេលប្រើគេត្រូវច្របល់ឬរាប់លុបឱ្យសព្វចូលក្នុងដី ដើម្បីចៀសវាងការហើរជីអាសូតដែលមាននៅក្នុងកំប៉ុស្តិ៍ ឯជីដែលនៅសល់គេអាចច្រកបាវរក្សាទុកដើម្បីប្រើប្រាស់ពេលក្រោយបាន៕