ភ្នំពេញ ៖ ផ្សារទំនើ​បបែបសហគមន៍​នៅក្នុង​ប្រទេស​កម្ពុជា​ចាប់ផ្ដើមរីកដុះដាល​កាន់តែច្រើនគួរឱ្យកត់សម្គាល់ រាប់​ទាំង​នៅរាជធានីភ្នំពេញ​ និងនៅតាមបណ្ដាខេត្តមួយចំនួន​ ជាពិសេស​នៅតំបន់​មានសក្ដានុពលទេសចរណ៍ ខណៈផ្សារទំនើបធំៗ​មួយចំនួន​ក្នុងរាជធានីភ្នំពេញ បាន និងប្រឈមបិទទ្វារ ដោយសារតែ​បាត់បង់ការគាំទ្រពីអតិថិជនជាបន្តបន្ទាប់ ។​

ជាការកត់សម្គាល់​ក្នុង​រយៈ​ពេលប៉ុន្មាន​ឆ្នាំចុងក្រោយនេះ ជាពិសេស​​នៅ​ក្រោយ​អំឡុង ​និង​ក្រោយវិបត្តិ​កូវីដ​១៩ ការអភិឌ្ឍ​ផ្សារ​ទំនើប​បែបសហគមន៍នៅតាមទីប្រជុំជនកាន់តែមានកំណើន ទាំង​នៅក្នុងក្រុងភ្នំពេញ និងតាមបណ្ដាខេត្ត ខណៈដែលអតិថិជនក៏មានការគាំទ្រច្រើន។

បើតាម​អ្នក​ជំនាញអចលនទ្រព្យ​​កម្ពុជា​បានលើកឡើងថា អ្នកអភិវឌ្ឍ​ន៍​ផ្សារទំនើប បាន​ចាប់ផ្ដើម​កែ​ប្រែ​​ឥរិយាបថ និងរកយុទ្ធសាស្ត្រ​ទីផ្សារធ្វើយ៉ាងណា​ដើម្បីទាក់ទាញអតិថិជន​ចូល​ក្នុង​ផ្សារ​របស់ខ្លួនកាន់តែច្រើន ។ កាលពីមុន គេ​ពេញ​និ​យ​មដើរនៅក្នុង​​ផ្សារទំនើបធំៗកម្រិតអន្តរជាតិដែលមានប្រភពមកពីក្រៅប្រទេស បំពាក់ម៉ាស៊ីនត្រជាក់ ខណៈដែលផ្សារ​ទំនើប​ធំៗក្រោមការវិនិយោគនៅក្នុងស្រុកចាប់ផ្ដើម​បាត់ភ្ញៀវ​បន្តិចម្ដងៗ​ រហូត​ដល់​​មានផ្សារទំនើបមួយចំនួន​បាន​បិទទ្វារ​ ។​ យ៉ាងណាក៏ដោយ ជាការកត់សម្គាល់ ខណៈដែលផ្សារទំនើបធំៗដែលមានតម្លៃជាច្រើនលានដុល្លារបន្តថមថយអតិថិជនគួរឱ្យព្រួយបារម្ភនោះ វត្តមានផ្សារទំនើបតូចៗបែបសហគមន៍បែរជារីកដុះដាលជាច្រើនកន្លែង ដូចជា​ផ្សារទំនើប​​អេដិន​ហ្គាដិន ( Eden Garden Mall )នៅតំបន់​បឹង​កក់​ខណ្ឌ​ដូន​ពេ​ញ ផ្សារទំនើប​សហគមន៍ The Point នៅមុខស្ថានទូតចិន ផ្សារទំនើប​សហគមន៍ TK Avenue នៅតំបន់​ទួល​គោ​កជាដើម ផ្សារទំនើប Khalandale Mall នៅតំបន់បឹងកក់, ផ្សារ The Ground Market នៅតំបន់បឹងស្នរ ផ្លូវជាតិលេខ១ រួមជាមួយនឹងផ្សារដែលប្រមូលផ្តុំក្រុមហ៊ុនលក់សម្ភារៈមានម៉ាកល្បីៗជាច្រើនទៀត។

អ្នក​​ស្រី អាន សុធីតា​ នាយិកា​ប្រតិបត្តិ​ក្រុមហ៊ុន PropNex Cambodia បាន​លើកឡើងថា ​អ្នកអភិវឌ្ឍន៍​ផ្សារ​ទំនើបដែលអាច​ឈរ​​ជើ​ងបានយូរ​តែងតែរិះរក​នូវ​យុទ្ធសាស្ត្រ​ថ្មីៗ ដើម្បី​ទាក់ទាញអតិថិជ​ន​ចូល​ក្នុងផ្សារ​ទំ​នើ​ប​​​របស់ខ្លួន ។ កត្តា​ដែល​សំខាន់​សម្រាប់ទាក់ទាញ​អតិថិជន​ក្នុងផ្សារទំនើប​​គឺ​ត្រូវ​មានចំណ​ត​គ្រប់គ្រាន់​ និង​ងាយ​ស្រួលក្នុងការ​ចេញចូល​ផ្សារទិញទំនិញ ឬ​មកទទួល​សេវាកម្មនានា​ក្នុងផ្សារទំនើបនោះ ។ ក្រៅ​ពី​នេះ ផ្សារ​​ទំនើបធំៗលក្ខណៈអន្តរជាតិដែលអាចឈរ​ជើង​បានយូរ ​និងមានអតិថិជនចេញចូលច្រើន​នោះ ដោយសារ​តែ​ម្ចាស់​ផ្សារ​តែង​តែ​រៀប​ចំ​តុប​តែង​​លម្អក្នុងផ្សារ​ទៅតាមរដូវ​កាលជាដើម ។

យោងតាមការ​សិក្សាស្រាវជ្រាវ​មួយរ​បស់​ក្រុមហ៊ុន​ CBRE Cambodia បានឱ្យដឹងថា​ ចាប់ពី​ឆ្នាំ២០២០មក​ ឃើ​ញ​​ថា​ ការអភិវឌ្ឍផ្សារទំនើប​បែបសហគមន៍​មានកំណើនគួរឱ្យ​កត់សម្គាល់​ ប៉ុន្តែ​ម​កដល់ឆ្នាំ ២០២៤នេះ មាន​គ​ម្រោ​​ង​អភិវឌ្ឍន៍ផ្សារ​​ទំនើប​បែបសហគមន៍​តែមួយគម្រោង​ប៉ុណ្ណោះ គឺគម្រោង​ផ្សារទំនើប​សហគមន៍៦០ម៉ែត្រ ស្ថិតនៅក្នុង​បណ្ដោយផ្លូវ​សម្ដេចអគ្គ​មហា​សេនា​បតីតេជោហ៊ុន សែន​ ( ផ្លូវ​៦០​ម៉ែត្រ ) ក្នុង​ខណ្ឌមានជ័យ​រាជធានីភ្នំពេញ ៕