ភ្នំពេញ ៖  មូលនិធិរូបិយវត្ថុអន្តរជាតិ (IMF) កាលពីពេលថ្មីៗនេះបានព្យាករណ៍ថា កម្ពុជានឹងមានកំណើនសេដ្ឋកិច្ចប្រសើរឡើងក្នុងអត្រាប្រមាណ ៥.៥% នៅឆ្នាំ២០២៤ នេះ ដោយមាន​ការគាំទ្រពីវិស័យសំខាន់ៗ ដូចជាឧស្សាហកម្មនាំចេញសម្លៀកបំពាក់ កសិកម្ម និងទេសចរណ៍ ដែលកំពុងមានការងើបឡើងវិញ។

ក្រុមការងារមូលនិធិរូបិយវត្ថុអន្តរជាតិ (IMF) ដឹកនាំដោយលោក Kenichiro Kashiwase បានមកបំពេញទស្សនកិច្ចនៅកម្ពុជាកាលពីខែកញ្ញា ឆ្នាំ២០២៣ ដើម្បីពិភាក្សាអំពីសេដ្ឋកិច្ចរបស់ប្រទេសសម្រាប់ឆ្នាំ ២០២៤ ដោយលោក Kashiwase បានកត់សម្គាល់ថា កំណើនសេដ្ឋកិច្ចរបស់កម្ពុជាមានភាពប្រសើរឡើង នឹងរំពឹងថាកើនឡើង ៥.៥% នៅឆ្នាំ២០២៤។ កំណើននេះភាគច្រើនត្រូវបានគាំទ្រដោយការងើបឡើងវិញនៃការនាំចេញសម្លៀកបំពាក់ និងផលិតផលកសិកម្ម ក៏ដូចជាការងើបឡើងវិញនៃវិស័យទេសចរណ៍។ ទោះជាយ៉ាងនេះក្តី វិស័យសំណង់ និងអចលនទ្រព្យនៅតែបន្តប្រឈម បន្ទាប់ពីមានការកំណើនយ៉ាងឆាប់រហ័សពេក មុនពេលវិបត្តិជំងឺរាតត្បាត។

អតិផរណានៅត្រូវបានប៉ាន់ប្រមាណថាធ្លាក់ចុះមកត្រឹមជាមធ្យម ១.៦% ក្នុងឆមាសទី១ ឆ្នាំ២០២៤ ទាបជាង ២.១% ក្នុងឆ្នាំ ២០២៣។ នៅចុងឆ្នាំ២០២៤ អតិផរណាត្រូវបានរំពឹងថានឹងស្ថិតក្នុងរង្វង់ប្រមាណ ១.៥% ហើយរំពឹងថានឹងមានអត្រាប្រហែល ៣% ក្នុងរយៈពេលវែង។ យ៉ាងណាក៏ដោយ ទោះបីជាទុនបម្រុងអន្តរជាតិបានកើនឡើង ក៏សមតុល្យគណនីចរន្តរបស់កម្ពុជាត្រូវបានរំពឹងថានឹងផ្លាស់ប្តូរទៅជាឱនភាព ១.៧៥% នៃផលិតផលក្នុងស្រុកសរុប ដោយសារតែការនាំចូលខ្ពស់ជាងបើធៀបនឹងការនាំចេញ។

លោក Kashiwase បានផ្តល់ដំបូន្មានដល់កម្ពុជាឱ្យផ្តោតលើការកសាងឡើងវិញនូវភាពរឹងមាំផ្នែកហិរញ្ញវត្ថុរបស់ខ្លួន ខណៈពេលត្រូវការជំរុញកំណើនសេដ្ឋកិច្ចប្រកបដោយបរិយាបន្ន។ ការកំណែទម្រង់ ផ្តោតលើការប្រមូលពន្ធ និងធានាថា កម្មវិធីសង្គមត្រូវបានកំណត់គោលដៅបានល្អ។ ការវិនិយោគលើវិស័យអប់រំ ការថែទាំសុខភាព និងហេដ្ឋារចនាសម្ព័ន្ធក៏គួរត្រូវបានផ្តល់អាទិភាពផងដែរ។ នៅពេលដែលប្រទេសកម្ពុជាឆ្ពោះទៅរកការចាកចេញពីឋានៈជាប្រទេសអភិវឌ្ឍន៍តិចតួចរបស់ខ្លួន វានឹងមានសារៈសំខាន់ក្នុងការកែលម្អការគ្រប់គ្រងហិរញ្ញវត្ថុ តម្លាភាព និងអភិបាលកិច្ច។

លោក Kashiwase បានបន្តលើកឡើងថា ដើម្បីគាំទ្រដល់កំណើនរយៈពេលវែង កម្ពុជាចាំបាច់ត្រូវធ្វើពិពិធកម្មសេដ្ឋកិច្ចរបស់ខ្លួន និងជំរុញផលិតភាពតាមរយៈការធ្វើឱ្យប្រសើរឡើងនូវការអប់រំ និងការអភិវឌ្ឍជំនាញ ការលើកទឹកចិត្តដល់ការប្រើប្រាស់បច្ចេកវិទ្យា និងការលើកកម្ពស់ឧស្សាហកម្ម ដែលមានតម្លៃខ្ពស់។ បរិយាបន្នហិរញ្ញវត្ថុ ការអភិវឌ្ឍន៍ឌីជីថល និងភាពធន់នឹងអាកាសធាតុក៏សំខាន់ផងដែរ។ ការពង្រឹងស្ថាប័ន ការលើកកម្ពស់សេវាសាធារណៈ និងការកែលម្អអភិបាលកិច្ច នឹងក្លាយជាគន្លឹះនៃការអភិវឌ្ឍន៍ប្រកបដោយចីរភាព។ IMF នឹង​បន្ត​ផ្តល់​ជំនួយ​បច្ចេកទេស​ដើម្បី​ជួយ​កម្ពុជា​សម្រេច​គោលដៅ​ទាំងនេះ។

ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា សូចនាករសេដ្ឋកិច្ចសំខាន់ៗក្នុងរយៈពេល ៦ខែ ឆ្នាំ២០២៤ បានបង្ហាញពីសញ្ញាកាន់តែល្អជាបន្តបន្ទាប់ ជាពិសេសលើវិស័យពាណិជ្ជកម្មអន្តរជាតិ ជាមួយនឹងសន្ទុះនៃការនាំចេញ ដែលជំរុញដោយភាពជាដៃគូ អន្តរជាតិ និងកិច្ចព្រមព្រៀងពាណិជ្ជកម្មជាច្រើន។ កិច្ចព្រមព្រៀងទាំងនេះ បាន និងកំពុងជំរុញទាំងការនាំចេញ និងការវិនិយោគ ដែលបានរួមចំណែកជាសារវន្តដល់ការអភិវឌ្ឍន៍សេដ្ឋកិច្ចជាតិ។

ជាមួយគ្នានេះ ស្ថានភាពអតិផរណាកំពុងវិលត្រលប់ទៅរកស្ថានភាពប្រសើរឡើងវិញ ស្របពេលដែលសកម្មភាពសាងសង់បានលេចឡើងនូវសញ្ញានៃការងើបឡើង។ វិស័យពាណិជ្ជកម្មអន្តរជាតិ អាចនឹងមានសន្ទុះកំណើនល្អនៅខែបន្ទាប់ ជាពិសេស ការនាំចេញផលិតផលវាយនភណ្ឌទៅកាន់ទីផ្សារលោកខាងលិចនារដូវរងារខាងមុខ។ ផ្អែកលើការតាមដានជាប់ជាប្រចាំ ទាំងសេដ្ឋកិច្ចក្នុងប្រទេស និង សេដ្ឋកិច្ចសកល បង្ហាញថាសកម្មភាពសេដ្ឋកិច្ចកម្ពុជា នៅបន្តចលនការងើបឡើង ជាពិសេសក្នុងវិស័យសេវាកម្ម និងពាណិជ្ជកម្ម។

ក្រសួងសេដ្ឋកិច្ច បានបញ្ជាក់ដូច្នេះថា ផ្អែកលើទិន្នន័យ ៦ ខែ និងនិន្នាការសូចនាករសំខាន់ៗ សេដ្ឋកិច្ចកម្ពុជាត្រូវបានប៉ាន់ស្មានថាអាចនឹងសម្រេចបានកំណើន ៦% ក្នុងឆ្នាំ ២០២៤ ដោយមានវិស័យខ្លះបានងើបឡើងវិញ វិស័យខ្លះមានកំណើនយឺត និងវិស័យខ្លះបន្តកំណើនទាប ខណៈដែលភាពមិនប្រាកដប្រជានៃលក្ខខណ្ឌសេដ្ឋកិច្ចសកលលោកបន្តនៅខ្ពស់ ហើយស្លាកស្នាមនៃវិបត្តិកូវីដ-១៩ នៅបន្តបង្កផលប៉ះពាល់អវិជ្ជមាន។

របាយការណ៍ពីក្រសួងសេដ្ឋកិច្ច​ ​និង​ហិរញ្ញវត្ថុ​ ​បានរំពឹង​ថា​ ​ផលិត​ក្នុងស្រុក​សរុប​​របស់​កម្ពុជា (​G​D​P​) ​អាចនឹង​កើនទៅដល់​ ​៣​៥​ ​ពាន់​លាន​ដុល្លារ​ (​១​៤​៣​ ​ពាន់​ពាន់​លាន​រៀល​) ​នៅ​ឆ្នាំ ២០២៤ នេះ​ ហើយ​ G​D​P​ ​សម្រាប់​មនុស្សម្នាក់​រំពឹង​ថា​នឹង​កើន​ឡើង​ដល់​ ​២​,​០​៧​១ ​ដុល្លារ​ក្នុង​ឆ្នាំ​ ​២​០​២​៤​ ​ធៀប​នឹង​ ​១​,​៩​១​៧​ ​ដុល្លារ​ ​ក្នុង​ឆ្នាំ​ ​២​០​២​៣៕