សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
តាមរយៈយុទ្ធនាការអន្ទាក់សូន្យទាំងពីរដំណាក់កាលមកនេះ ក្រសួងបរិស្ថានទទួលបានការចូលរួមយ៉ាងកុះករពីសំណាក់វិស័យឯកជន ក៏ដូចជាបុគ្គលផ្ទាល់។ ជាក់ស្ដែង មកដល់ពេលនេះ មានភោជនីយដ្ឋានចំនួន ៩៦ទីតាំងហើយ ដែលប្ដេជ្ញាមិនលក់ម្ហូបដែលធ្វើពីសាច់សត្វព្រៃ។ ចំនួននៃការចូលរួមរបស់ភោជនីយដ្ឋាននេះធ្វើឡើងនៅក្នុងបណ្ដាខេត្តចំនួន ១០ខុសៗគ្នា ក្នុងនោះយុទ្ធនាការនៅក្នុង ខេត្តសៀមរាបនាថ្ងៃទី២ ខែមិថុនានេះ ទទួលបានការចូលរួមបន្ថែមពីភោជនីយដ្ឋានចំនួន ១០កន្លែងទៀត។
បើតាម ឯកឧត្តម នេត្រ ភក្ក្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានឱ្យដឹងថា កន្លងមកយុទ្ធនា ការអន្ទាក់សូន្យបានខិតខំប្រឹងប្រែងផ្សព្វផ្សាយ ជាពិសេសអប់រំប្រជាពលរដ្ឋកុំឲ្យបរិភោគសាច់សត្វព្រៃ។ លើសពីនេះ ទៅទៀត ក្នុងយុទ្ធនាការនីមួយៗតែងតែបានបញ្ច្រៀបនូវសារសំខាន់ក្នុងការកែប្រែឥរិយាបថប្រជាជនដែលគិតថា ហូបសាច់សត្វព្រៃដើម្បីព្យាបាលជំងឺ។
ដោយឡែក ខេត្តសៀមរាបគឺជាខេត្តទី១០ហើយ ដែលឯកឧត្តម នេត្រ ភក្ក្រា បានដឹកនាំធ្វើយុទ្ធនាការអន្ទាក់សូន្យ ហើយសកម្មភាពផ្សព្វផ្សាយនៅក្នុងខេត្តមួយនេះ កាន់តែមានសារៈសំខាន់ទៅទៀតដោយ ៖
“ខេត្តសៀមរាបគឺជាខេត្តទេសចរណ៍ ដែលមិនត្រឹមតែភ្ញៀវទេសចរនៅក្នុងស្រុកទេ តែក៏មានភ្ញៀវពីបណ្ដាប្រទេសនានាផងដែរ វាក៏ជាមុខសញ្ញាមួយដែលអាចមានការផ្គត់ផ្គង់សាច់សត្វព្រៃទៅកាន់ភ្ញៀវទេសចរក្នុងស្រុក អីចឹងយុទ្ធនាការយើងនេះគឺដើម្បីបញ្ចប់ ហើយផ្ដល់នូវសារយ៉ាងសំខាន់ពីខេត្តសៀមរាបថាយើងមិនគាំទ្រការហូបសាច់សត្វព្រៃទេ។”
នេះបើតាមការបញ្ជាក់របស់ឯកឧត្តម នេត្រ ភក្ក្រា។
ដោយឡែក ក្រៅតែពីការប្ដេជ្ញាចិត្តរបស់ភោជនីយដ្ឋាន ដែលក្រសួងបរិស្ថានតែងទទួលបាននោះ ក៏មានការតាំងចិត្តពីមនុស្សម្នាក់ៗផងដែរក្នុងការមិនហូបសាច់សត្វព្រៃ ហើយដែលទាំងអស់នេះកើតចេញ ពីលទ្ធផលនៃការធ្វើយុទ្ធនាការអន្ទាក់សូន្យ ដែលក្រសួងបានផ្ដល់សារសំខាន់ៗជាច្រើនដល់ប្រជាជនដែលបានចូលរួម។
ពាក់ព័ន្ធនឹងចំនុចនេះដែរ លោក រស់ ជ័រ ប្រធាននាយកដ្ឋានជីវភាពសហគមន៍នៃក្រសួងបរិស្ថាន បានឱ្យដឹងថា ក្នុងនាមលោកជាអ្នកធ្វើការផ្ទាល់ជាមួយប្រជាជនមូលដ្ឋាន លោកក៏បានបញ្ច្រាបនូវការអប់រំផ្សព្វផ្សាយនានារបស់ក្រសួង ជាពិសេសគឺផ្ដល់ជម្រើសការងារបន្ថែមដល់ពួកគេ ដើម្បីបង្វែរពួកគេចេញពីការពឹងផ្អែកលើធនធានធម្មជាតិ។
លោក រស់ ជ័រ បានមានប្រសាសន៍ក្នុងយុទ្ធនាការអន្ទាក់សូន្យនាខេត្តសៀមរាបថា ៖
“សហគមន៍ទូទាំងប្រទេសយើងមាន ១៩០សហគមន៍ហើយ ហើយបើគិតជាចំនួនគ្រួសារគឺមានជាង ៧ម៉ឺនគ្រួសារ ត្រូវនឹងជាង២៩ម៉ឺននាក់ចំនួននេះច្រើនណាស់ ដូច្នេះហើយបើសិនគាត់អត់ចូលរួមអត់ប្ដូរឥរិយាបថទេ អន្ទាក់គឺមិនអាចសូត្របានឡើយ។”
បើទោះជាយ៉ាងនេះក្ដី លោកមានជំនឿថា ក្រសួងត្រូវការពេលវេលាបន្តទៀតដើម្បីអាចលុបបំបាត់ អន្ទាក់ចេញពីធម្មជាតិ ព្រោះរឿងនេះត្រូវធ្វើជាជំហានៗ។ លោកក៏បានលើកជាឧទារណ៍ដ៏ល្អមួយ ដែលបច្ចុប្បន្ន ប្រជាសហគមន៍ក្នុងតំបន់ភ្នំគូលេនចាប់ផ្ដើមបង្វែរចេញពីធនធានធម្មជាតិ ហើយមកប្រកបរបរដាំដំណាំ ចិញ្ចឹមសត្វ និងកែច្នៃជាផលិតផលផ្សេងៗ ដោយមានជំនួយពីក្រសួងបរិស្ថាន។
តាមរយៈគំរូដ៏ល្អនេះ លោកបានអំពាវនាវដល់សហគមន៍ផ្សេងៗទៀត ដែលនៅជាប់នឹងតំបន់ការពារធម្មជាតិ សូមងាកមកប្រកបរបរដែលក្រសួងបានផ្ដល់ឱ្យដោយទុកឱ្យធនធានធម្មជាតិការភាព សម្បូរឡើងវិញ ទុកជាកេរ្តិ៍ដល់កូនចៅជំនាន់ក្រោយទៀត៕
Account
Security
Favourite Content