ស្លឹកគ្រៃ មិនត្រឹមតែជាគ្រឿងផ្សំដែលប្រជាជនខ្មែរនិយមប្រើក្នុងសម្លរដើម្បីបង្កើនក្លិនឈ្ងុយ និងប្រហើរប៉ុណ្ណោះទេ ប៉ុន្តែវាក៏ត្រូវបានគេយកទៅហាន់ ហើយសម្ងួត កិនធ្វើជាតែធម្មជាតិមួយប្រភេទ ដែលមានក្លិនឈ្ងុយ រសជាតិឆ្ងាញ់ មានគុណប្រយោជន៍យ៉ាងច្រើនចំពោះសុខភាពអ្នកទទួលទាន ហើយអ្វីដែលសំខាន់ ថែមទាំងបានចូលរួមជួយដល់ជីវភាពកសិករដាំដុះស្លឹកក្រៃបានមួយផ្នែកផងដែរ។

លោក ម៉ៅ ចាន់តារា ម្ចាស់សិប្បកម្ម តារា ហ្វូត បានប្រាប់ AMS Economy ឱ្យដឹងថា ផលិតផលតែស្លឹកគ្រៃមានក្លិនឈ្ងុយល្អ ឆុងជាមួយទឹកទទួលទាន មានប្រយោជន៍ច្រើនចំពោះសុខភាព ខណៈដែលស្លឹកគ្រៃស្រស់ដែលជាវត្ថុធាតុដើមត្រូវបានប្រមូលទិញមកគឺជាកសិផលក្នុងស្រុកដែលដាំដុះដោយប្រជាកសិករខ្មែររបស់នៅខេត្តព្រៃវែង និងមួយចំនួនទៀតនៅខេត្តកណ្ដាល។

ម្ចាស់សិប្បកម្មរូបនេះបានបញញជាក់ថា ៖

«យើងផលិតតែស្លឹកគ្រៃ រួមនឹងផលិតផលផ្សេងៗមួយចំនួនទៀត ប៉ុន្តែចំពោះតែស្លឹកគ្រៃដែលត្រូវបានឆ្លងកាត់ការហាលសម្ងួត ហើយកិនឱ្យម៉ត់ជាម្សៅ ក្នុងមួយខែអាចផលិតបានប្រមាណ ១០-១៥គីឡូក្រាម ហើយក្នុងមួយគីឡូក្រាមម្សៅតែ យើងអាចច្រកតែស្លឹកគ្រៃបាន ១៥-១៨ប្រអប់។ ចំពោះតម្លៃវិញ តែស្លឹកគ្រៃមួយប្រអប់តម្លៃ ២ម៉ឺនរៀល ដោយក្នុងប្រអប់ធំ មានចំនួន ៣០កញ្ចប់តូចៗ ដែលអតិថិជនអាចទិញ និងទទួលទានប្រចាំថ្ងៃបានដល់មួយខែពេញ»។

ដោយឡែក ពាក់ព័ន្ធទៅនឹងការលក់វិញ សិប្បកម្ម តារា ហ្វូត បានពង្រីកទីផ្សារយ៉ាងទូលាយ ដោយក្នុងនោះមានដាក់លក់នៅតាមបណ្តានានាក្នុងប្រទេស ជាពិសេសក្នុងផ្សារទំនើប ហើយក្រៅពីនេះគឺផ្សព្វផ្សាយ និងដាក់លក់នៅក្នុងកម្មវិធីតាំងពិព័រណ៍ផលិតផលខ្មែរក្នុងស្រុក ហើយមួយផ្នែកទៀតក៏អាចលក់បានតាមបណ្តាញអនឡាញផងដែរ។

ទាក់ទងនឹងដំណើរការនៃការផលិតវិញ លោក តារា បានរៀបរាប់ថា ដើម្បីទទួលបានតែស្លឹកគ្រៃនេះ ដំបូងត្រូវយកស្លឹកគ្រៃស្រស់ ទាំងផ្នែកគល់ និងស្លឹក មកកាត់ជាកង់តូចៗ លាងសម្អាត រួចដាក់សម្ងួត។ ក្នុងការសម្ងួតទៀតសោត គេអាចដាក់ហាលថ្ងៃដោយប្រើរយៈប្រមាណ ៥ថ្ងៃទើបស្ងួតល្អ ឬប្រើទូរសម្ងួតត្រឹមកម្ដៅ ៦០-៩០ អង់ស្សាសេ រយៈពេលប្រមាណ ៣ថ្ងៃ។ បន្ទាប់មក គេយកដុំស្លឹកគ្រៃដែលស្ងួតហើយទៅកិនឱ្យម៉ដ្ឋជាម្សៅ និងលីងបន្ថែមទៀតដើម្បីឱ្យកាន់តែមានក្លិនឈ្ងុយ និងអាចរក្សាទុកបានយូរ ទើបយកមកច្រកចូកកញ្ចប់តូចៗ ជាការស្រេច។

សម្រាប់វត្ថុធាតុដើម ស្លឹកគ្រៃស្រស់ប្រមាណ ១០០គីឡូក្រាម អាចផលិតតែសម្រេចបានចន្លោះពី ១៥-២០គីឡូក្រាម ដែលគេទិញពីកសិករក្នុងតម្លៃ ៣០០០រៀលក្នុងមួយគីឡូក្រាម ហើយខ្លះទៀតកសិករក៏បានកាត់ និងហាលស្ងួតស្រាប់ៗ ដែលគ្រាន់តែយកមកសម្ងួតបន្ថែមជាការស្រេច។

ចំពោះការប្រើប្រាស់ តែស្លឹកគ្រៃ គេអាចឆុងជាមួយទឹកក្ដៅទទួលទានប្រចាំថ្ងៃ ដែលមានប្រយោជន៍ចំពោះសុខភាពដូចជា បំបាត់ការឈឺក្បាល គ្រប់គ្រងកម្រិតកូឡេសស្តេរ៉ុល ជួយបំប៉នសុខភាពស្បែក កាត់បន្ថយការឈឺចាប់ដោយសារជំងឺរលាកសន្លាក់ បណ្តេញជាតិពុលចេញពីរាង្គកាយ ជួយឱ្យអារម្មណ៍ស្រស់ស្រាយ និងអាចបំបាត់ស្រេសផងដែរ៕