សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
អគ្គនាយកដ្ឋានគយ និងរដ្ឋាករកម្ពុជា ក្នុងឆ្នាំ២០២២ ប្រមូលចំណូលប្រមាណ ២ ៦៩០,៥លានដុល្លារអាមេរិក កើនឡើង ១៨,៣% បើធៀបនឹងចំណូលក្នុងឆ្នាំ២០២១។ លទ្ធផលនេះ គឺសម្រេចបាន ១០៤,៩% នៃផែនការដែលកំណត់ដោយច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២។ នេះបើយោងតាមកិច្ចប្រជុំរបូកសរុបលទ្ធផលការងារគយ និងរដ្ឋាករប្រចាំឆ្នាំ២០២២ កាលពីថ្ងៃចុងសប្ដាហ៍កន្លងទៅនេះ។
យោងតាមរបាយការណ៍របស់ឯកឧត្ដមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករ កម្ពុជា បានបង្ហាញក្នុងកិច្ចប្រជុំបូកសរុបលទ្ធផលការងារ គយ និងរដ្ឋាករប្រចាំឆ្នាំ២០២២ នៅខេត្តកែបបានឱ្យដឹងថា ការងារសំខាន់ៗមួយចំនួនដែលសម្រេចបាន រួមមាន ចំណូលប្រមូលបានក្នុងឆ្នាំ២០២២ មានចំនួន ១០ ៩៩៨,៩ ប៊ីលានរៀល (ស្មើនឹងប្រមាណ ២ ៦៩០,៥ លានដុល្លារអាមេរិក) កើនឡើងប្រមាណ ១៨,៣% ធៀបនឹងចំណូលប្រមូលបានក្នុងឆ្នាំ២០២១។
ឯកឧត្ដមបណ្ឌិត គុណ ញឹម បានថ្លែងថា៖
“ចំណូលប្រមូលបានក្នុងឆ្នាំ២០២២ មានចំនួន ១០ ៩៩៨,៩ ប៊ីលានរៀល (ស្មើនឹងប្រមាណ ២ ៦៩០,៥ លានដុល្លារអាមេរិក) ដែលលទ្ធផលនេះ គឺសម្រេចបាន ១០៤,៩ភាគរយ នៃផែនការ ដែលកំណត់ដោយច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២”
បើគិតតាមប្រភេទពន្ធ និងអាករ ឃើញថា អាករលើតម្លៃបន្ថែមមានចំនួន ៤ ១៦៩,៨ ប៊ីលានរៀល (ត្រូវជា ៣៧,៩%នៃចំណូលសរុប), អាករពិសេសមានចំនួន ៤ ១៥១,៦ ប៊ីលានរៀល (ត្រូវជា ៣៧,៧% នៃចំណូលសរុប), ពន្ធគយមានចំនួន ២ ០៨៧ ប៊ីលានរៀល (ត្រូវជា ១៩% នៃចំណូលសរុប), អាករបន្ថែមលើផលិតផលប្រេងឥន្ធនៈមានចំនួន ៣៦៧,២ ប៊ីលានរៀល (ត្រូវជា ៣,៣% នៃចំណូលសរុប), និងអាករនាំចេញ និងកម្រៃផ្សេងៗមានចំនួន ២២៣,៤ ប៊ីលានរៀល (ត្រូវជា ២,១% នៃចំណូល សរុប)។ ចំពោះចំណូល តាមក្រុមទំនិញ ឃើញថា យានយន្ត និងគ្រឿងចក្រមានចំនួន ៥ ០៧៨,៧ ប៊ីលានរៀល (ត្រូវជា ៤៦,២% នៃចំណូលសរុប), ទំនិញចម្រុះមានចំនួន ៣ ០៣២,៦ ប៊ីលានរៀល (ត្រូវជា ២៧,៦% នៃចំណូល សរុប), ផលិតផលតេលសិលាមានចំនួន ២ ២៣៨ ប៊ីលានរៀល (ត្រូវជា ២០,៣% នៃចំណូលសរុប), និងសម្ភារ សំណង់ និងកម្រៃផ្សេងៗមានចំនួន ៦៤៩,៥ ប៊ីលានរៀល (ត្រូវជា ៥,៩% នៃចំណូលសរុប)។
ទំហំពាណិជ្ជកម្មនាំចូលមានចំនួន ២៥ ៤៦០,៤ លានដុល្លារអាមេរិក កើនឡើងប្រមាណ ១១,៩% ធៀបនឹងឆ្នាំ២០២១ ដែលក្នុងនោះទំនិញនាំចូលសំខាន់ៗមានជាអាទិ៍ យានយន្ត និងគ្រឿងចក្រ, ផលិតផលតេលសិលា, វត្ថុធាតុដើមនិងគ្រឿងម៉ាស៊ីនបម្រើដល់គម្រោងវិនិយោគ, គ្រឿងសំណង់, គ្រឿងឧបភោគ-បរិភោគ និងទំនិញចម្រុះផ្សេងទៀត។
ទំហំពាណិជ្ជកម្មនាំចេញមានចំនួន ២២ ៤៤៧,២ លានដុល្លារអាមេរិក កើនឡើង ១៦,៧% ធៀបនឹងឆ្នាំ២០២១ ដែលក្នុងនោះ ផលិតផល កាត់ ដេរមានកំណើន ១៤,១%, ផលិតផលវិនិយោគមិនមែនកាត់ដេរ (ដូចជា គ្រឿបំណែកអេឡិច ត្រូនិក បង្គុំខ្សែភ្លើង កង់ ផលិតផលពី ឈើ ផលិតផលប្លាស្ទិច គ្រឿងបន្លាស់រថយន្ត និងផលិតផលឧស្សាហកម្មផ្សេងៗ ទៀត) មានកំណើន ២៦,២%, និងកសិផលមានកំណើន ៦,៦%៕
Account
Security
Favourite Content