ភ្នំពេញ ៖ សមាគមសហគ្រិនវ័យក្មេងកម្ពុជា (YEAC) បានជួបជុំសមាជិករបស់ខ្លួនប្រចាំឆ្នាំដ៏ធំនៅមជ្ឈមណ្ឌលអភិវឌ្ឍន៍ធុរកិច្ច ដែលការជួបជុំនេះធ្វើឡើងនៅរសៀលថ្ងៃចុងសប្ដាហ៍កន្លងទៅដោយមានសមាជិកជាច្រើនចូលរួម ក្រោយវត្តមានដ៏ខ្ពង់ខ្ពស់របស់ឯកឧត្តមបណ្ឌិត សុខ ស៊ីផាន់ណា ទីប្រឹក្សារាជរដ្ឋាភិបាលកម្ពុជា។

លោកឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជា បានមានប្រសាសន៍ថា ទោះបីជាស្ថិតនៅក្នុងវិបត្តិបែបណាក្ដី សមាគមតែងបានពង្រីកខ្លួន តាមរយៈការពង្រីកសាខានៅតាមបណ្ដាខេត្តនានាមួយចំនួន។ សមាគមសហគ្រិនវ័យក្មេងមិនត្រឹមតែជាសមាគមដែលចុះបញ្ជីក្នុងក្រសួងប៉ុណ្ណោះទេ តែសមាគមនេះក៏មានការគាំទ្រពីរាជរដ្ឋាភិបាល ក៏ដូចជាជួយដល់សមាជិកនៃសមាគមឱ្យទទួលបាននូវអត្ថប្រយោជន៍ជាច្រើនផងដែរ ។

លោកឧកញ៉ាបន្តថា ៖

“ក្នុងអំឡុងប៉ុន្មានខែចុងក្រោយនេះ សមាគមសហគ្រិនវ័យក្មេងបានទទួលសមាជិកថ្មីៗបន្ថែមជិត១០០នាក់ ដែលវាជាការបង្ហាញពីការរីកលូតលាស់របស់សមាគមសហគ្រិនរបស់យើង និងអាចជួយឱ្យសមាជិករបស់សមាគមសហគ្រិនវ័យក្មេងយើងកាន់តែរីកលូតលាស់បន្ថែមទៀត”

លោកឧកញ៉ា ប៉ិច បូឡែន បានន្ថែមថា ៖

“ចាប់តាំងពីឆ្នាំ២០២៣នេះតទៅ សមាគមយើងនឹងផ្ដោតសំខាន់លើការពង្រឹងសមត្ថភាពសមាជិកនៃសមាគមរបស់យើង ហើយយើងទាំងអស់គ្នាត្រូវធ្វើអ្វីៗដើម្បីចូលរួមចំណែកជាមួយរដ្ឋាភិបាលក្នុងការអភិវឌ្ឍសង្គមតាមរយៈការធ្វើធុរកិច្ចហើយបង់ពន្ធជូនរដ្ឋត្រឹមត្រូវតាមច្បាប់”

ឯកឧត្តមបណ្ឌិត សុខ ស៊ីផាន់ណា ទីប្រឹក្សាជាន់ខ្ពស់រាជរដ្ឋាភិបាលកម្ពុជា និងជាគណៈអធិបតីក្នុងពិធីជួបជុំសមាគមសហគ្រិនវ័យក្មេងកម្ពុជានាឱកាសនោះ បានមានប្រសាសន៍ថា បច្ចុប្បន្ននេះកម្ពុជា មានកិច្ចព្រមព្រៀងពាណិជ្ជកម្មជាច្រើនជាមួយដៃគូ ដូច្នេះវាជាឱកាសសម្រាប់សហគ្រិនក្នុងស្រុកក្នុងការពង្រឹងសមត្ថភាព ពង្រឹងការផលិតរបស់ខ្លួនដើម្បីនាំចេញទៅកាន់ទីផ្សារនៃកិច្ចព្រមព្រៀងពាណិជ្ជកម្មសេរីទាំងនោះ។

ឯកឧត្តមបន្តថា ៖

“ការធ្វើធុរកិច្ចនៅក្នុងប្រទេសកម្ពុជាក៏ដូចជាពិភពលោកនាពេលបច្ចុប្បន្ននេះ បានផ្លាស់ប្តូរច្រើនពីការធ្វើធុរកិច្ចតាមបែបបុរាណមកជាការធ្វើធុរកិច្ចតាមប្រព័ន្ធអេឡិចត្រូនិក ( E-Commerce ) ។ យ៉ាងណាក្ដីសម្រាប់សហគ្រិនវ័យក្មេងកម្ពុជាសូមកុំទាន់គិតពីការប្រកួតប្រជែងនៅទីផ្សារក្រៅប្រទេស តែសូមគិតលើទីផ្សារក្នុងស្រុកឱ្យបានច្រើនឱ្យទូលំទូលាយជាមុន”

ឯកឧត្តមបន្តថា បន្តិចទៀតលំហូរវិនិយោគទុនបរទេសនឹងចូលមកកម្ពុជាកាន់តែច្រើន ដើម្បីវិនិយោគហើយនាំចេញទៅកាន់ទីផ្សារក្រៅប្រទេសវិញស្របជាមួយនឹងកម្ពុជាទទួលបានកិច្ចព្រមព្រៀងពាណិជ្ជកម្មសេរីសំខាន់មួយចំនួនដែលសុទ្ធសឹងតែជាទីផ្សារធំៗ ដូចជា កិច្ចព្រមព្រៀងពាណិជ្ជកម្មសេរី កម្ពុជា ជាមួយចិន កិច្ចព្រមព្រៀងពាណិជ្ជកម្មកម្ពុជាជាមួយនឹងប្រទេសកូរ៉េ និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ហៅកាត់ថា RCEP មានប្រទេសធំៗជាច្រើនជាដៃគូនៃកិច្ចព្រមព្រៀងនេះ ៕