ភ្នំពេញ ៖ ផ្អែកតាមឯកសារដែលផ្សព្វផ្សាយដោយក្រសួងកសិកម្មបានឱ្យដឹងថា ត្រសក់ស្រូវ ជាប្រភេទដំណាំមួយដែលត្រូវបានគេនិយមចូលចិត្តបរិភោគទាំងនៅពេលផ្លែខ្ចី និងផ្លែទុំ ដោយវាត្រូវបានក្រុមអ្នកវិទ្យាសាស្ត្រចាត់បញ្ចូលក្នុងគ្រួសារ Cucurbitaceae លំដាប់ជាក្រុម Cucumis Spp ដែលមានឈ្មោះវិទ្យាសាស្ត្រហៅថា Cucumis milo (Naudian ១៨៥៩ និង Kurz ១៨៧៧) ។ ការចូលចិត្តទទួលទានទាំងផ្លែខ្ចី និងផ្លែទុំនេះ ដោយសារតែវាមានសាធាតុចិញ្ចឹមច្រើនយ៉ាង ផ្តល់អត្ថប្រយោជន៍ដល់សរីរាង្គកាយ។ យ៉ាងណាក៏ដោយ ពេលនេះ សូមបងប្អូនប្រជាពលរដ្ឋ ជាពិសេសប្រជាកសិករដែលជាអ្នកដាំដុះ ងាកមកស្វែងយល់ពីបច្ចេកទេសសំខាន់ៗក្នុងការដាំដុះ និងថែទាំតាសក់ស្រូវ ដែលអាចប្រមូលផលបានដល់ទៅជាង ១០តោនក្នុង ១ហិកតា។

តាសក់ស្រូវជាដំណាំឆាប់ឱ្យផល ដោយកសិករអាចប្រមូលផលជាផ្លែខ្ចីបាននៅរយៈពេល ៤៥-៥០ថ្ងៃក្រោយពេលដាំ គេអាចប្រមូលបាន ៣-៤ថ្ងៃម្ដងៗ ហើយបេះបានច្រើនដង ក្នុងវដ្តអាយុកាលរបស់វា ដោយទិន្នផលជាមធ្យមអាចបានចន្លោះពី ៨-១១តោន នៅតំបន់មាត់ទន្លេ។ ការប្រមូលផល គឺប្រើកន្ត្រៃកាត់យកផ្លែ ហើយដើម្បីរក្សាទុកបានយូរត្រូវទុកតាសក់ក្រោមម្លប់ភ្លាមបន្ទាប់ពីកាត់ហើយ ដោយឡែកការប្រមូលផលផ្លែទុំ គេត្រូវទុកឱ្យតាសក់ទុំពេញលក្ខណៈរហូតដល់វារបេះទង ដោយមានក្លិនក្រអូប និងមានរយៈពេលមិនលើសពី ៦៥-៧០ថ្ងៃក្រោយការដាំ។   

ដើម្បីដាំដុះទទួលបានផលល្អ​ កសិករត្រូវការជ្រើសរើសពូជតាសក់មួយដែលសមស្រប ដោយតាសក់ស្រូវមានច្រើនប្រភេទ មានពូជក្នុងស្រុក ពូជនាំចូល ឬពូជបង្កាត់ តែអ្នកដាំក្នុងស្រុកយើងភាគច្រើននៅតែបន្តការរក្សាពូជដោយខ្លួនឯងពីមួយរដូវទៅមួយរដូវ ដែលវាមានភាពស៊ាំទៅនឹងលក្ខខណ្ឌអាកាសធាតុច្រើនជំនាន់។ ក្នុងនោះ កសិករអាចពិនិត្យទៅលើអត្រាដំណុះរបស់ពូជតាសក់ស្រូវ ដែលអាចចាប់ពី ៨៥ភាគរយឡើងទៅជាពូជសុទ្ធ គ្មានជាប់មកនូវភ្នាក់ងារបន្តរោគ និងសត្វល្អិតចង្រៃផ្សេងៗ ហើយពូជនេះមានដំណេកគ្រាប់យូរខែជាងពូជតាសក់ផ្សេងទៀត។

ដោយសារតាសក់ស្រូវមានប្រព័ន្ធឫសរាក់ ដែលវាត្រូវការប្រភេទដីមានជីជាតិពីធម្មជាតិ ស្រទាប់ដាំដុះជ្រៅជ្រាបទឹករហ័ស ដែលជាប្រភេទដីក្រហមខ្ពង់រាប ដីភ្នំ ដីល្បាយខ្សាច់ និងដីល្បាប់មាត់ទន្លេ ស្ទឹង បឹងជាដើម។ បន្ថែមពីលើនេះ គេត្រូវរៀបចំដីឱ្យបានល្អ ដោយមានការរាស់ប្រមូលយកស្មៅ កាកសំណល់ផ្សេងៗ ភ្ជួរដីឱ្យជ្រៅ ហាលដីឱ្យស្ងួត រាស់បំបែកដីឱ្យល្អិត និងច្រើនសារ ទើបលើកជារង ដែលមានកម្ពស់ ២០-២៥សង់ទីម៉ែត្រ ទទឹងរង ១២០-១៥០សង់ទីម៉ែត្រ កៀរដីឱ្យស្មើលើរងបន្ទាប់មកកាប់ជារណ្ដៅចំកណ្ដាលជម្រៅ ១០-១៥សង់ទីម៉ែត្រ ក្នុងគម្លាត ៧០សង់ទីម៉ែត្រ។

មុននឹងដាំ កសិករត្រូវសម្អាតគ្រាប់ពូជជាមុនសិន ហើយដាក់ហាលថ្ងៃ ១-២ម៉ោង ក្រោយមកយកទៅត្រាំទឹក ៤-៥ម៉ោង រួចលាងជាមួយទឹកស្អាត ៣-៤លើក ទើបយកទៅផ្អាប់ទុកមួយយប់ដើម្បីឱ្យគ្រាប់ពូជមានការវិវត្តផ្នែកអំប្រ៊ីយ៉ុង ធ្វើឱ្យតាសក់ដុះស្មើល្អ។ ក្នុងមួយហិកតា គេប្រើពូជ ១.៨-២.២គីឡូក្រាម ដោយពេលដាំត្រូវលាយជាមួយថ្នាំការពារជំងឺផ្សិត ក្នុងបរិមាណ ២-៣ក្រាមសម្រាប់ពូជ ១គីឡូក្រាម។

ចំពោះរណ្ដៅនៅលើរងត្រូវយកដីធម្មជាតិទៅដាក់បាតរណ្ដៅ ដោយលាយជាមួយគ្រាប់ថ្នាំ Furadan បន្តិចៗ ឬយកជីផូស្វាតលាយជាមួយជីធម្មជាតិ ១០០-១៥០ក្រាម ក្នុងមួយហិកតា ហើយលុបដីឱ្យជិត និងដាំដុះតាមក្រោយ ដោយមួយរណ្ដៅដាក់ពូជ ៣-៤គ្រាប់ ហើយគ្របកម្ទិចចំបើងស្ងួតពីលើ និងស្រោចទឹកផ្សើមរណ្ដៅឱ្យសើម។

ការស្រោចស្រព តាសក់ស្រូវត្រូវការបរិមាណទឹកតាមដំណាក់កាលដូចជា រយៈពេលដាំដំបូងវាត្រូវការសំណើមមធ្យម រហូតដល់ពន្លូតទងមានស្លឹក ២-៣សន្លឹក តែនៅតំបន់សម្បូរប្រភពទឹកក្រោមដីដូចជាល្បាប់មាត់ទន្លេ គេស្រោចទឹកតែ ៣-៤ថ្ងៃប៉ុណ្ណោះក្រោយពេលដាំ។ ចំណែកពេលតាសក់ចេញផ្កា រហូតដល់ប្រមូលផល វាទាមទារនូវសំណើមច្រើនដើម្បីជំនួយដល់ការធំធាត់ ដោយគេអាចផ្ដល់ទឹក ៧-១០ថ្ងៃម្ដង ទៅតាមប្រភេទដី និងអាកាសធាតុ ក៏ដូចជាវិធីផ្ដល់ទឹកដូចជាការបាញ់ទឹកផ្សើមពីលើ ឬបញ្ចូលទឹកតាមចន្លោះជួរ។ 

ក្រៅពីនេះ ដើម្បីតាសក់លូតលាស់បានល្អ កសិករក៏ត្រូវការសម្អាតស្មៅ ជ្រួយដីឱ្យធូរ និងពូនគល់តាមក្រោយ នៅពេលតាសក់មានអាយុ ១៨-២០ថ្ងៃ ឬនៅពេលវាលូតទងបាន ៥-៦ថ្នាំង។ ចំណែកការដាក់ជី ក៏ត្រូវបែងចែកជាដំណាក់កាលផ្សេងគ្នាដែរ ដូចជានៅ ១០-១៥ថ្ងៃក្រោយដាំ ដំណាំត្រូវការជីអ៊ុយរ៉េលាយជាមួយទឹកស្រោចតាមគល់ បរិមាណ៣៥គីឡូក្រាមក្នុងមួយហិកតា លុះការបំប៉នលើកទីពីរ នៅ ១៨-២០ថ្ងៃក្រោយដាំ គេត្រូវការជី ១៥.១៥.១៥ រោយតាមគល់ ឬពូនគល់ បរិមាណ១០០-១២០គីឡូក្រាមក្នុងមួយហិកតា។

ចំណែកការបំប៉នដំណាក់កាលទី៣ គេចែកជា ២ វិធីសាស្ត្រផ្អែកទៅតាមផលិតកម្មរួមមាន ការផលិតជាបន្លែ គឺប្រមូលយកផ្លែខ្ចី ដោយប្រមូលបាន ២-៣លើកហើយ គេត្រូវយកជីអ៊ុយរ៉េទៅរោយជុំវិញគល់ ហើយស្រោចទឹក បរិមាណ ៥០-៧០គីឡូក្រាម ក្នុងមួយហិកតា ឯការយកផ្លែទុំ គេត្រូវយកជីអ៊ុយរ៉េ ៤០គីឡូក្រាមលាយជាមួយប៉ូតាស្យូម ៥០-៦០គីឡូក្រាម​ លាយបញ្ចូលគ្នា កប់ក្បែរគុម្ព ក្រោយពីតាសក់ចេញផ្កាបាន ២០-២៥ថ្ងៃ។

យ៉ាងណាមិញ តាសក់ស្រូវអាចប្រឈមនឹងជំងឺមួយចំនួនដូចជា ជំងឺរលួយកូន ជំងឺស្លឹកពណ៌ត្នោត ជំងឺផ្សិតម្សៅលើស្លឹក បាក់តេរីធ្វើឱ្យស្រពោនស្លឹក បាក់តេរីធ្វើឱ្យរលួយផ្លែ ក្រៅពីនេះក៏មានសត្វចង្រៃផ្សេងទៀតដូចជា ចៃខ្មៅ ចៃបៃតង មមាចជញ្ជក់ស្លឹក រុយស មមង់ជញ្ជក់ស្លឹក សត្វដង្កូវ ដង្កូវមូរស្លឹក ដង្កូវចោះផ្លែ រុយទិចផ្លែ និងអណ្ដើកមាស៕