សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ និងធនាគារជាតិនៃកម្ពុជា បានសហការជាមួយគ្រឹះស្ថានឯកជនចំនួន ២ ផ្សេងទៀតរួមមាន ក្រុមហ៊ុនក្រេឌីត ប្យូរ៉ូ (ខេមបូឌា ) និងក្រុមហ៊ុន ហ្វាន់ហ្កាយ ( Fungi) ដាក់ឱ្យប្រើប្រាស់ជាផ្លូវការនូវកិច្ចសហប្រតិបត្តិការលើប្រព័ន្ធកម្មវិធីអន្តរកម្មផ្លាស់ប្តូរទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ កាលពីរសៀលថ្ងៃទី១២ ខែធ្នូ ឆ្នាំ២០២៤ ។
កម្មវិធីនេះមានការចូលរួមពីសំណាក់ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោកជំទាវបណ្ឌិត ជា សិរី អគ្គទេសាភិបាលធនាការជាតិនៃកម្ពុជាផងដែរ ។
ថ្លែងនៅក្នុងពិធីប្រកាសដាក់ឱ្យប្រើប្រាស់ជាផ្លូវការនូវកិច្ចសហប្រតិបត្តិការប្រើប្រាស់ប្រព័ន្ធកម្មវិធីអន្តរកម្មផ្លាស់ប្តូរទិន្នន័យ លោកជំទាវបណ្ឌិតជា សិរី អគ្គទេសាភិបាលធនាគារជាតិនៃកម្ពុជា បានមានប្រសាសន៍ថា ការដាក់ឱ្យប្រើប្រាស់នូវប្រព័ន្ធនេះ នឹងអាចជួយទប់ស្កាត់ការក្លែងបន្លំ ការវាយតម្លៃហិរញ្ញវត្ថុកាន់តែមានសុក្រិត្យភាព និងលឿនជាមុន ការទទួលបានលក្ខខណ្ឌឥណទានកាន់តែប្រសើរ និងការការពារអតិថិជនពីបំណុលលើសលប់ជាដើម ។ ក្នុងន័យនេះគ្រឹះស្ថានធនាគារ និងហិរញ្ញវត្ថុ នឹងអាចធ្វើការសម្រេចចិត្តប្រកបដោយទំនុកចិត្ត និងប្រសិទ្ធភាពជាងមុន ខណៈអតិថិជនក៏អាចទទួលជម្រើសហិរញ្ញវត្ថុដែលមានតម្លៃសមរម្យជាងមុន ។
លោកជំទាវបានបន្តថា ៖
«ខឿនសេដ្ឋកិច្ចនឹងរីកចម្រើនទៅបាន ដរាបណាប្រព័ន្ធហិរញ្ញវត្ថុមានសុខភាពល្អស្របពេលដែលរូបវ័ន្តបុគ្គល និងនីតិបុគ្គល ទទួលឥណទានស្របតាមតម្រូវការ និងចៀសវាងនូវហានិភ័យនៃហិរញ្ញវត្ថុ ។ កិច្ចខិតខំប្រឹងប្រែងរបស់ភាគីពាក់ព័ន្ធទាំងអស់ បានធ្វើឱ្យយើងបោះជំហានទៅមុខបន្ថែម ឆ្ពោះទៅរកការសម្រេចបាននូវការចែករំលែកព័ត៌មានផ្នែកអចលនទ្រព្យ បន្ថែមពីលើព័ត៌មានចែករំលែកឥណទានដែលមានស្រាប់។ ការផ្ដល់សេវាផ្ទៀងផ្ទាត់អចលនទ្រព្យ ដោយសហការជាមួយក្រសួងរៀបចំដែនដី នគរូបនីយកម្ម និងសំណង់ នឹងអនុញ្ញាតឱ្យគ្រឹះស្ថានធនាគារ និងហិរញ្ញវត្ថុ ទាញយករបាយការណ៍អចលនទ្រព្យសម្រាប់ជាមូលដ្ឋានក្នុងការវិភាគ និងវាយតម្លៃមុនពេលសម្រេចផ្ដល់ឥណទានដល់រូបវ័ន្តបុគ្គល ក៏ដូចជានីតិបុគ្គល»។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ក្នុងរយៈពេលប៉ុន្មានឆ្នាំចុងក្រោយនេះ ប្រជាពលរដ្ឋកម្ពុជាចាប់ផ្ដើមយល់ដឹង និងអាចប្រើប្រាស់នូវប្រព័ន្ធឌីជីថល ជាក់ស្ដែងបច្ចុប្បន្ននេះ ការបញ្ជាទិញទំនិញនានា និងការទូទាត់សេវាទាំងឯកជន និងរដ្ឋ បានធ្វើឡើងតាមប្រព័ន្ធឌីជីថល ។ សម្រាប់ឯកឧត្តមបានផ្ដល់និយមន័យនេះថា សេវាគាប់ចិត្ត ពីព្រោះ ពលរដ្ឋដែលអង្គុយ ឬគេងលើគ្រែក៏អាចប្រើប្រាស់សេវាទាំងនេះបានដែរ ។
ឯកឧត្តមបន្តថា តាមរយៈទិន្នន័យ និងរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ ដាក់ជូនប្រព័ន្ធកម្មវិធីអន្តរកម្មផ្លាស់ប្តូរទិន្នន័យនេះ នឹងអាចជួយឱ្យអ្នកអភិវឌ្ឍន៍លំនៅឋាននៅកម្ពុជាដឹងច្បាស់ពីតម្រូវការរបស់អតិថិជន ហើយនឹងអភិវឌ្ឍន៍ចំគោលដៅ និងតម្រូវការរបស់ពលរដ្ឋ៕
Account
Security
Favourite Content