សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាការកត់សម្គាលនៅក្នុងប្រទេសកម្ពុជា មានក្រុមហ៊ុនរបស់កាណាដាចំនួន២ គឺ ធនាគារ ABA និងក្រុមហ៊ុនធានារ៉ាប់រងមេនូឡាហ្វ៍កំពុងធ្វើសកម្មភាពវិនិយោគ និងទទួលបានការគាំទ្រយ៉ាងខ្លាំងពីប្រជាជនកម្ពុជា ដែលធ្វើឱ្យក្រុមហ៊ុនទាំង ២ រនេះក្លាយជាតំណាងក្រុមហ៊ុនកាណាដាវិនិយោគនៅកម្ពុជា ។ ស្របគ្នានេះដែរ កម្ពុជាក៏បានស្នើឱ្យកាដាណាក៏ដូចជាក្រុមហ៊ុនទាំង ២ ជួយផ្សព្វផ្សាយពីសក្ដានុពលវិនិយោគរបស់កម្ពុជាដល់បណ្ដាវិនិយោគិនកាណាដាផ្សេងទៀតចូលមកបណ្ដាក់ទុនវិនិយោគនៅកម្ពុជា ។
នៅក្នុងជំនួបជាមួយប្រតិភូពាណិជ្ជកម្មអន្តរជាតិកាណាដា កាលពីចុងសប្ដាហ៍កន្លងទៅនេះ ឯកឧត្តម ជា វុទ្ធី អគ្គលេខាធិការនៃគណៈកម្មាធិការវិនិយោគ ក្រុមប្រឹក្សាអភិវឌ្ឍន៍កម្ពុជា បានស្នើឱ្យក្រុមហ៊ុនទាំង២ ដែលកំពុងធ្វើសកម្មភាពវិនិយោគនៅកម្ពុជា ជួយផ្សព្វផ្សាយពីកាលានុវត្តភាពវិនិយោគរបស់កម្ពុជា ទៅកាន សហគមន៍ធុរកិច្ចកាណាដា និងជួយជំរុញលើកទឹកចិត្តឱ្យក្រុមហ៊ុនកាណាដាពិចារណាធ្វើការវិនិយោគក្នុងវិស័យថាមពលកកើតឡើងវិញ និងវិស័យកសិ- ឧស្សាហកម្ម ។
ឯកឧត្តម ជា វុទ្ធី ក៏បានជម្រាបជូនប្រតិភូពាណិជ្ជកម្មអន្តរជាតិកាណាដា ពីកាលានុវត្តភាពវិនិយោគរបស់កម្ពុជាផងដែរ ដោយឯកឧត្តមមានប្រសាសន៍ថា បច្ចុប្បន្នកម្ពុជាមានច្បាប់ស្ដីពីវិនិយោគប្រកបដោយភាពបើកចំហ មានតម្លាភាព និងអាចប៉ាន់ប្រមាណទុកជាមុនបាន ហើយបរិស្ថានវិនិយោគនៅកម្ពុជា ក៏កាន់តែមានអំណោយផល ។ ជាក់ស្ដែងក្នុងរយៈពេល១ឆ្នាំនៃរាជរដ្ឋាភិបាលថ្មី កម្ពុជាទទួលបានរំហូរកំណើនវិនិយោគយ៉ាងគំហុក ក្នុងទុនវិនិយោគរហូតដល់៧,៥ពាន់លានដុល្លារអាមេរិក កើនឡើង ១៦១% បើធៀបនឹងរយៈពេលមួយចុងក្រោយនៃរាជរដ្ឋាភិបាលអាណត្តិមុន ។
លោក Paul Toppil ប្រធានគណៈប្រតិភូពាណិជ្ជកម្មអន្តរជាតិកាណាដា បានលើកឡើងពីយុទ្ធសាស្ត្រតំបន់ឥណ្ឌូប៉ាស៊ីហ្វិករបស់កាណាដា ដែលនឹងជួយឱ្យកាណាដាមានកំណើនសេដ្ឋកិច្ចរយៈពេលវែង នឹងផ្ដល់ប្រយោជន៍ដល់ប្រជាជនកាណាដាតាមរយៈការធ្វើឱ្យប្រសើរឡើងនូវទំនាក់ទំនងសេដ្ឋកិច្ច និងការធ្វើពិពិធកម្មសេដ្ឋកិច្ចជាមួយបណ្ដាសេដ្ឋកិច្ចសំខាន់ៗ នៅតំបន់ឥណ្ឌូប៉ាស៊ីហ្វិក ហើយក្នុងនោះក៏ចង់ឃើញកម្ពុជាដើរតួនាទីសំខាន់ក្នុងយុទ្ធសាស្ត្រនេះផងដែរ ។
លោកបន្តថា ភាគីកាណាដាក៏បានទទួលស្គាល់ពីសក្ដានុពលរបស់កម្ពុជា ដូចជាកត្តាសុខសន្តិភាព ស្ថិរភាពនយោបាយ និងសេដ្ឋកិច្ច ភាពបើកចំហរនៃរបបលើកទឹកចិត្តវិនិយោគ និងកម្លាំងពលកម្មវ័យក្មេង ។ មួយទៀត កម្ពុជាក៏អាចលើកពីភាពជោគជ័យនៃការវិនិយោគរបស់កាណាដានៅកម្ពុជា ដូចជាធនាគារ ABA និងក្រុមហ៊ុនធានារ៉ាប់រង Manulife ដើម្បីជាសក្ខីភាពផ្សព្វផ្សាយដល់សមាគមធុរកិច្ចកាណាដាឱ្យពិចារណាបណ្ដាក់ទុនវិនិយោគនៅកម្ពុជាបន្ថែមទៀត ។
គួរបញ្ជាក់ថា កម្ពុជាបានបើកចំហក្នុងការទទួលស្វាគមន៍វិនិយោគិនបរទេសមកពីគ្រប់ទិសទី ដែលគោលនយោបាយនេះ បានអនុវត្តតាំងពីរាជរដ្ឋាភិបាលអាណត្តិចាស់ ក្រោមការដឹកនាំរបស់សម្ដេចអគ្គមហាសេនាបតីតេជោហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា និងបានសម្រួលឱ្យវិនិយោគិនបរទេសអាចមានភាពកាន់តែងាយស្រួលក្នុងការមកបណ្ដាក់ទុនវិនិយោគនៅកម្ពុជា ៕
Account
Security
Favourite Content