ត្បូងឃ្មុំ ៖ ឆៃថាវ គឺជាដំណាំមួយប្រភេទដែលបងប្អូនប្រជាកសិករនិយមដាំ ដោយសារតែបន្លែប្រភេទនេះត្រូវការរយៈពេលខ្លី អាចលក់បានទាំងនៅស្រស់ និងច្នៃជាឆៃប៉ូវក៏បាន។ បច្ចុប្បន្ន សិប្បកម្មមួយកន្លែងនៅខេត្តត្បូងឃ្មុំ បានប្រមូលទិញឆៃថាវពីបងប្អូនប្រជាកសិករក្នុងសហគមន៍ ដើម្បីផលិតជាឆៃប៉ូវផ្អែម ដែលអាចរកចំណូលបន្ថែម និងចូលរួមលើកកម្ពស់ជីវភាពកសិករផងដែរ។

គ្រួសារសៀងឆ្ងាញ់ ជាសិប្បកម្មសៀងមួយកន្លែងស្ថិតនៅភូមិស្រែស្ពៃ ឃុំគងជ័យ ស្រុកអូររាំងឪ  ខេត្តត្បូងឃ្មុំ ដែលក្រៅពីផលិតសៀង សិប្បកម្មមួយនេះក៏មានធ្វើឆៃប៉ូវផ្អែមតាមរដូវ ដែលជាដំណាំរបស់កសិករក្នុងសហគន៍ ដើម្បីជួយលើកកម្ពស់ជីវភាពពួកគាត់ផង និងអាចរកចំណូលបន្ថែមសម្រាប់សិប្បកម្មផ្ទាល់ផងដែរ។

អ្នកស្រី ផាន់ ប៉ុណ្ណា ជាម្ចាស់សិប្បកម្មខាងលើ បានមានប្រសាសន៍ថា៖

“នៅរដូវនេះ យើងប្រមូលទិញឆៃថាវពីបងប្អូនកសិករក្នុងស្រុកអូររាំងឪ ដែលគាត់ដាំ ដើម្បីធ្វើជាឆៃប៉ូវផ្អែមលក់រកចំណូលក្រៅពីសៀង ដែលយើងធ្វើប្រចាំថ្ងៃ ដោយក្នុងមួយរដូវ យើងប្រមូលទិញឆៃថាវស្រស់បានប្រមាណជាង ១ តោន”

អ្នកស្រីបន្តថា ការប្រមូលទិញនេះ យើងចាប់ផ្ដើមនៅចន្លោះចុងខែធ្នូ ដល់ចុងខែមិនា ដែលជាធម្មតា កសិករយើងគាត់ដាំនៅចុងរដូវរំហើយដែលយើងទិញចូលឆៃថាវស្រស់ក្នុងតម្លៃ ១០០០-១៥០០ រៀលក្នុងមួយគីឡូក្រាម។

អ្នកស្រីបានឱ្យដឹងទៀតថា សម្រាប់តម្លៃឆៃប៉ូវផ្អែមវិញ អាចលក់បាន ១៥០០០ រៀល ក្នុងមួយគីឡូក្រាម សម្រាប់ការលក់រាយ និង ១២០០០ រៀល សម្រាប់តម្លៃបោះដុំ ហើយអតិថិជនភាគច្រើនជាអ្នកនិយមចូលចិត្តទទួលទានឆៃប៉ូវផ្អែមជាមួយបាយស ឬច្នៃជាម្ហូបផ្សេងៗ ពិសេសបងប្អូននៅរាជធានីភ្នំពេញ ដែលអាចទិញ និងរក្សាទុកហូបបានយូរ។

ពាក់ព័ន្ធនឹងការផលិតវិញ ឆៃប៉ូវផ្អែម ក៏មិនខុសពីការធ្វើឆៃប៉ូវធម្មតាដែលមានរសជាតិប្រៃប៉ុន្មានដែរ។ ដំបូង គេត្រូវចិតសម្អាតឆៃថាវស្រស់ លាងទឹកឱ្យស្អាត រួចពុះជាចំណិតតូចៗប្រឡាក់ជាមួយអំបិល ហើយផ្អាប់ទុកដោយញាត់ចូលក្រឡ ឬធុង។ បន្ទាប់ពីត្រាំទុកមួយយប់ ស្រង់ចំណិតឆៃថាវដាក់ហាលថ្ងៃ រួចប្រមូលមកដាក់ចូលក្រឡវិញពេលអស់ថ្ងៃ។ ធ្វើបែបនេះប្រមាណ ៣-៥ ថ្ងៃជាប់គ្នា តែហាលកុំឱ្យស្វិតពេក រួចយកវាទៅប្រឡាក់ស្ករ រួចហើយញាត់ចូលក្នុងកែវទុកជាការស្រេច៕