ភ្នំពេញ ៖ រាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម ដែលជាសេនាធិការ កាលពីពេលថ្មីៗនេះបានរៀបចំវេទិកាមួយស្តីពីវិស័យនាំចេញរបស់កម្ពុជា ដែលជាព្រឹត្តិការណ៍អមមួយនៃពិព័រណ៌ពាណិជ្ជកម្មកម្ពុជា ២០២៤ ដើម្បីជំរុញការនាំចេញផលិតផលកម្ពុជាទៅកាន់ទីផ្សារពិភពលោក។

នៅក្នុងវេទិកាដ៏មានសារសំខាន់មួយនេះមានការអញ្ជើញចូលរួមពីថ្នាក់ដឹកនាំក្រសួងពាណិជ្ជកម្ម , ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនាវានុវត្តន៍, ក្រសួងកសិកម្ម រុក្ខាប្រមាញ់ និងនេសាទ , ក្រសួងប្រៃសណីយ៍ និងទូរគមនាគមន៍, ក្រសួងសាធារណការ និងដឹកជញ្ជូន, ធនាគារជាតិនៃកម្ពុជា អគ្គនាយកដ្ឋានគយ និងរដ្ឋាករកម្ពុជា និងកំពង់ផែស្វយ័តក្រុងព្រះសីហនុ, សភាពាណិជ្ជកម្មកម្ពុជា និងតំណាងដៃគូអភិវឌ្ឍន៍ សហព័ន្ធ និងសមាគម ក្រុមហ៊ុនជាតិ-អន្តរជាតិ ជាច្រើនរូប។

លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម បានថ្លែងថា៖ វេទិកានេះរៀបចំឡើងដោយក្រុមការងារជំរុញការនាំចេញ ក្នុងគោលបំណងលើកកម្ពស់ការនាំចេញផលិតផលកម្ពុជា ទៅកាន់ទីផ្សារអន្តរជាតិ ដោយផ្តោតសំខាន់លើចក្ខុវិស័យថ្មីៗនៃការនាំចេញ ការអភិវឌ្ឍនៃវិស័យពាណិជ្ជកម្មអន្តរជាតិរបស់កម្ពុជា ក៏ដូចជាផ្តល់ឱកាសដល់អ្នកចូលរួមឱ្យទទួលបានចំណេះដឹង និងផ្សាភ្ជាប់ទំនាក់ទំនងជាមួយដៃគូជាតិ-អន្តរជាតិ ដើម្បីបង្កើតកិច្ចសហប្រតិបត្តិការ និងលើកស្ទួយផលិតផលកម្ពុជានៅលើទីផ្សារសក​ល​ ក៏ដូចជាស្វែងរកឱកាសថ្មីៗក្នុងការកែច្នៃផលិតផលកសិកម្ម និងបន្ថែមគុណតម្លៃសម្រាប់ការនាំចេញ។

ពេលដែលកម្ពុជាត្រៀមចាកចេញពីក្រុមប្រទេសអភិវឌ្ឍតិចតួចនៅឆ្នាំ២០២៩ មន្ត្រីរដ្ឋាភិបាល និងអ្នកតំណាងវិស័យឯកជនបានសង្កត់ធ្ងន់លើតួនាទីសំខាន់នៃកិច្ចព្រមព្រៀងពាណិជ្ជកម្មសេរី (FTAs) និងការអនុគ្រោះពាណិជ្ជកម្មក្នុងការទ្រទ្រង់កំណើនសេដ្ឋកិច្ចរបស់ប្រទេស។ ក្រសួងពាណិជ្ជកម្ម បាន និងកំពុងធ្វើការជាមួយភាគីពាក់ព័ន្ធវិស័យឯកជន និងដៃគូអភិវឌ្ឍ ដើម្បីរៀបចំទុកជាមុនសម្រាប់កាចាកចេញរបស់កម្ពុជាពីក្រុមប្រទេសអភិវឌ្ឍតិចតួចនៅឆ្នាំ២០២៩។

លោកជំទាវ រដ្ឋលេខាធិការក្រសួងពាណិជ្ជកម្ម បានមានប្រសាសន៍ថា៖

« កិច្ចព្រមព្រៀងពាណិជ្ជកម្មសេរី FTAs , កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ RCEP និងកិច្ចព្រមព្រៀងពាណិជ្ជកម្មផ្សេងទៀត គឺជាកត្តាជំរុញដ៏សំខាន់ក្នុងការគាំទ្រដល់កិច្ចជំរុញការនាំចេញផកលិតផលរបស់កម្ពុជា»។

លោកជំទាវបានបន្ថែមថា ៖កិច្ចព្រមព្រៀងពាណិជ្ជកម្មសេរី FTAs ,កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់(RCEP) និងការអនុគ្រោះពាណិជ្ជកម្មបានរួមចំណែកជាបណ្តើរៗក្នុងការជំរុញការនាំចេញរបស់កម្ពុជា។ ទោះជាយ៉ាងណាក៏ដោយ កម្ពុជាបាន និងកំពុងធ្វើការជាមួយភាគីពាក់ព័ន្ធ ជាពិសេសជាមួយដៃគូអភិវឌ្ឍលើនីតិវិធី និងយន្តការមួយចំនួនដើម្បីទទួលបានការអនុគ្រោះពាណិជ្ជកម្មថ្មីនៅពេលដែលកម្ពុជាចាកចេញពីក្រុមប្រទេសអភិវឌ្ឍតិចតួចក្នុងពេលខាងមុខ។

លោកជំទាវបានបន្តថា ការផ្តោតជាយុទ្ធសាស្ត្រទាំងនេះ គឺសំដៅពង្រឹងកំណើនសេដ្ឋកិច្ចរបស់ប្រទេស និងការប្រកួតប្រជែងក្នុងទីផ្សារពិភពលោក។ ការធ្វើពិពិធកម្មទីផ្សារនាំចេញ និងការកាត់បន្ថយពន្ធគយអាចជួយកាត់បន្ថយផលប៉ះពាល់អវិជ្ជមានដែលអាចកើតមាននៃការបាត់បង់អត្ថប្រយោជន៍ដែលកម្ពុជាទទួលបានក្នុងនាមជាប្រទេសអភិវឌ្ឍតិចតួច។

គួរបញញជាក់ដែរថា យោងតាមរបាយការណ៍ពីអគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា កម្ពុជាបាននាំចេញផលិតផលទៅកាន់ទីផ្សារអន្តរជាតិមានតម្លៃ ២៣,៩៣ ពាន់លានដុល្លារក្នុងរយៈពេល ១១ ខែនៃឆ្នាំ២០២៤ កើនឡើង ១៦,៨ ភាគ​រ​យ​ធៀបនឹងរយៈពេលដូចគ្នាកាលពីឆ្នាំ២០២៣កន្លងទៅនេះ៕