សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
តំបន់អេកូទេសចរណ៍ជីផាត ជាសហគមន៍ទេសចរណ៍ធម្មជាតិស្រស់ស្អាតដែលជាក្តីប្រាថ្នារបស់ភ្ញៀវទេសចរដែលមានទំនោរខាងកម្សាន្តតំបន់ព្រៃភ្នំ ។ បច្ចុប្បន្ន សហគមន៍អេកូទេសចរណ៍ធម្មជាតិជីផាតកំពុង ត្រូវបានចាត់ទុកជាតំបន់ទេសចរណ៍មួយដ៏សំខាន់ និងទាក់ទាញបំផុតសម្រាប់ភ្ញៀវមកធ្វើទេសចរណ៍បែបផ្សងព្រេង សិក្សាស្រាវជ្រាវពីបុរាណវិទ្យា ប្រពៃណី វប្បធម៌ អរិយធម៌ និងធម្មជាតិនៃសត្វព្រៃជាដើម។
តំបន់កម្សាន្តធម្មជាតិមួយនេះ ស្ថិតក្នុងភូមិជីផាត ឃុំជីផាត ស្រុកថ្មបាំង ខេត្តកោះកុង មានចម្ងាយ ១២៦ គីឡូម៉ែត្រ ពីក្រុងខេមរភូមិន្ទ ដោយភ្ញៀវទេសចរជាតិ អន្តរជាតិ អាចធ្វើដំណើរទៅកាន់តំបន់នេះតាមផ្លូវជាតិលេខ៤៨ រហូតដល់ចំណុចផ្លូវបំបែកហួសស្ពានអណ្តូងទឹកប្រហែល ៥ គីឡូម៉ែត្រ រួចបន្តដំណើរតាមផ្លូវគ្រួសក្រហម រហូតដល់ភូមិ ជីផាតតែម្តង។
លោក អន សុវណ្ណ ដែលជាប្រជាសហគមន៍អេកូទេសចរណ៍ជីផាត បានប្រាប់ឱ្យដឹងថា បច្ចុប្បន្ន ចំនួននៃអ្នកទេសចរដែលទៅលេងតំបន់របស់លោកនៅមានកម្រិតនៅឡើយ ដែលជាហេតុជំរុញឱ្យលោកខិតខំប្រឹងប្រែងបន្ថែមទៀតនៅក្នុងការបង្កើតផលិតផលទេសចរណ៍ថ្មីៗ ដើម្បីបង្កើនភាពទាក់ទាញ។
ថ្វីត្បិតថា ចំនួនភ្ញៀវទេសចរចូលទៅលេងតំបន់របស់លោកមិនទាន់ច្រើនក៏ពិតមែន ប៉ុន្តែលោកបានអះអាងថា ចំនួននេះបានកើនឡើងជាលំដាប់ពីមួយឆ្នាំទៅមួយឆ្នាំ ជាពិសេសគឺភ្ញៀវក្នុងស្រុកតែម្ដង ខណៈដែលកាលពីដើមឡើយ សហគមន៍មួយនេះជាទីល្បីល្បាញសម្រាប់តែភ្ញៀវទេសចរបរទេសប៉ុណ្ណោះ ដោយហេតុថា ភ្ញៀវក្នុងស្រុកមិនសូវជាមានទំនោរក្នុងការដើរតាមតំបន់ទេសចរណ៍ធម្មជាតិ។
យុវតី នួន សុដានីន ដែលជាអ្នកទៅទស្សនាតំបន់សហគមន៍ជីផាតកាលពីអំឡុងពេលនៃពិធីបុណ្យភ្ជុំបិណ្ឌកន្លងទៅបានរៀបរាប់ថា វាជាលើកទី១របស់កញ្ញាដែលបានទៅទស្សនាតំបន់ធម្មជាតិ។ អ្វីដែលជាការចាប់អារម្មណ៍គឺកញ្ញាបានសង្កេតឃើញថា ប្រជាជននៅក្នុងសហគមន៍បានថែទាំផ្ទះសម្បែងបានល្អ ដែលជាការទាក់ទាញមួយនៅពេលកញ្ញាជិះកាត់ផ្ទះទាំងនោះ។
យុវតីវ័យជាង ២០ឆ្នាំរូបនេះ បានបន្តរៀបរាប់ទៀតថា៖
«សម្រាប់ទេសភាពវិញគឺកាន់តែស្រស់ស្អាត ហើយគាប់ជួនត្រូវនឹងខែភ្លៀងបែបនេះផង ស្មៅលាស់ខ្ចី បង្កើតបានជាទស្សនីយភាពខៀវស្រងាត់តែម្ដង។»
អង្គុយលើថ្មប្របនឹងទឹកធ្លាក់ឆាយជ្រៃ ដែលស្ថិតក្នុងឃុំជីផាតបណ្ដើរ យុវតី សុដានីន ញញឹមស្រូបយកខ្យល់អាកាសបរិសុទ្ធ ប្រៀបបានទៅនឹងការព្យាបាលផ្លូវចិត្តឱ្យធូរស្រាល បន្ទាប់ពីការងារដ៏មមាញឹក និងភាពអ៊ូអ៊រនៅទីក្រុងភ្នំពេញ។
ទទួលបានបទពិសោធន៍ជាលើកទីមួយ យុវតីរូបនេះបានគូសបញ្ជាក់ដែរថា៖
«សម្រាប់អ្នកដែលធ្វើការងារហត់ ក៏ដូចជាមានស្ត្រេសច្រើន ខ្ញុំលើកទឹកចិត្តឱ្យទៅតំបន់នោះតែម្ដង ទីនោះស្ងាត់ល្អ មិនមានសំឡេងរំខានច្រើន មានតែសំឡេងទឹកហូរ និងសំឡេងសត្វយំ។»
មិនត្រឹមតែប៉ុណ្ណោះ កញ្ញាយល់ថា ការទៅលេងតំបន់សហគមន៍បែបនេះ គឺនឹងអាចរួមចំណែកជួយដល់ជីវភាពប្រជាជននៅក្នុងតំបន់នោះច្រើន មិនថាដោយប្រយោល ឬដោយផ្ទាល់នោះទេ។
ស្រដៀងគ្នានេះដែរ ប្រធានសហគមន៍អេកូទេសចរណ៍ដដែលបានសំណូមពរដល់ប្រជាពលរដ្ឋក្នុងស្រុកឱ្យចូលទៅទស្សនាតំបន់របស់លោកបន្ថែមទៀត ដោយហេតុថា នៅពេលមានកំណើនទេសចរ ប្រជាពលរដ្ឋដែលរស់នៅក្នុងសហគមន៍ក៏អាចទទួលផលពីការចាយវាយរបស់ភ្ញៀវដែរ។
គួរបញ្ជាក់ថា សហគមន៍អេកូទេសចរណ៍ជីផាត ជាសហគមន៍ចំណាស់មួយដែលត្រូវបានបង្កើតឡើងតាំងតែពីឆ្នាំ២០០៧ មានទីតាំងស្ថិតនៅក្នុងស្រុកថ្មបាំង ខេត្តកោះកុង ជាទឹកដីសម្បូរទៅដោយព្រៃភ្នំយ៉ាងស្រស់បំព្រង។
គិតមកទល់បច្ចុប្បន្ន សហគមន៍មួយនេះបានបង្កើតនូវកញ្ចប់សេវាកម្មទេសចរណ៍ជាច្រើនដូចជា៖សេវាកម្មផ្ទះស្នាក់របស់ប្រជាសហគមន៍ សេវាកម្មជួលកង់ជិះក្នុងសហគមន៍ សេវាកម្មជូនភ្ញៀវឡើងភ្នំ សេវាកម្មជិះទូកកាយ៉ាក និងសេវាកម្មជូនភ្ញៀវទៅទស្សនាតំបន់ប្រវត្តិសាស្ត្រផងដែរ៕
Account
Security
Favourite Content