យោងទៅតាមប្រភពព័ត៌មានពី Hellen Shipping News ជាលទ្ធផលសេដ្ឋកិច្ចរបស់ប្រទេសចិនក្នុងឆ្នាំ២០២២ បានបង្ហាញពីភាពធន់របស់ខ្លួនជាមួយនឹងកំណើនសេដ្ឋកិច្ច ៣ ភាគរយ ទោះបីជាមានការរាតត្បាតពីកូវីដ-១៩ក៏ដោយ។ យ៉ាងណាក្ដី ចិននៅតែអាចរក្សាជំហររបស់ខ្លួនជាប្រទេសដែលមានសេដ្ឋកិច្ចធំមួយរបស់ពិភពលោក និងជាអ្នករួមចំណែកដ៏សំខាន់ដល់កំណើនសេដ្ឋកិច្ចពិភពលោក។

ថ្មីៗនេះ ​សន្និសីទការងារសេដ្ឋកិច្ចនៅចិនបានអំពាវនាវឱ្យមានការជំរុញនូវកំណើននៃតម្រូវការក្នុងស្រុក ដើម្បីជំរុញការអភិវឌ្ឍន៍សេដ្ឋកិច្ច ដោយផ្តោតជាជំហានវិជ្ជមានឆ្ពោះទៅរកការសម្រេចបាននូវកំណើនប្រកបដោយចីរភាព និងតុល្យភាពនៅក្នុងប្រទេសចិនទាំងមូល។ នៅក្នុងសន្និសីទនេះក៏បានសង្កត់ធ្ងន់ពីតម្រូវការក្នុងស្រុកដើម្បីស្របតាមកិច្ចខិតខំប្រឹងប្រែងរបស់រដ្ឋាភិបាល ដោយទីក្រុងប៉េកាំងកំពុងពង្រឹងសេដ្ឋកិច្ចដែលមានស្ថិរភាព និងគ្រប់គ្រាន់សម្រាប់ខ្លួនឯង និងដើម្បីកាត់បន្ថយការពឹងផ្អែកលើកត្តាពីខាងក្រៅ។

ការផ្តោតសំខាន់លើតម្រូវការក្នុងស្រុក ក៏ជាការឆ្លើយតបទៅនឹងភាពមិនប្រាកដប្រជានៃសេដ្ឋកិច្ចពិភពលោកដែលកំពុងបន្តមាន និងអាចផ្តល់ផលប៉ះពាល់ទៅលើការនាំចេញរបស់ចិន។ រដ្ឋាភិបាល​សង្ឃឹម​ថា ផែនការនេះ​នឹង​បង្កើត​ឱកាស​ថ្មី​សម្រាប់​ឧស្សាហកម្ម​ និង​ផ្តល់​នូវ​ការ​ទប់​ទល់​នឹង​ការ​ប៉ះទង្គិច​ខាង​ក្រៅ​ដល់​សេដ្ឋកិច្ច។ ការពង្រីកតម្រូវការក្នុងស្រុកជាកត្តាជំរុញដ៏សំខាន់នៃសេដ្ឋកិច្ចរបស់ប្រទេសចិនបាននាំមកនូវឱកាសជាច្រើន និងបញ្ហាប្រឈមថ្មីៗដល់ឧស្សាហកម្មផ្សេងៗផងដែរ ដោយសារវាមានឥទ្ធិពលខ្លាំងទៅលើការប្រកួតប្រជែង សន្តិសុខនៃសង្វាក់ឧស្សាហកម្ម និងការផ្គត់ផ្គង់របស់ប្រទេសចិន។

នៅពេលដែលតម្រូវការក្នុងស្រុកបន្តកើនឡើង នឹងពង្រីកទំហំនៃខ្សែសង្វាក់ឧស្សាហកម្ម ដែលនាំទៅរកការកើនឡើងនៃការប្រកួតប្រជែង និងការអភិវឌ្ឍនៃឧស្សាហកម្មថ្មីៗ។ ការកើនឡើងនៃការប្រកួតប្រជែងនឹងនាំទៅដល់ការបង្កើនប្រសិទ្ធភាពនៃរចនាសម្ព័ន្ធឧស្សាហកម្ម ការធ្វើឱ្យប្រសើរឡើងនូវគុណភាពផលិតផល និងការកាត់បន្ថយថ្លៃដើមផលិតកម្ម។ ការកើនឡើងនៃតម្រូវការក្នុងស្រុកអាចជំរុញការអភិវឌ្ឍន៍នៃបច្ចេកវិទ្យាថ្មីៗ ដែលអាចធ្វើឱ្យប្រសើរឡើងនូវសុវត្ថិភាពនៃសង្វាក់ឧស្សាហកម្ម កាត់បន្ថយការពឹងផ្អែកលើបច្ចេកវិទ្យាពីក្រៅស្រុក កាត់បន្ថយផលិតផលដែលនាំចូល និង​បង្កើនការប្រកួតប្រជែងនៃឧស្សាហកម្មក្នុងស្រុកដែលអាចប្រកួតប្រជែងនៅក្នុងទីផ្សារពិភពលោក។

មិនត្រឹមតែប៉ុណ្ណោះ ការជំរុញតម្រូវការក្នុងស្រុកនឹងធ្វើឱ្យប្រសើរឡើងនូវការគ្រប់គ្រងខ្សែសង្វាក់ផ្គត់ផ្គង់នៃឧស្សាហកម្មក្នុងស្រុក ព្រោះវាអាចបំពេញតម្រូវការរបស់អ្នកប្រើប្រាស់បានគ្រប់គ្រាន់ និងជួយបង្កើនប្រសិទ្ធភាពនៃឧស្សាហកម្មក្នុងស្រុក។ លើសពីនេះ ការកើនឡើងនៃតម្រូវការក្នុងស្រុកនឹងជំរុញការអភិវឌ្ឍន៍សហគ្រាសធុនតូច និងមធ្យម (SMEs) របស់ចិន ដែលដើរតួនាទីយ៉ាងសំខាន់នៅក្នុងខ្សែសង្វាក់ឧស្សាហកម្ម ដោយសាជារឿយៗពួកគេមានប្រឈមមុខនឹងបញ្ហាប្រឈមជាច្រើន ដូចជាលទ្ធភាពទទួលបានហិរញ្ញវត្ថុ បច្ចេកវិទ្យាមានកម្រិត និងកង្វះលទ្ធភាពទទួលបានទីផ្សារ។ ការ​កើន​ឡើង​តម្រូវ​ការ​ក្នុង​ស្រុក​នឹង​ផ្តល់​ឱកាស​ថ្មី​ៗសម្រាប់​សហគ្រាស​ធុន​តូច និង​មធ្យម បង្កើន​ការ​ប្រកួតប្រជែង ផ្តល់​សុវត្ថិភាព​ និងផ្តល់ឱ្យពួកគេនូវប្រភពហិរញ្ញវត្ថុថ្មីៗ។ ស្របពេលនេះដែរ ចិនបានប្តេជ្ញាក្នុងការបង្កើនតម្រូវការក្នុងស្រុករបស់ខ្លួន ដែលជាសញ្ញាលើកទឹកចិត្តសម្រាប់អនាគតសេដ្ឋកិច្ចរបស់ប្រទេស និងសម្រាប់ជំរុញកំណើនរបស់ខ្លួននៅឆ្នាំបន្ទាប់ផងដែរ។ ប្រទេស​ចិន​កំពុង​តែពង្រឹង​ខ្លួន​ឯង​កាន់​តែ​ច្រើន​ក្នុង​ឧស្សាហកម្ម​សំខាន់ៗ​ដូច​ជា​បច្ចេកវិទ្យា និង​ខ្សែសង្វាក់ការ​ផលិត​​។ តាមរយៈការអភិវឌ្ឍទីផ្សារក្នុងស្រុកដ៏រឹងមាំសម្រាប់ឧស្សាហកម្មទាំងនេះ ចិនក៏មានបំណងកាត់បន្ថយការពឹងផ្អែកលើទីផ្សារបរទេស និងបង្កើនការប្រកួតប្រជែងរបស់ខ្លួននៅក្នុងសេដ្ឋកិច្ចពិភពលោក។ ក្នុងនាមជាប្រទេសដែលមានសេដ្ឋកិច្ចធំជាងគេ ចិននឹងនៅតែរក្សាទំនាក់ទំនងដ៏រឹងមាំជាមួយសេដ្ឋកិច្ចពិភពលោក ដោយធានាថាចិននៅតែជាតួអង្គសំខាន់នៅលើឆាកសេដ្ឋកិច្ចអន្តរជាតិ៕