សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បន្ទាប់ពីប្រទេសចិនប្រកាសបិទបញ្ចប់នូវគោលនយោបាយកូវីដសូន្យកាលពីពេលថ្មីៗនេះ ប្រជាជនចិនទទួលបាននូវសេរីភាពដើរហើរឡើងវិញជាធម្មតា។ ទន្ទឹមគ្នានោះ វាក៏បានបង្កជាការព្រួយបារម្ភផងដែរ ដោយសារប្រទេសចិនពេលនេះកំពុងផ្ទុះឡើងវិញនៃជំងឺកូវីដ១៩។ យ៉ាងនេះក្ដី សម្ដេចតេជោ ហ៊ុន សែន កាលពីថ្ងៃទី២មករាថ្មីៗនេះបានបញ្ជាក់ជំហររបស់កម្ពុជាដោយមិនរុញរាក្នុងការបើកប្រទេសទទួលស្វាគមន៍ប្រជាជនចិនចូលមកកម្ពុជា ខណៈដែលប្រទេសមួយចំនួនបានចេញវិធានការរិតត្បិតចំពោះអ្នកទេសចរចិន។
តាមរយៈការបញ្ជាក់យ៉ាងច្បាស់របស់សម្ដេចនាយករដ្ឋមន្ត្រីកម្ពុជានេះ អ្នកសេដ្ឋកិច្ចយល់ថា កម្ពុជានឹងអាចទទួលបានផលចំណេញច្រើន ដោយមិនមែនត្រឹមតែវិស័យទេសចរណ៍នោះទេ។
លោកឧកញ៉ា លឹម ហេង អ្នកជំនាញសេដ្ឋកិច្ច និងជាអនុប្រធានសភាពាណិជ្ជកម្មកម្ពុជាបានឱ្យដឹងថា ជារឿងធម្មតាក្នុងចំណោមអ្នកទេសចរចិន ច្បាស់ជាមានអ្នកវិនិយោគមកជាមួយដែរ ដូច្នេះវិស័យសេដ្ឋកិច្ចកម្ពុជានឹងអាចមានភាពល្អប្រសើរឡើងជាងពេលបច្ចុប្បន្ន។
លោកឧកញ៉ាបានបន្តថា ៖
“យើងឃើញហើយ ការវិនិយោគនៅតំបន់សេដ្ឋកិច្ចពិសេស ក៏ដូចជាព្រលានយន្ដហោះ ផ្លូវថ្នល់ គឺសុទ្ធតែចេញពីអ្នកវិនិយោគមកពីចិន ដូច្នេះវានឹងផ្ដល់ប្រយោជន៍ច្រើនដល់កម្ពុជាយើង។ ម្យ៉ាងទៀត តាមរយៈច្បាប់វិនិយោគថ្មីរបស់កម្ពុជាដែលទើបតែអនុម័ត កិច្ចព្រមព្រៀងសេរីទ្វេភាគី កម្ពុជា-ចិន កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ព្រមទាំងគោលនយោបាយផ្លូវមួយខ្សែក្រវាត់មួយ នឹងក្លាយជាមូលហេតុចម្បងក្នុងការរុញច្រានសេដ្ឋកិច្ចកម្ពុជាឱ្យកាន់តែប្រសើរឡើងលើគ្រប់វិស័យ”
លោកឧកញ៉ាបន្តទៀតថា ៖
“កន្លងមក ថ្វិត្បិតតែយើងមានកិច្ចព្រមព្រៀងសេរីទ្វេភាគីជាមួយចិន ក៏ប៉ុន្តែទំហំពាណិជ្ជកម្មយើងនៅមានទំហំតូចនៅឡើយ ដោយសារវិធានការបិទខ្ទប់របស់ចិនកន្លងមក ដូច្នេះហើយ ការបើកប្រទេសឡើងវិញរបស់ចិន នឹងអនុញ្ញាតឱ្យកម្ពុជាអាចនាំចេញទំនិញទៅចិន បានច្រើនជាងមុនសម្រាប់ឆ្នាំនេះ ក៏ដូចជាឆ្នាំក្រោយៗទៀត”
គួរបញ្ជាក់ថា មុនការផ្ទុះជំងឺកូវីដ-១៩ ប្រទេសកម្ពុជាទទួលបានអ្នកទេសចរចិនជាង ២លាននាក់ តែនៅពេលមានជំងឺកូវីដ-១៩ រាតត្បាត ក៏ធ្វើឲ្យអ្នកទេសចរចិន មានការថយចុះជាបន្តបន្ទាប់ ហើយដែលវាបានប៉ះពាល់ ជាពិសេសទៅដល់វិស័យទេសចរណ៍។ ដូច្នេះ ប្រសិនបើអ្នកទេសចរចិន ចូលមកកម្ពុជាវិញ យ៉ាងហោចណាស់វិស័យទេសចរណ៍កម្ពុជាក៏អាចទទួលផលចំណេញដែរ៕
Account
Security
Favourite Content