ភ្នំពេញ ៖ ក្នុងគោលបំណងផ្តល់នូវចំណេះផ្នែកដឹងហិរញ្ញវត្ថុឱ្យកាន់តែស៊ីជម្រៅ ក្រុមហ៊ុន ក្រេឌីត ប្យួរ៉ូ ខេមបូឌា (CBC) បានសហការជា​មួយ ក្លឹបអ្នកការសែតកម្ពុជា រៀបចំកិច្ចពិភាក្សាជាមួយអ្នកសារព័ត៌មាន ស្តីអំពី «ការចួលរួមផ្សព្វផ្សាយចំណេះដឹងហិរញ្ញវត្ថុ និងការប្រើប្រាសឥណទាន ប្រកបដោយការទទួលខុសត្រូវ»។​

កិច្ចពិភ្សារវាងអ្នកជំនាញក្នុងវិស័យហិរញ្ញវត្ថុ ជាមួយអ្នកសារព័ត៌មានអាជីពខាងលើនេះ ត្រូវបានធ្វើឡើងនាព្រឹកថ្ងៃទី២៦ ខែមីនា ឆ្នាំ២០២៥ ​​នៅសណ្ឋាគារ (Novotel) ដោយមានវាគ្មិនកិត្តិយសជាច្រើនរូបចូលរួម មានដូចជា ៖ លោកជំទាវ ឌិត នីតា ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា, លោក រ័ត្ន សោភ័ណ ប្រធានសមាគមធនាគារកម្ពុជា, លោក អឿ សុធារ័ត្ន នាយកប្រតិបត្តិក្រុមហ៊ុន ក្រេឌីត ប្យួរ៉ូ កម្ពុជា (CBC) , និងលោក លាង ដឺលុច នាយកប្រតិត្តិក្លឹបអ្នកកាសែតកម្ពុជា។

លោក អឿ សុធារ័ត្ន នាយកប្រតិបត្តិក្រុមហ៊ុន ក្រេឌីត ប្យួរ៉ូ ខេមបូឌា (CBC) បានលើកឡើងថា ៖ ការផ្សព្វផ្សាយព័ត៌មានពាក់ព័ន្ធទៅនឹងបញ្ហាមីក្រូហិរញ្ញវត្ថុ ក៏ដូចជាការចេះគ្រប់គ្រងហិរញ្ញវត្ថុ គឺជាផ្នែកមួយដ៏សំខាន់សម្រាប់ពលរដ្ឋ ជាពិសេសទៅលើកម្ចី ឬការសងត្រលប់ឱ្យទាន់ពេលវេលា ដែលបញ្ហានេះជារឿយៗតែងធ្វើឱ្យពួកគាត់ជួបបញ្ហាប្រឈម ឬត្រូវជួបផលលំបាកណាមួយក៏ព្រោះតែពួកគាត់កង្វះចំណេះដឹងមួយនេះ។

លោកេះជំទាវ ឌិត នីតា ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា បានមានប្រសាសន៍ដែរថា ៖ កាលពីពេលថ្មីៗមកនេះ សមាគមមីក្រូហិរញ្ញវត្ថុ បានចងក្រងពីក្រមសីលធម៌ វិជ្ជាជីវៈសម្រាប់ភ្នាក់ងារឥណទាន។ចំណុចមួយក្នុងក្រមសីលធម៌វិជ្ជាជីវៈនោះគឺការផ្តល់នូវចំណេះដឹងមូលដ្ឋានដល់អតិថិជន ដើម្បីឱ្យពួកគាត់យល់ដឹងពីលក្ខខណ្ឌផ្សេងៗ ដូចជា កិច្ចសន្យា ការយល់ដឹងពីចំណុចសំខាន់ៗទៅលើឥណទាន។

លោកជំទាវបានបញ្ជាក់ថា ៖ នៅពេលបងប្អូនដែលជាអ្នកទទួលបានកម្ចីមានការយល់ដឹងច្បាស់ពីកាតព្វកិច្ច និងការទទួលខុសត្រូវរបស់ពួកគាត់ក្នុងការសងត្រលប់ នោះពិជាអាចជៀសផុតពីបញ្ហាហិរញ្ញវត្ថុជាជាមិនខាន។

ដោយឡែក លោក រ័ត្ន សោភណ្ឌ ប្រធានសមាគមធនាគារនៅកម្ពុជា បានលើកឡើងថា ៖ សមាគមធនាគារកម្ពុជា ជានិច្ចកាលតែងបានផ្តល់ចំណេះដឹងហិរញ្ញវត្ថុ ជាពិសេសពាក់ព័ន្ធការផ្តល់ឥណទានដើម្បីធ្វើយ៉ាងណាមានប្រសិទ្ធភាពខ្ពស់ ។ សមាគមបានធ្វើស្ទើរគ្រប់វិស័យទាំងអស់ ទាំងអាជីវកម្មខ្នាតតូច អាជីវកម្មខ្នាតធំ។ ក្រៅពីនេះ សមាគមក៏មានកិច្ចសហការជាមួយសាលារដ្ឋដើម្បីបង្កើនចំណេះដឹងបន្ថែមទៀតលើវិស័យមីក្រូហិរញ្ញវត្ថុ ហើយចំណេះទាំងនេះអាចផ្សារភ្ជាប់ជាមួយជីវិតរស់នៅរបស់ពួកគាត់ក្នុងការប្រើប្រាស់ថវិកាមានប្រសិទ្ធភាពទៅថ្ងៃអនាគត។

សូមបញ្ជាក់ដែរថា គោលបំណងនៃការរៀបចំវេទិកាពិភាក្សាខាងលើ ដើម្បីផ្តល់ឱកាសដល់អ្នកសារព័ត៌មាន បានស្វែងយល់អំពីតួនាទីនៃប្រព័ន្ធចែករំលែកព័ត៌មានឥណទាននៅកម្ពុជា ក្នុងការលើកកម្ពស់ស្ថិរភាពវិស័យហិរញ្ញវត្ថុនៅក្នុងទីផ្សារឥណទាន និន្នាការនៃទីផ្សារឥណទាន និងឥរិយាបថអ្នកប្រើប្រាស់ រួមទាំងស្ថានភាពឥណទាននៅកម្ពុជាសម្រាប់ឆ្នាំ២០២៤។

តាមរយៈនៃកិច្ចពិភាក្សានោះ អ្នកសារព័ត៌មាន ក៏ទទួលបាននូវចំណេះដឹងបន្ថែមទាក់​ទង​នឹងសិទ្ធិរបស់អតិថិជន និងច្បាប់ដែលបានតម្រូវក្នុងការប្រើប្រាស់ប្រព័ន្ធចែករំលែកព័ត៌មានឥណទាននៅកម្ពុជា សម្រាប់ប្រជាពលរដ្ឋក្នុងការទទួលបានឥណទានជាមួយលក្ខខណ្ឌសមស្រប សម្រាប់ទាំងស្ថាប័នហិរញ្ញវត្ថុ ក៏ដូចជាកិច្ចការពារសិទ្ធិរបស់អតិថិជនផ្ទាល់ខ្លួនពីហានិភ័យឥណទាន និងវិធីដោះស្រាយបញ្ហានៅពេលប្រវត្តិឥណទានមានភាពមិនប្រក្រតីណាមួយ។

ក្លឹបអ្នកកាសែត បានចាត់ទុកកិច្ចពិភាក្សានេះ គឺជាវេទិកាដ៏មានសារសំខាន់ខ្លាំងណាស់សម្រាប់អ្នកសារព័ត៌មាន ជាពិសេសសម្រាប់អ្នកសរសេរផ្នែកសេដ្ឋកិច្ច និងហិរញ្ញវត្ថុ ដែលនឹងទទួលបាននូវចំណេះដឹងបន្ថែមសម្រាប់​បំពេញកិច្ចការងាររបស់ខ្លួនប្រកបដោយភាពច្បាស់លាស់ និងត្រឹមត្រូវ៕ វិន ឈុនហ៊ាត