បរទេស ៖ យោងតាមប្រភពព័ត៌មានពី Business Korea រាយការណ៍ថា ក្រុមហ៊ុនផលិតអាគុយ EV សម្រាប់់រថយន្តអគ្គិសនីរបស់កូរ៉េខាងត្បូងកំពុងព្រួយបារម្ភចំពោះការរឹតបន្តឹងរបស់រដ្ឋាភិបាលចិនលើការនាំចេញសារធាតុក្រាហ្វិច (graphite) ដែលជាសារធាតុរ៉ែដ៏សំខាន់ត្រូវប្រើនៅក្នុងការផលិតថ្ម EV ។

ផ្អែកតាមអង្គការជំនាញបានព្យាករណ៍ថា ផលប៉ះពាល់ពីការរឹតបន្តឹងរបស់នាំចេញក្រាហ្វិចរបស់ចិននឹងត្រូវការរយៈពេលបីខែក្នុងការដោះស្រាយ ដោយសារករណី​ស្រដៀង​គ្នា​នេះ​ធ្លាប់កើតឡើងកន្លងមក។ ទោះជាយ៉ាងណាក្តី រោងចក្រផលិតថ្មរបស់កូរ៉េខាងត្បូងនៅសហរដ្ឋអាមេរិកអាចមានបញ្ហាក្នុងការទទួល graphite ពីប្រទេសចិន ដូច្នេះពួកគេចាំបាច់ត្រូវរកដំណោះស្រាយឱ្យបានហ្មត់ចត់។

កាលពីថ្ងៃទី៣០ ខែតុលាកន្លងទៅនេះ របាយការណ៍ស្តីពីផលប៉ះពាល់ពីការរឹតបន្តឹងរបស់ចិន និងវិធានការប្រឆាំងការនាំចេញក្រាហ្វរបស់ប្រទេសចិនត្រូវបានចេញផ្សាយ ដោយសមាគមពាណិជ្ជកម្មអន្តរជាតិកូរ៉េ (KITA) បានព្យាករណ៍ថា ស្ថានការណ៍អាចនឹងវិលមករកភាពធម្មតាវិញបន្ទាប់ពីរយៈពេលបីខែបន្ទាប់ពីការអនុវត្តពេញលេញលើការគ្រប់គ្រងការនាំចេញក្រាហ្វិចរបស់ចិន។

កាលពីថ្ងៃទី២០ ខែតុលាកន្លងទៅនេះ ប្រទេសចិនបានប្រកាសពីវិធានការដើម្បីកែសម្រួលបញ្ជីត្រួតពិនិត្យការនាំចេញសារធាតុក្រាហ្វិចរបស់ខ្លួន។ បន្ថែមពីលើក្រាហ្វិចសិប្បនិម្មិតដែលស្ថិតនៅក្រោមការគ្រប់គ្រងការនាំចេញរួចទៅហើយនោះ ក្រាហ្វិចធម្មជាតិដែលមានភាពបរិសុទ្ធខ្ពស់សម្រាប់ផលិតថ្ម cathode ក៏ត្រូវបានបញ្ចូលទៅក្នុងបញ្ជីចាប់ពីខែធ្នូផងដែរ។ ដូច្នោះហើយ​ ក្រុមហ៊ុនដែលនាំ​ចេញ​ក្រាហ្វិច​កំពុង​ស្ថិត​ក្នុង​បញ្ជីគ្រប់គ្រងការនាំចេញ ដោយពួកគេ​ត្រូវ​បាន​តម្រូវ​ឱ្យ​ទទួល​ការ​ពិនិត្យ​ដោយ​រដ្ឋាភិបាល​ចិន។ អ្នកនាំពាក្យ KITA បាននិយាយថា ការរឹតបន្តឹងនេះអាចរំខានការផ្គត់ផ្គង់ក្រាហ្វិចជាបណ្តោះអាសន្ន ដោយសារផ្អែកលើបទពិសោធន៍កន្លងមក គេរំពឹងថាការនាំចេញនឹងអាចបន្តឡើងវិញក្នុងរយៈពេលប្រហែល ៣ ខែបន្ទាប់ពីការរឹតបន្តឹង។

កាលពីខែកញ្ញា ឆ្នាំ ២០០៦ កន្លងទៅនេះ ចិនធ្លាប់រឹតបន្តឹងការនាំចេញសារធាតុក្រាហ្វិចម្តងរួចមកហើយ។ នៅក្នុងខែកញ្ញា និងខែតុលាឆ្នាំនោះ ការនាំចេញសារធាតុក្រាហ្វិចរបស់ចិនបានធ្លាក់ចុះ ២៤,៤ ភាគរយ និង ៤,៨ ភាគរយរៀងៗគ្នា ប៉ុន្តែការនាំចេញបានត្រឡប់មកធម្មតាវិញនៅក្នុងខែវិច្ឆិកា ឆ្នាំ ២០០៦ ដដែលនោះ។ ទោះបីជាយ៉ាងណាក្តី ការរឹតបន្តឹងការនាំចេញសារធាតុក្រាហ្វិចរបស់ចិនគឺជាការព្រមានដល់សហរដ្ឋអាមេរិក ខណៈដែលភាគីទាំងពីរកំពុងមានជម្លោះសេដ្ឋកិច្ច ដែលធ្វើឲ្យគេពិបាកក្នុងការប្រៀបធៀបស្ថានការណ៍បច្ចុប្បន្ន និង កាលពីឆ្នាំ ២០០៦ មុនពេលមានជម្លោះរវាងសហរដ្ឋអាមេរិក និងចិន។

ទន្ទឹមនឹងនេះ ក្រុមហ៊ុនផលិតគ្រឿងបន្លាស់ថ្ម EV របស់កូរ៉េជាច្រើនកំពុងព្រួយបារម្ភពីផលប៉ះពាល់ដល់ឧស្សាហកម្ម EV ក្នុងស្រុករបស់ខ្លួន ខណៈដែលកូរ៉េខាងត្បូងមានក្រុមហ៊ុនផលិតអាគុយ EV លំដាប់កំពូលចំនួន ៣ ដែលផ្គត់ផ្គង់អាគុយ និង ថ្មរបស់ពួកគេដល់ក្រុមហ៊ុនផលិត EV ធំៗនៅលើពិភពលោកដូចជា Hyundai Motor Group, General Motors Co. Stellantis NV និង Volkswagen Group ។

ស្របពេលនេះដែរ ក្រុមហ៊ុនផលិតថ្ម EV មួយរបស់កូរ៉េបាននិយាយថា វាពិតជាពិបាកខ្លាំងណាស់ក្នុងការស្វែងរកជម្រើសមកជំនួសសារធាតុក្រាហ្វិចរបស់ចិន។ យ៉ាងណាមិញ រដ្ឋាភិបាលកូរ៉េកំពុងបន្តពិភាក្សាជាមួយរដ្ឋាភិបាលចិន ដើម្បីធានាថាក្រុមហ៊ុនកូរ៉េអាចទទួលបានការអនុញ្ញាតសម្រាប់ការនាំចេញក្រាហ្វិចដោយគ្មានការពន្យាពេល ឬ ការរឹតបន្តឹងពីចិន។

គួរបញ្ជាក់ផងដែរថា ចិនគឺជាអ្នកផលិត និងជាអ្នកនាំចេញក្រាហ្វិចសុទ្ធដ៏ធំបំផុតរបស់ពិភពលោក ហើយតម្រូវការក្នុងស្រុករបស់ចិនអាចផលិតបានលើសការផ្គត់ផ្គង់ថែមទៀតផង។ មិនត្រឹមតែប៉ុណ្ណោះ ចិនគឺជាប្រទេសនាំចេញសារធាតុក្រាហ្វិចធំជាងគេទៅកាន់កូរ៉េខាងត្បូង ខណៈដែលកូរ៉េខាងត្បូងក៏ពឹងផ្អែកខ្លាំងលើសារធាតុក្រាហ្វិចរបស់ចិនផងដែរ។ ដូច្នេះហើយ ចិនអាចនឹងខាតបង់ប្រាក់យ៉ាងច្រើន ប្រសិនបើការនាំចេញក្រាហ្វិចទៅកាន់កូរ៉េខាងត្បូងត្រូវបានរារាំង។ គិតត្រឹមខែមករាដល់ខែកញ្ញាឆ្នាំនេះ ការនាំចូលផលិតផលក្រាហ្វិចរបស់ចិនមកកាន់កូរ៉េខាងត្បូងបានឈានដល់ ៩៧,៧ ភាគរយសម្រាប់សារធាតុក្រាហ្វិចធម្មជាតិ និង ៩៤,៣ ភាគរយសម្រាប់ក្រាហ្វិចសិប្បនិម្មិត៕