ភ្នំពេញ ៖ កម្ពុជាបាន និងកំពុងបន្តបោះជំហានដើម្បីក្លាយខ្លួនទៅជាប្រទេសចំណូលមធ្យម បន្ទាប់ពីកម្ពុជាបានធ្វើជាម្ចាស់ផ្ទះអាស៊ាន និងម្ចាស់ផ្ទះរៀបចំស៊ីហ្គេម​ប្រកបដោយជោគជ័យ។ ស្របពេលជាមួយគ្នានេះ ដើម្បីលើកមុខមាត់ កិត្តិយសនៅលើឆាកអន្តរជាតិ និងទាក់ទាញវិនិយោគិនបរទេសឱ្យបានកាន់តែច្រើននោះ កម្ពុជា នឹងរៀបចំធ្វើជាម្ចាស់ផ្ទះកិច្ចប្រជុំកំពូលធុរកិច្ចមួយតភ្ជាប់អាស៊ានជាមួយពិភពលោករយៈពេល ២ ថ្ងៃនៅរាជធានីភ្នំពេញ។

សភាពាណិជ្ជកម្មអឺរ៉ុបនៅកម្ពុជា (Eurocham Cambodia) ព្រមទាំងដៃគូសហការ នឹងរៀបចំកិច្ចប្រជុំកំពូលធុរកិច្ចអាស៊ាន-កម្ពុជា រយៈពេល ២ថ្ងៃ ចាប់ពីថ្ងៃទី ២៨ ដល់ ២៩ ខែកញ្ញា ឆ្នាំ២០២៣ ដែលមានការចូលរួមពីសំណាក់ថ្នាក់ដឹកនាំក្នុងវិស័យធុរកិច្ច និងវិស័យនយោបាយ និងបញ្ហាប្រឈមនៃសមាហរណកម្មក្នុងគោលបំណងចូលរួមជាមួយគ្នាដើម្បីស្វែងយល់អំពីសេដ្ឋកិច្ចបន្ថែមទៀត។

កម្មវិធីនេះនឹងត្រូវបានរៀបចំឡើងក្នុងទីក្រុងភ្នំពេញនៅសណ្ឋាគារដ៏ប្រណិតចំនួនពីរ និងព្រមជាមួយនឹងព្រឹត្តិការណ៍ជួបជុំសំខាន់ៗ។ កិច្ចប្រជុំកំពូលនេះនឹង​ស្វែងយល់អំពីសេដ្ឋកិច្ចនៃតំបន់មេគង្គ ដោយមានជំនួបថ្នាក់ដឹកនាំមកពីប្រទេសកម្ពុជា ឡាវ ថៃ និងវៀតណាម ដើម្បីលើកកម្ពស់សមាហរណកម្មសេដ្ឋកិច្ចនៅក្នុងតំបន់ និងជាមួយប្រទេសផ្សេងៗទៀតនៅលើពិភពលោក។

ថ្លែងនៅក្នុងសន្និសីទសារពត៌មាននាព្រឹកថ្ងៃទី២៥ ខែកញ្ញា នៅភោជនីយដ្ឋាន Topaz ស្ថិតនៅផ្លូវព្រះនរោត្តម រាជធានីភ្នំពេញ លោក Martin Brisson នាយក ប្រតិបត្តិនៃសភាពាណិជ្ជកម្មអឺរ៉ុបនៅកម្ពុជា បានមានប្រសាសន៍ថា ៖ «កិច្ចប្រជុំកំពូលនេះ គឺជាការបូកសរុបនៃការងារជាច្រើនខែកន្លងមកនៃការជំរុញការធ្វើ​សមាហរណកម្ម ក្នុងតំបន់ ពាណិជ្ជកម្ម និងធ្វើឱ្យបរិយាកាសធុរកិច្ចអំណោយផលដល់កំណើនសេដ្ឋកិច្ចរបស់កម្ពុជា។ យើងទន្ទឹងរង់ចាំចំពោះការអញ្ជើញ​ចូលរួមរបស់វាគ្មិនជាច្រើនរូបក្នុងការធ្វើដំណើរមកប្រទេសកម្ពុជាដើម្បីពិភាក្សាអំពីបញ្ហាទាំងនេះក្នុងកម្រិតថ្នាក់ដឹកនាំ​ខ្ពស់បំផុតក្នុងពេលមួយខែបន្ទាប់ពី​ការចូលកាន់តំណែងរបស់រាជរដ្ឋាភិបាលកម្ពុជាដែលទើបតែបង្កើតថ្មី។ យើងសង្ឃឹមយ៉ាងខ្លាំងថាជំនួបកំពូលនេះនឹងក្លាយជាព្រឹត្តការណ៍ដ៏សំខាន់មួយ»។

លោកបានឱ្យដឹងទៀតថា ៖ «ក្នុងអំឡុងពេលនៃកិច្ចប្រជុំកំពូលនេះ សភាពាណិជ្ជកម្មអឺរ៉ុបនៅកម្ពុជានឹងចេញផ្សាយសៀវភៅ ស ឆ្នាំ២០២៤ដែលជាបញ្ជីន​អនុសា​សន៍គោលនយោបាយ​ដែលគ្របដណ្ដប់លើវិស័យចំនួន ១២ ក៏ដូចជាការ ស្ទង់មតិទំនុកចិត្ដធុរកិច្ចឆ្នាំ២០២៣ ដែលជាការស្ទង់មតិលម្អិតដែ​អនុញ្ញាត​ឱ្យអ្នកដឹកនាំធុរកិច្ចនៅក្នុងប្រទេសកម្ពុជាអាចធ្វើការពិពណ៌នាយ៉ាងច្បាស់លាស់អំពីបរិយាកាសសម្រាប់ការធ្វើអាជីវកម្មក្នុងប្រទេសកម្ពុជា»។

នៅថៃ្ងទី ២៨ ខែកញ្ញា នៅសណ្ឋាគារសូហ្វីតែលភ្នំពេញភូគីត្រា ប្រធានសភាពាណិជ្ជកម្មអឺរ៉ុបនៅកម្ពុជា លោក Tassilo Brinzer នឹងធ្វើការបង្ហាញសៀវភៅ ស ជូនឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ ។ បន្ទាប់ពីធ្វើការស្វែងយល់អំពីសៀវភៅ ស រួច នឹងមានសុន្ទរកថាគន្លឹះអំពីគោលដៅវិនិយោគ និងយុទ្ធសាស្ត្ររបស់កម្ពុជា និងការធ្វើ បច្ចុប្បន្នភាពរបស់សហភាពអឺរ៉ុបស្តីពីគោលនយោបាយពាណិជ្ជកម្ម និងការវិនិយោគជាមួយកម្ពុជា។

លោក Tassilo Brinzer បានឱ្យដឹងថា ៖ នៅក្នុងសៀវភៅ ស មានអនុសាសន៍ចំនួន៧៨ និង១៣ជំពូក ដែលលើកឡើងពីបញ្ហាប្រឈម ដំណោះស្រាយ ទាក់ទងនឹងវិស័យជាច្រើនរួមមាន​កសិកម្ម ការវិនិយោគទុន និងឌីជីថល ជាដើម។

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម នឹងធ្វើការបើកសម័យប្រជុំនៅពេលរសៀល មុនការធ្វើបទបង្ហាញស្តីពីវឌ្ឍនភាពសេដ្ឋកិច្ច និងសង្គមរបស់​អាស៊ាន យុទ្ធសាស្ត្រច្រកទ្វារសកលរបស់សហភាពអឺរ៉ុប និងមាគ៌ាអភិវឌ្ឍភាពជាដៃគូយុទ្ធសាស្ត្ររវាងអាស៊ាន និងអឺរ៉ុប។ នាព្រឹកថ្ងៃសុក្រ២៩ ខែកញ្ញា សភា​ពាណិជ្ជកម្មអឺរ៉ុបនៅកម្ពុជា នឹងធ្វើការចុះអនុស្សារណៈនៃការយោគយល់គ្នាជាមួយ AHK Vietnam មុនពេលធ្វើបទបង្ហាញស្តីពីឌីជីថលនីយកម្ម និងសិក្ខាសាលា​​ជាបន្តបន្ទាប់តាមវិស័យដែលដឹកនាំដោយថ្នាក់ដឹកនាំមកពីឧស្សាហកម្មផ្សេងៗ។ នារសៀលថ្ងៃ២៩ ខែកញ្ញាដដែល ​នឹងមានការចុះឈ្មោះចូលរួមការធ្វ​ដំណើរ​ទស្សនកិច្ច ជុំវិញទីក្រុងភ្នំពេញដោយឥតគិតថ្លៃជាមួយ All Dreams Cambodia ។

លោក ម៉ាធូ ផូខក់ (Mathew Pocock)អ្នកសម្របសម្រួលផ្នែកសេវាធុរកិច្ចនៃសភាពាណិជ្ជកម្មអឺរ៉ុបនៅកម្ពុជា បានឱ្យដឹងថា ៖ ក្រុមហ៊ុនពី ២០០ ទៅ ៣០០ ចូលរួមកិច្ចប្រជុំកំពូលធុរកិច្ចអឺរ៉ុប-អាស៊ាននេះ។ កិច្ចប្រជុំនឹងបង្ហាញសក្តានុពលរបស់កម្ពុជា និងបង្ហាញពីលទ្ធផលដែលរាជរដ្ឋាភិបាលកម្ពុជាអាណត្តិទី៧​​​សម្រេចបាន។ ជាងនេះទឿទៀត កិច្ចប្រជុំ នឹងបង្ហាញពីសកម្មភាពសេដ្ឋកិច្ចពាណិជ្ជកម្មរបស់វិស័យឯកជន និងសាធារណៈ និងវិធីសាស្ត្រធ្វើការរួមគ្នាដើម្បីទទួល​ផលប្រយោជន៍ពីអនុតំបន់។

លោកបានបន្តថា ៖ ក្នុងរយៈពេលមួយទស្សវត្សរ៍ចុងក្រោយនេះ កម្ពុជាមានការរីកចម្រើន អភិវឌ្ឍច្រើនគួរឱ្យកត់សម្គាល់ ជាពិសេសហេដ្ឋារចនាសម្ព័ន្ធដែលនេះ​ជាដើមទុនមានស្រាប់របស់កម្ពុជាដើម្បីទាក់ទាញវិនិយោគិន។

លោក Bryan Fornari ប្រធានកិច្ចសហប្រតិបត្តិការនៅគណៈប្រតិភូសហភាពអឺរ៉ុបប្រចាំកម្ពុជា និងជាវាគ្មិនមួយរូបដែលមានវត្តមា​នៅក្នុងកិច្ចប្រជុំកំពូល​បានកត់សម្គាល់ថា ៖ «យើងរីករាយដែលបានចូល រួមក្នុងគំនិតផ្តួចផ្តើមនេះ ដែលនឹងរួមចំណែកក្នុងការកំណត់ឱកាសវិនិយោគពាក់ព័ន្ធ និងវិស័យថ្មីៗ ជាមួយនឹងគុណតម្លៃបន្ថែមក្នុងស្រុកសម្រាប់ការអភិវឌ្ឍសេដ្ឋកិច្ចរបស់កម្ពុជា ដោយសារប្រទេសនេះ កំពុងតែព្យាយាមអភិវឌ្ឍទៅមុខដើម្បីដោះខ្លួនចេញពីបញ្ជី ប្រទេសអភិវឌ្ឍន៍តិចតួច (LDC) នៅឆ្នាំ ២០២៧។ ភាពជាដៃគូជាមួយវិស័យឯកជននៅតែមានសារៈសំខាន់ ហើយយើងពិតជាចង់ស្វែងយល់ពីការចូលរួម​នេះក្រោមក្របខណ្ឌនៃច្រកទ្វារសកល ជំរុញការវិនិយោគលើហេដ្ឋារចនាសម្ព័ន្ធប្រកបដោយ គុណភាព និងការតភ្ជាប់ទំនិញ ប្រជាជននិងសេវាកម្មប្រកប​ដោយនិរន្តរភាព»។

លោកស្រី គ្រីស្ទីណា ណូវីយ៉ូ ហ្គាស្យា (Cristina  Novio Garcia) អ្នកគ្រប់គ្រងកម្មវិធីផ្នែកពាណិជ្ជកម្មវិស័យឯកជន និងថាមពល នៃប្រតិភូសហភាពអឺរ៉ុប បានមានប្រសាសន៍ថា ប្រតិភូសហភាពអឺរ៉ុប និងសភាពាណិជ្ជកម្មអឺរ៉ុបនៅកម្ពុជាបានសហការគ្នាដើម្បីបង្កើតដៃគូយុទ្ធសាស្ត្រពាណិជ្ជកម្ម និងទាក់ទាញវិនិយោគិន​អឺរ៉ុបមកកម្ពុជា។ បច្ចុប្បន្ន មានក្រុមហ៊ុនអឺរ៉ុបប្រមាណ២៥០កំពុងវិនិយោគនៅកម្ពុជា លើវិស័យជាច្រើនដែលក្នុងនោះមានអាកាសយានដ្ឋាន និងភោជនីយ​ដ្ឋាន ជាដើម។

នៅកម្ពុជាមានមោទនភាពក្នុងការចាប់ដៃគូជាមួយ ARISE+ Cambodia និងគណៈ ប្រតិភូសហភាពអឺរ៉ុបប្រចាំនៅកម្ពុជាដើម្បីរៀបចំព្រឹត្តិការណ៍នេះឡើង។ ​អង្គការទាំងពីរបាននាំមកនូវជំនាញ និងចំណេះដឹងអំពីគោលនយោបាយរបស់កម្ពុជា និងទំនាក់ទំនងពាណិជ្ជកម្មជាមួយ​សហភាពអឺរ៉ុប។

លោក ខា សុខ ទីប្រឹក្សាពាណិជ្ជកម្មរបស់ ARISE – Plus មានប្រសាសន៍ថា កិច្ចប្រជុំនេះពិតជាមានសារៈសំខាន់សម្រាប់អ្នកពាក់ព័ន្ធផ្នែកសេដ្ឋកិច្ចទាំងអស់ ដើម្បីអាចយល់ដឹងអំពីឱកាសនិងបញ្ហាប្រឈម និងជំរុញកិច្ចសហប្រតិបត្តិការដើម្បីដោះស្រាយរាល់ការរាំងស្ទះដែលខកខានការទាញយកអត្ថប្រយោជន៍ផ្សេងៗ។ កិច្ចប្រជុំកំពូលនេះនឹងនាំមក​នូវ អ្នកអនុវត្ត និងអ្នកជំនាញមកពីវិស័យច្រើនខុសៗគ្នា ដើម្បីផ្តល់នូវ ចំណេះដឹង និងការយល់ដឹងជាក់ស្តែងជាច្រើនហើយ​ផ្តល់ឱកាសដ៏ល្អក្នុងការផ្លាស់ប្ដូរ និងស្វែងយល់ពីសក្តានុពលពាណិជ្ជកម្ម និងការវិនិយោគរបស់កម្ពុជានិងតំបន់។

សភាពាណិជ្ជកម្មអឺរ៉ុបនៅកម្ពុជា (EuroCham Cambodia) ត្រូវបានបង្កើតឡើងក្នុងឆ្នាំ ២០១១ ដោយ សមាគមធុរកិច្ចបារាំង អាល្លឺម៉ង់និងអង់គ្លេសនៅ​កម្ពុជា ដើម្បីដើរតួជាសភាផ្លូវការនៃសហគមន៍ធុរកិច្ច អឺរ៉ុបក្នុងព្រះរាជាណាចក្រកម្ពុជា។ ចាប់តាំងពីពេលនោះមក សមាជិកមានការកើនឡើងរហូតដល់ចំនួន ៣០០ និង មានការិយាល័យប្រចាំប្រទេសចំនួន៥ដែលទាំងអស់នេះគឺរួមមាន១១ ប្រទេសនៅអឺរ៉ុប៕ អត្ថបទដោយ ៖ ញ៉ែម សុផល