សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មន្រ្តីជំនាញអភិរក្សជលផលនៃក្រសួងកសិកម្ម រុក្ខាប្រមាញ់ និងនេសាទ បានបង្ហាញពីយុទ្ធសាស្ត្រ និងការអនុវត្តមួយចំនួនដែលអាចឱ្យកម្ពុជាឈានទៅដល់ការទទួលបានលទ្ធផល និងផ្លែផ្កាក្នុងកិច្ចការងារអភិរក្សសត្វផ្សោតទន្លេមេគង្គក្នុងឆ្នាំ២០២៥ កើនចំនួនដល់ ១១២ក្បាល ជាពិសេស នៅក្នុងរយៈពេលមួយឆ្នាំចុងក្រោយនេះមិនមានករណីផ្សោតស្លាប់នោះទេ។
លោក ផៃ សុម៉ានី អនុប្រធាននាយកដ្ឋានអភិរក្សជលផលនៃរដ្ឋបាលជនផល ក្រសួងកសិកម្ម រុក្ខាប្រមាញ់ និងនេសាទ បានរៀបរាប់ឱ្យដឹងថា កាលពីមុន ស្ទើរតែរាល់ឆ្នាំតែងមានសត្វផ្សោតស្លាប់ជាបន្តបន្ទាប់ ក្រោមហេតុផលមានជំងឺ ឬជាប់ម៉ង ស្បៃរបស់អ្នកនេសាទខុសច្បាប់នៅក្នុងតំបន់ហាមឃាត់មួយចំនួន។ ជាក់ស្តែង នៅក្នុងឆ្នាំ២០២២ មានផ្សោតស្លាប់រហូតដល់ ១១ក្បាល ហើយក្នុងឆ្នាំ២០២៣ មានផ្សោតស្លាប់ចំនួន ០៥ក្បាល និងក្នុងឆ្នាំ២០២៤ មានស្លាប់ចំនួន០៤ ប៉ុន្តែអ្វីដែលជាការកត់សម្គាល់នោះ គឺនៅក្នុងអំឡុងឆ្នាំ២០២៥នេះ ក្រោមកិច្ចការពារ ថែទាំ យ៉ាងយកចិត្តទុកដាក់ពីសំណាក់មន្ត្រីជំនាញដែលពាក់ព័ន្ធ រួមទាំងបងប្អូនប្រជានេសាទក្នុងសហគមន៍ ក៏ដូចជាអង្គការជាដៃគូ ជាលទ្ធផលគឺមិនមានសត្វផ្សោតណាមួយបាត់បង់ជីវិតនោះទេ។
ជាមួយគ្នានេះ ក្រៅពីទទួលបានតួលេខសូន្យនៃអត្រាស្លាប់របស់សត្វផ្សោតទន្លេមេគង្គ នាយកដ្ឋានអភិរក្សជលផលនៃក្រសួងកសិកម្ម រុក្ខាប្រមាញ់ និងនេសាទ បានកត់ត្រានូវកំណើនសត្វផ្សោតផងដែរ ពោលគឺនៅក្នុងឆ្នាំ២០១៥ មានចំនួនត្រឹមតែ ៨០ក្បាល ឡើងដល់ ៩២ក្បាលនៅឆ្នាំ២០១៧ ហើយបន្តកើនឡើងរហូតដល់ ១១២ក្បាលនៅក្នុងឆ្នាំ២០២៥ ដែលនេះជាលទ្ធផលគួរឱ្យស្ងប់ស្ងែង បើប្រៀបធៀបទៅនឹងឆ្នាំអតីតកាលដែលមានសត្វផ្សោតស្លាប់ជាបន្តបន្ទាប់។
លោក ផៃ សុម៉ានី បានបញ្ជាក់យ៉ាងដូច្នេះថា ៖
«លទ្ធផលនៃកិច្ចការពារ និងអភិរក្សសត្វផ្សោតទន្លេមេគង្គ ដែលទទួលបានជោគជ័យគួរជាទីមោទននៅក្នុងឆ្នាំ២០២៥ នេះ គឺអាស្រ័យដោយការយកចិត្តទុកដាក់របស់រាជរដ្ឋាភិបាល ដែលមានក្រសួងកសិកម្ម រុក្ខាប្រមាញ់ និងនេសាទ ជាសេនាធិការ ក្រោមការដឹកនាំដោយផ្ទាល់ពីសំណាក់ ឯកឧត្តមរដ្ឋមន្ត្រី ឌិត ទីណា ដែលតែងចុះពិនិត្យតាមដាន និងណែនាំជាប្រចាំ ជាមួយនឹងការដាក់ចេញនូវគោលនយោបាយ ក៏ដូចជាយុទ្ធសាស្ត្រសំខាន់ៗមួយចំនួន»។
លោកបានបន្តឱ្យដឹងទៀតថា ជារួម សមិទ្ធផលដ៏វិសេសវិសាលនេះ កើតចេញពីការយកចិត្តទុកដាក់ខ្ពស់របស់ក្រសួងកសិកម្ម រុក្ខាប្រមាញ់ និងនេសាទ ដែលមានរដ្ឋបាលជលផលជាសេនាធិការ, រដ្ឋបាលថ្នាក់ក្រោមជាតិ, សមត្ថកិច្ចពាក់ព័ន្ធ, អង្គការ WWF , សហគមន៍នេសាទ ជាពិសេស ឆ្មាំទន្លេចំនួន ៧២រូប ដែលបានលះបង់កម្លាំងកាយ និងកម្លាំងចិត្តក្នុងកិច្ចការពារ និងអភិរក្សសត្វផ្សោតទន្លេមេគង្គប្រកបដោយការទទួលខុសត្រូវខ្ពស់ ជាមួយសកម្មភាពចុះប្រចាំការនៅតាមប៉ុស្ត៍ល្បាតសំខាន់ៗទាំង ១៥កន្លែង (កន្លែងដែលមានសត្វផ្សោតរស់នៅច្រើន) ដូចជា តំបន់កាំពី និងតំបន់ត្បូងខ្លា ដែលពួកគាត់ចេញល្បាតទាំងយប់ទាំងថ្ងៃ ២៤ លើ ២៤ម៉ោង។ ក្រៅពីនេះ ក៏មានការចូលរួមយ៉ាងសកម្មផងដែរពីសំណាក់ប្រជានេសាទក្នុងតំបន់ ដែលតែងតែសហការផ្តល់ព័ត៌មាននានាពាក់ព័ន្ធនឹងសត្វផ្សោត និងការបញ្ឈប់ធ្វើនេសាទខុសច្បាប់ជាដើម។
សូមបញ្ជាក់ថា វត្តមានសត្វផ្សោតទឹកសាប ក៏ជាប្រភពចំណូលដ៏សំខាន់សម្រាប់សហគមន៍ផងដែរ តាមរយៈការទាក់ទាញទេសចរចូលទស្សនា។ បច្ចុប្បន្ននេះ ប្រភេទសត្វផ្សោតទឹកសាប មានរស់នៅតាមទន្លេចំនួន ៣ គឺ ទន្លេ Ayeyarwady ឬហៅថាទន្លេ Irrawaddy (ប្រទេសភូមា) ទន្លេ Mahakam ( ប្រទេសឥណ្ឌូនេស៊ី ) និងទន្លេមេគង្គក្នុងប្រទេសកម្ពុជា។
ក្រសួងកសិកម្ម រុក្ខាប្រមាញ់ និងនេសាទ បានអំពាវនាវដល់បងប្អូនប្រជាពលរដ្ឋ ជាពិសេសប្រជានេសាទ សូមផ្តល់ព័ត៌មានដល់សមត្ថកិច្ចនៅពេលប្រទះឃើញការធ្វើនេសាទខុសច្បាប់ ក្នុងកន្លែងអភិរក្ស និងការពារសត្វផ្សោតទន្លេមេគង្គ តាមរយៈលេខទូរស័ព្ទ៖ ០៩៩ ៧៩១ ៩១៩ / ០៩៧ ៦៦៦ ៤៩៩៩/០១១ ៣៥៥ ៨៨៣ / ០៨៨ ៨៣៥៥ ៨៨៣ / ០១២ ៨៩៧ ៩៤៣៕
Account
Security
Favourite Content