សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ កាលពីអំឡុងខែមិថុនា ឆ្នាំ២០២៥កន្លងទៅនេះ ប្រតិបត្តិការលក់រថយន្តអគ្គិសនីនៅក្នុងទីផ្សារប្រទេសចិនត្រូវបានគេមើលឃើញថាមានកំណើនប្រមាណជា ២៨ភាគរយ ខណៈដែលទីផ្សារនៅអឺរ៉ុបក៏មានកំណើនប្រហែលជា ២៣ភាគរយ។
ផ្អែកតាមទិន្នន័យដែលត្រូវបានស្រាវជ្រាវដោយក្រុមហ៊ុន Rho Motion និងយកមកចេញផ្សាយដោយកាសែត SCMP នៅព្រឹកថ្ងៃពុធ សប្ដាហ៍នេះបានរកឃើញថា សម្រាប់ប្រភេទរថយន្តអគ្គិសនី និងហាយប្រ៊ីដ នៅលើទីផ្សារសកលកាលពីខែមិថុនា ឆ្នាំ២០២៥ មានការកើនឡើងប្រមាណជា ២៤ភាគរយ បើធៀបទៅនឹងខែមិថុនាដូចគ្នាកាលពីឆ្នាំ២០២៤កន្លងទៅ។
ក្រុមហ៊ុនដែលមានមូលដ្ឋាននៅក្នុងទីក្រុងឡុង ប្រទេសអង់គ្លេសមួយនេះក៏បានបង្ហាញដែរថា នៅក្នុងខែមិថុនា ចំនួនសរុបនៃរថយន្តអគ្គិសនីសុទ្ធ និងរថយន្តកូនកាត់ ដែលលក់ចេញមានប្រមាណជា ១,៨លានគ្រឿងនៅទូទាំងពិភពលោក។ ដោយឡែកសម្រាប់តែក្នុងទីផ្សារចិនប៉ុណ្ណោះ រថយន្តម៉ូឌែលថាមពលទាំងពីរនេះលក់ចេញបានដល់ទៅ ១,១លានគ្រឿង ឬត្រូវជា៦០ភាគរយនៃចំណែកទីផ្សារពិភពលោក ខណៈដែលទីផ្សារអឺរ៉ុបធ្វើបានត្រឹម ២៣ភាគរយ ឬប្រមាណជា ៣៩ម៉ឺនគ្រឿងប៉ុណ្ណោះ។
ជារួម សម្រាប់រយៈពេល៦ខែឆ្នាំ២០២៥នេះ ទីផ្សារសកលទទួលបានប្រតិបត្តិការលក់រថយន្តអគ្គិសនីសរុបដល់ទៅ ៩,១លានគ្រឿង មានអត្រាកំណើនប្រមាណជា ២៨ភាគរយ ធៀបទៅនឹងពេលវេលាដូចគ្នាកាលពីឆ្នាំ២០២៤។ ដោយឡែក ទីផ្សារចិន នៅតែរក្សាតំណែងជាអ្នកនាំមុខគេក្នុងការប្រើប្រាស់ និងបញ្ជាទិញក្នុងចំណែកប្រមាណជា ៥,៥លានគ្រឿង ខណៈដែលអឺរ៉ុបធ្វើបាន ២លានគ្រឿង ហើយអាម៉េរិកខាងជើងឈរនៅលេខរៀងទី៣ ធ្វើបាន ៩០ម៉ឺនគ្រឿង។
យ៉ាងណាក៏ដោយ សម្រាប់ការលក់រថយន្តអគ្គិសនី EV របស់សហរដ្ឋអាម៉េរិកដែលធ្លាប់តែឈរតំណែងបន្ទាប់ពីចិននោះបានធ្លាក់ចុះ១ភាគរយនៅក្នុងខែមិថុនា ធៀបនឹងពេលវេលាកាលពីឆ្នាំមុន។ តាមការព្យាករណ៍តួលេខនេះទំនងជាពិបាកក្នុងការងើបឡើងមកវិញណាស់ក្នុងឆ្នាំនេះ ដោយសារតែពង្រាងច្បាប់ថវិកាថ្មីរបស់ប្រធានាធិបតីអាម៉េរិក Donald Trump បានកាត់បន្ថយឥណទានពន្ធលឿនខ្លាំងពេកពោលគឺលឿនជាងការរំពឹងទុក។
គួរឲ្យដឹងដែរថា ផែនការថវិកាជាតិថ្មីរបស់លោក Trump ដែលបានចុះហត្ថលេខាលើច្បាប់កាលពីថ្ងៃទី៤ ខែកក្កដា នឹងតម្រូវឲ្យមានការកាត់បន្ថយការគាំទ្ររបស់រដ្ឋាភិបាលសហរដ្ឋអាម៉េរិកសម្រាប់យានយន្តប្រើប្រាស់ថាមពលស្អាត ដែលវាអាចជះឥទ្ធិពលយ៉ាងខ្លាំងទៅដល់វិស័យរថយន្តអគ្គិសនី ៕
Account
Security
Favourite Content