សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័រ បានរាយការណ៍ថា តម្លៃមាសបានធ្លាក់ចុះច្រើនជាង ២ ភាគរយ បន្ទាប់ពីធនាគារកណ្តាលអាមេរិកប្រកាសពីលទ្ធភាពកាត់បន្ថយអត្រាការប្រាក់នៅដើមឆ្នាំក្រោយនេះ។
កាលពីថ្ងៃចុងសប្ដាហ៍កន្លងទៅនេះ តម្លៃមាសបានធ្លាក់ចុះ ២,១ ភាគរយមកនៅត្រឹម ២ ៥៨៩ ដុល្លារក្នុងមួយអោន ដែលជាកម្រិតទាបបំផុតចាប់តាំងពីថ្ងៃទី ១៨ ខែវិច្ឆិកា រហូតមក។ (កាលពីពាក់កណ្តាលខែវិច្ឆិកា ចំពោះទីផ្សារមាសនៅកម្ពុជា លក់ចេញមានតម្លៃ ២ ៩១០ ដុល្លារក្នុងមួយតម្លឹង ខណៈដែលមាសទិញចូលមានតម្លៃ ២ ៨៩០ ដុល្លារក្នុងមួយតម្លឹងតែប៉ុណ្ណោះ) ។
លោក Tai Wong ដែលជាពាណិជ្ជករមាសបានលើកឡើងថា ទីផ្សារមាសកំពុងមានក្តីបារម្ភចំពោះភាពមិនច្បាស់លាស់នៃតម្លៃ ខណៈប្រធានធនាគារកណ្តាលអាម៉េរិកបានបង្ហាញសញ្ញាថា ការកាត់បន្ថយអត្រាការប្រាក់អាចនឹងកើតឡើងនាពេលអនាគត ប៉ុន្តែអាចនឹងកើតឡើងយឺតជាងការរំពឺងទុក។ ឥឡូវនេះ តម្លៃមាសកំពុងធ្លាក់ចុះក្រោមតម្លៃ ២ ៦០០ ដុល្លារក្នុងមួយអោន ដែលធ្វើឱ្យមានការព្រួយបារម្ភមួយចំនួន។ ស្របពេលដែលតម្លៃមាសធ្លាក់ចុះ សន្ទស្សន៍ប្រាក់ដុល្លារបានកើនឡើងច្រើនជាង ១ ភាគរយដល់កម្រិតខ្ពស់ក្នុងរយៈពេលពីរឆ្នាំចុងក្រោយ ។ ទន្ទឹមនឹងនេះ ពាណិជ្ជករកំពុងរង់ចាំមើលទិន្នន័យ GDP សំខាន់ៗរបស់សហរដ្ឋអាមេរិក និងទិន្នន័យអតិផរណាដែលនឹងចេញនៅចុងសប្តាហ៍នេះ ដើម្បីពូកគេអាចកំណត់ការរំពឹងទុកបន្ថែមទៀតជុំវិញគោលនយោបាយរូបិយវត្ថុ។
ធនាគារកណ្តាលអាមេរិកបានចេញផ្សាយការព្យាករណ៍ថ្មីៗដោយបានបង្ហាញពីលទ្ធភាពនៃការកាត់បន្ថយអត្រាការប្រាក់នៅឆ្នាំក្រោយ ខណៈដែលពាណិជ្ជករជាច្រើនកំពុងរង់ចាំមើលប្រធានាធិបតីជាប់ឆ្នោត Donald Trump ត្រឡប់ទៅកាន់សេតវិមានក្នុងខែមករាសិន។ ប្រធានធនាគារកណ្តាលអាម៉េរិក លោក Jerome Powell បានលើកឡើងថា អ្នកបង្កើតគោលនយោបាយរបស់ Fed ចង់ឃើញវឌ្ឍនភាពបន្ថែមទៀតលើការធ្វើឱ្យអតិផរណាធ្លាក់ចុះ ខណៈដែលពួកគេពិចារណាលើការកាត់បន្ថយអត្រាការប្រាក់នាពេលអនាគត។
យ៉ាងណាមិញ តម្លៃមាសកំពុងជួបប្រទះនឹងភាពមិនច្បាស់លាស់នៅឡើយ ទាក់ទងនឹងការកាត់បន្ថយអត្រាការប្រាក់របស់ធនាគារកណ្តាលអាម៉េរិក ចំពេលដែលកំពុងមានភាពតានតឹងភូមិសាស្ត្រនយោបាយ។ ជាទូទៅ មាសត្រូវបានមើលឃើញថាជាទ្រព្យសម្បត្តិមានតម្លៃ និងសុវត្ថិភាពបំផុត ក្នុងអំឡុងពេលមានភាពមិនប្រាកដប្រជានៃសេដ្ឋកិច្ច និងជម្លោះភូមិសាស្ត្រនយោបាយ។ នៅឆ្នាំនេះ តម្លៃមាសបានឡើងថ្លៃប្រហែល ៣០ ភាគរយ ដែលធ្វើឲ្យវាក្លាយជាទ្រព្យសម្បត្តិដែលមានតម្លៃ និងសុវត្ថិភាពល្អបំផុត៕
Account
Security
Favourite Content